މެލްބާން، އޮސްޓްރޭލިއާ (ޑިސެމްބަރު 26) - ބޯޑާ ގާވަސްކަރު ޓްރޮފީގެ ހަތަރު ވަނަ ޓެސްޓްގެ ފުރަތަމަ ދުވަހުގައި، އޮސްޓްރޭލިއާގެ 19 އަހަރުގެ އުންމީދީ ކްރިކެޓް ކުޅުންތެރިޔާ، ސޭމް ކޮންސްޓަސް އަށް ހަމަލާދިން ކަމަށް އިންޑިއާގެ ތަރި ވިރާތު ކޯލީ އެއްބަސްވުމުން އޭނާ ސަސްޕެންޝަނަކުން ސަލާމަތްވެއްޖެ އެވެ.
ޓެސްޓް މެޗެއްގައި، 1953 ވަނަ އަހަރަށް ފަހު، އޮސްޓްރޭލިއާ އަށް ކުޅޭ އެންމެ ޒުވާން ކުޅުންތެރިޔާގެ ޝަރަފް ހޯދި ކޮންސްޓަސް ވަނީ މިއަދު އެ ޓީމުގެ އިނިންގްސްގައި، 65 ބޯޅައިން 60 ލަނޑު އެއްކޮށްފަ އެވެ. އެއީ، ހަ ފަހަރު ހަތަރަކަށް ޖަހައި، ދެ ފަހަރު ހަޔަކަށް ޖަހައިގެންނެެވެ.
އިންޑިއާގެ ކުޅަދާނަ ބޯލަރު، ޖަސްޕްރީތު ބުމްރާގެ އުކުމެއްގައި ވެސް ކޮންސްޓަސް ވަނީ ހަޔަކަށް ބޯޅައެއް ޖަހައިފަ އެވެ. މިއީ، ޓެސްޓް ކްރިކެޓްގައި، ބުމްރާގެ 4483 ގެ އުކުމުގެ ފަހުން، ކުޅުންތެރިއަކަށް ހަޔަކަށް ޖެހުނު ފުރަތަމަ ފަހަރެވެ.
ކޮންސްޓަސް (ވ) އާއި ވިރާތު (ކ) މެދުގައި ބަހުގެ ހަމަލާ ބަދަލުކުރި ވަގުތުގައި އުސްމާން ހަވާޖާ (މ) މައްސަލަ ހައްލުކުރަން ވާހަކަ ދައްކަނީ،---
އެކަމަކު، މި މެޗުގައި ކޮންސްޓަސް އާއި ވިރާތުގެ ދެމެދުގައި ހިނގައިދިޔަ ކަމެއްގެ ސަބަބުން ގިނަ ބަޔެއްގެ ސަމާލުކަން ހުއްޓުނީ އެކަމަށެވެ. އެ ގޮތުން، 10 ވަނަ އޯވަރުގައި ވިރާތު ބޯޅަ ހިފައިގެން ހިނގާފައި އަންނަމުން ކޮންސްޓަސް ކޮނޑުގައި ޖެހުމުން، އެ ކަމާ ދެބަސްވުންތަކެއް ހިނގި އެވެ. އަދި ވިރާތު އާއި ކޮންސްޓަސްގެ ދެމެދުގައި ބަހުގެ ހަމަލާ ބަދަލުކުރިތަން ފެނިގެންދިޔަ އެވެ.
މި މައްސަލަ މާ ހޫނުނުވެ، ހައްލުވެގެންދިޔަ ނަމަވެސް މެޗު ބަލަން ތިބި 87,242 އެއްހާ ސަޕޯޓަރުންގެ ކުރިމަތީގައި ހިނގި މި ކަންތައްތަކަށް ކުރީގެ ކުޅުންތެރިންނާއި މެޗު އެނަލިސްޓުން ވަނީ ފާޑުކިޔައިފަ އެވެ.
މެޗުގެ ރެފްރީ އެންޑީ ޕްއިކްރޮފްޓް ވަނީ، ވިރާތު، 36، ވަނީ އިންޓަނޭޝަނަލް ކްރިކެޓް ކައުންސިލް (އައިސީސީ)ގެ ގަވާއިދާ ހިލާފު އަމަލެއް ކޮށްފައި ކަމަށް ކަނޑައަޅައިފަ އެވެ. އަދި ގަސްދުގައި "ފިޒިކަލް ކޮންޓްކެޓެއް" މެދުވެރިކޮށް، ވިރާތު ކުޅުންތެރިއަކާ ކުރިމަތިލާފައި ކަމަށް ނިންމައި، އޭނާގެ މެޗު ފީ އިން 20 ޕަސެންޓް ޖޫރިމަނާ އަށް ދައްކަން ވަނީ އަންގައިފަ އެވެ.
ވިރާތަށް ސަސްޕެންޝަނެއް ނުދޭން ނިންމީ، އެކަމާ ދެކޮޅު ނުހަދައި، ކުށަށް އިއުތިރާފުވުމުންނެވެ.
ސަސްޕެންޝަނެއް ނުދޭން ނިންމުމާ ގުޅިގެން، އަންނަ މަހު ކުޅޭ ފަހު ޓެސްޓް މެޗުގައި ވިރާތަށް ކުޅެވޭނެ އެވެ.
