އަޒަރުބައިޖާން އެއާލައިންސްގެ ފްލައިޓު ވެއްޓުނު ހާދިސާއާ ގުޅިގެން ރަޝިއާގެ ރައީސް ލެޑިމިއާ ޕުޓިން، އަޒަރުބައިޖާނުގެ ރައީސް އިލްހާމް އަލިޔެވްއަށް ގުޅުއްވައި މައާފަށް އެދިއްޖެ އެވެ.
މިދިޔަ ބުދަ ދުވަހު އަޒަރުބައިޖާނުގެ ބަކޫއިން ރަޝިއާގެ ގްރޮޒްނީއަށް ދަތުރު ކުރި އެ ފްލައިޓު ކަޒަކިސްތާނަށް ވެއްޓުނުއިރު، އެ ފްލައިޓުން ދަތުރުކުރި 38 މީހުން މަރުވި އެވެ.
ރަޝިއާއިން ބުނީ ޕުޓިން މައާފަށް އެދުނީ އެ ހާދިސާ ރަޝިއާގެ ވައިގެ ސަރަހައްދުގައި ހިނގުމުގެ ސަބަބުން ކަމަށެވެ. އެގޮތުން މަރުވި މީހުންގެ އާއިލާއަށް ތައުޒިޔާ ވިދާލުވެ، ފަރުވާ ހޯދަމުން އަންނަ މީހުންނަށް އަވަސް ޝިފާއަކަށް އެދިފައިވާ ކަމަށެވެ.
"ފްލައިޓު ވެއްޓުނު ވަގުތު ޔޫކްރެއިންގެ ހަމަލާތައް ދިޔައީ ގްރޮންޒީއަށް ވެސް ދެމުން. އެގޮތުން ރައްދު ހަމަލާތައް ރަޝިއާގެ އެއާ ޑިފެންސް ސިސްޓަމުން ދީފައިވާނެ،" ރަޝިއާއިން ބުންޏެވެ.
ނަމަވެސް ފްލައިޓު ވެއްޓުމުގެ ހާދިސާ ހިނގީ ރަޝިއާގެ ސަބަބުން ކަމަށް ޕުޓިން ވިދާޅުވެފައި ނުވާ ކަމަށް ރިޕޯޓުތައް ބުނެ އެވެ.
ރިޕޯޓްތައް ބުނާ ގޮތުން އަޒަރުބައިޖާނުން ތުހުމަތު ކުރާ ގޮތުގައި އެ ފްލައިޓު ވެއްޓުނީ ރަޝިއާއިން ދިން މިސައިލް ހަމަލާއެއްގަ އެވެ. ނަމަވެސް މިހާތަނަށް އަޒަރުބައިޖާނުން ރަސްމީކޮށް އެފަދަ ތުހުމަތެއް ކުރާކަން ހާމައެއް ނުކުރެ އެވެ.
ފްލައިޓު ވެއްޓުނު ހާދިސާ އަޒަރުބައިޖާންގެ އިތުރުން ކަޒަކިސްތާން އަދި ރަޝިއާއިން ވެސް ގެންދަނީ ތަހުގީގު ކުރަމުންނެވެ.
