އޮސްޓްރޭލިއާ ކައިރީގައި އޮންނަ ޖަޒީރާ ގައުމެއް ކަމުގައިވާ ވަނުއާޓޫއަށް އައި 7.3 މެގްނިޓިއުޑްގެ ބާރުގަދަ ބިންހެލުމުގައި މަރުވި މީހުންގެ އަދަދު 14 އަށް އަރައިފި އެވެ.
ވަނުއާޓޫގެ ވެރިރަށް ޕޯޓް ވިލާ ކައިރިއަށް އައި އެ ބިންހެލުމުގައި 200 އަށްވުރެ ގިނަ މީހުން ޒަހަމްވެގެން ހޮސްޕިޓަލުތަކުގައި ފަރުވާ ދެމުން އަންނައިރު، މަރުވި މީހުންގެ އަދަދު އިތުރުވާނެ ކަމަށް ވަނީ ލަފާ ކޮށްފަ އެވެ.
އދ އިން އަންދާޒާ ކުރާ ގޮތުގައި 335،000 މީހުންގެ އާބާދީއެއް އޮންނަ ވަނުއާޓޫގެ ގިނަ ބަޔަކަށް ބިންހެލުމުގެ އަސަރު ކުރި އެވެ.
"މުއާސަލާތީ ހިދުމަތްތަކަށް ވަނީ ބުރޫ އަރާފައި. އޭގެ ސަބަބުން ދަތިތައް އަންނަނީ ކުރިމަތިވަމުން. ދޭން ޖެހޭ އެހީތެރިކަން ފޯރުކޮށްދޭން މި އަންނަނީ މަސައްކަތް ކުރަމުން،" އދ. އިން ބުންޏެވެ.
ބިންހެލުމުގައި އިމާރާތްތައް ބިމާ ހަމަވެ، ބިންގަނޑު ކަނޑައިގެން ދިޔުމުގެ އިތުރުން ކަރަންޓާއި މުއާސަލާތީ ހިދުމަތްތަކަށް ބުރޫ އެރި އެވެ.
ބިންހެލުމާ ގުޅިގެން ތާށިވެފައިވާ މީހުން ސަލާމަތް ކުރުމުގެ މަސައްކަތް ކުރަމުންދާއިރު، ބައެއް މީހުން ގެއްލިގެން ވެސް އަންނަނީ ހޯދަމުން ކަމަށް ރިޕޯޓްތައް ބުނެ އެވެ.
ވަނުއާޓޫއަށް ދިމާވެފައިވާ ކާރިސާއާ ގުޅިގެން އެހީތެރިކަން ފޯރުކޮށްދިނުމަށް އޮސްޓްރޭލިއާ އަދި ނިއުޒިލެންޑުން ވަނީ ޓީމުތައް އެ ގައުމަށް ފޮނުވާފަ އެވެ.
ބިންހެލުމުގެ ސަބަބުން ވަނުއާޓޫ އާއި އެ ގައުމު ކައިރީގައި އޮތް އެހެން ގައުމުތަކަށް ސުނާމީ އަރާނެ ކަމަށް ލަފާ ކުރި ނަމަވެސް، ސުނާމީގެ އިންޒާރު ފަހުން ކެންސަލް ކުރި އެވެ.
