ޗައިނާ އާއި އިންޑިއާ ގުޅޭ ސަރަހައްދީ ރޮނގުގައި އޮންނަ ޓިބެޓަށް 7.1 މެގްނިޓިއުޑްގެ ބާރުގަދަ ބިންހެލުމެއް އައިސް 32 މީހުން މަރުވެއްޖެ އެވެ.
ޗައިނާގެ ޒިންހުއާ ނޫހުން ބުނީ ބިންހެލުމުގެ ސަބަބުން ބައެއް ގެތައް ބިމާ ހަމަވެ އެތައް ބަޔަކު ތާށިވެފައިވާއިރު، މީހުން ސަލާމަތް ކުރުމުގެ މަސައްކަތް ރެސްކިއު ޓީމުތަކުން އަންނަނީ ކުރަމުން ކަމަށެވެ.
ބިންހެލުމާ ގުޅިގެން ދިމާވެފައިވާ ކާރިސާއިން އަރައިގަތުމަށް އެހީތެރިކަން ފޯރުކޮށްދިނުމަށް ޗައިނާއިން ވަނީ ޓިބެޓަށް ރެސްކިއު ޓީމުތަކާއި ފަޔާ ފައިޓަރުންގެ ޓީމުތައް ފޮނުވާފަ އެވެ.
ޓިބެޓަށް އައި ބިންހެލުމުގެ އަސަރު ނޭޕާލުގެ އިތުރުން އިންޑިއާގެ އުތުރަށް ވެސް ކޮށްފައިވާ ކަމަށް ރިޕޯޓްތައް ބުނެ އެވެ. ނަމަވެސް އެ ދެ ގައުމަށް ބިންހެލުމުގެ ސަބަބުން އެއްވެސް ގެއްލުމެއް ލިބުނު ކަމެއް މިހާތަނަށް ރިޕޯޓު ކޮށްފައެއް ނުވެ އެވެ.
ޗައިނާގެ ސިޗުއާން ޕްރޮވިންސަށް 2008 ގައި އައި ބާރުގަދަ ބިންހެލުމުގައި 70،000 އަށްވުރެ ގިނަ މީހުން މަރުވިއިރު، ނޭޕާލަށް 2015 ގައި އައި 7.8 ބާރުގަދަ ބިންހެލުމުގައި އެ ގައުމަށް ބޮޑެތި ގެއްލުންތަކެއްވެ 9،000 އަށްވުރެ ގިނަ މީހުން ވެސް މަރުވި އެވެ.
