ދެކުނު ކޮރެއާ ޕާލަމެންޓުން އިމްޕީޗްކޮށްފައި (ވަކިކުރަން ނިންމާފައިވާ ) އެގައުމުގެ ރައީސް ޔޫން ސުކް ހައްޔަރުކުރަން އެ ގައުމުގެ ފުލުހުން ކުރި މަސައްކަތް ހަފުތާއެއް ފަހުން ކާމިޔާބުކޮށް، އޭނާ ހައްޔަރުކޮށްފި އެވެ.
ރޮއިޓާސް ބުނި ގޮތުގައި ޔޫން ހައްޔަރުކުރަން ހިންގި އޮޕަރޭޝަނުގައި 3،000 އަށް ވުރެ ގިނަ ފުލުހުން ބައިވެރިވި އެވެ. އޭނާ ހައްޔަރުކުރީ ރޭ ފަތިހު އެވެ.
ގައުމަށް ގައްދާރުވުމުގެ ކުށުގެ ތުހުމަތުގައި ޔޫން ހައްޔަރުކުރުމުން އޭނާ ނެރުއްވި ބަޔާނެއްގައި ވިދާޅުވީ ތަހުގީގުކުރާ ފަރާތްތަކަށް އެއްބާރުލުން ދެއްވަން ނިންމެވީ ލޭ އޮހޮރުވުމެއް ހިނގިޔަ ނުދިނުމަށް ޓަކައި ކަމަށެވެ.
"އަލިފާން ނިވާ އާލާތްތައް ބޭނުންކޮށްގެން، ސެކިއުރިޓީ އޭރިއާއަށް އެމީހުން ވަން ތަން ފެނުމުން އަޅުގަނޑު ނިންމީ ސީއައިއޯގެ ތަހުގީގަށް ޖަވާބުދާރީވާން. އެއީ ގާނޫނާ ހިލާފު ތަހުގީގަކަށް ވިޔަސް ޖަވާބުދާރީވާން ނިންމީ ލޭ އޮހޮރުވުމެއް ހިނގިޔަ ނުދޭން،" ބަޔާނުގައި ޔޫން ވިދާޅުވި އެވެ.
ރޮއިޓާސް ބުނި ގޮތުގައި ޔޫން ހައްޔަރުކޮށްގެން، އެންޓިކޮރަޕްޝަން އެޖެންސީއަށް ގެންދިޔައީ އޭނާގެ މޮޓޮކޭޑްގަ އެވެ.
ޔޫންއާ ސުވާލުކޮށް ތަހުގީގުކުރަން އެ އިދާރާއަށް ލިބޭނީ 48 ގަޑި އިރެވެ. އޭގެ ފަހުން ބަންދުގައި ބަހަށްޓަން ބޭނުން ނަމަ ޔޫން ކޯޓަށް ހާޒިރުކުރަން ޖެހޭނެ އެވެ.
ދެކުނުކޮރެއާ ޕާލަމެންޓުން، ޔޫން އިމްޕީޗްކުރީ މިދިޔަ ޑިސެމްބަރު މަހުގެ ތިން ވަނަ ދުވަހު ކުއްލި ނުރައްކަލުގެ ހާލަތު އިއުލާނުކުރެއްވި މައްސަލައިގަ އެވެ. ޔޫން ކުއްލި ނުރައްކަލުގެ ހާލަތު އިއުލާނު ކުރެއްވީ ގާނޫނުއަސާސީއާ ހިލާފަށް ކަމަށް އޭނާގެ އަމިއްލަ ޕާޓީން ވެސް އޭރު ބުންޏެވެ.
ޔޫން ރައީސްކަމުގެ މަގާމުން ދުރުކުރަން ޕާލަމެންޓުން ނިންމި ނިންމުން، ރަނގަޅު ކަމަށް ކަނޑައަޅައި، އޭނާގެ މަގާމު ގެއްލިއްޖެ ކަމަށް، ނުވަތަ އިމްޕީޗްމެންޓް ރަނގަޅުނޫން ކަމަށް ކަނޑައަޅައި މަގާމުގެ ބާރުތައް އިއާދަކުރުމާ މެދު ގޮތެއް ނިންމާނީ ދެކުނުކޮރެއާގެ ކޮންސްޓްޓިއުޝަނަލް ކޯޓުންނެވެ. އެ މައްސަލާގައި އެކޯޓުން އިއްޔެ ބޭއްވި އަޑުއެހުމަށް ވެސް ޔޫން ވަޑައެއްނުގަންނަވަ އެވެ.
