އިނގިރޭސި އަމީރު ހެރީގެ ބައްޕާފުޅާއި ބޭބޭފުޅާ އޮތް ނުތަނަވަސް ގުޅުން ރަނގަޅު ކުރަން ބޭނުންވާ ކަމަށް މަޖައްލާއަކަށް ދެއްވި އިންޓަވިއުއެއްގައި ވިދާޅުވެއްޖެ އެވެ.
ނިއުޔޯކުގައި "ޖީކިއު" މަޖައްލާއަށް ދެއްވި އިންޓަވިއުއެއްގައި ހެރީ ވިދާޅުވީ، ބައެއް މީހުން އެ ގުޅުން ރަނގަޅުވާން ބޭނުން ނުވި ނަމަވެސް، އޭނާ ބޭނުންވަނީ އެކަން ކާމިޔާބު ކުރަން ކަމަށެވެ. އަދި ދުނިޔޭގައި މިހާރު ހިނގަމުންދާ ކަންކަމަށް ބަލާއިރު، އެންމެ މުހިންމު ކަމަކީ އަލުން ގުޅުން ގާއިމުކުރުން ކަމަށް އޭނާ ފާހަގަކުރެއްވި އެވެ.
ހެރީ ވިދާޅުވި ގޮތުގައި، ހިތާމަވެރި ހާދިސާތަކުގެ ލަކުނުތައް އަބަދުވެސް ހުންނާނެ އެވެ. ނަމަވެސް މާޒީގައި ހިނގާފައިވާ ކަންކަމާ މެދު ދެކޭ ގޮތް ބަދަލުކޮށް، އެކަންކަން ހަނދާން ނައްތާލުމަށް ކޮންމެ މީހަކަށް ވެސް އޭނާ ބާރުއަޅުއްވަ އެވެ.
މިދިޔަ ހޫނު މޫސުމުގައި އިނގިރޭސިވިލާތަށް އެނބުރި ވަޑައިގަތް ފަހުން، ހެރީ އާއި އަނބިކަނބަލުން މޭގަން މާކަލް އެކުގައި ފުރަތަމަ ފަހަރަށް އާންމު ހަރަކާތަކުން ފެނިފައިވަނީ މިދިޔަ ހަފުތާގަ އެވެ.
ޖީކިއު މަޖައްލާއިން ހެރީގެ މި އިންޓަވިއު ނަގާފައިވަނީ މިދިޔަ މަހު އެވެ. މި އިންޓަވިއު އާންމުކޮށްފައިވަނީ އޮމާންގެ ސުލްތާން އިނގިރޭސިވިލާތަށް ކުރައްވާ ދައުލަތުގެ ދަތުރުފުޅާ ގުޅިގެން، ވިންޑްސާގައި ޝާހީ އާއިލާގެ ބޭފުޅުން އެމަނިކުފާނަށް މަރުހަބާ ދެންނެވުމުގެ މަސައްކަތުގައި އުޅުއްވަނިކޮށެވެ.
ނަމަވެސް ތަރުޖަމާނަކު ވިދާޅުވީ، މި އިންޓަވިއު ރެކޯޑުކޮށްފައިވަނީ ސެޕްޓެމްބަރު މަހުގެ ފަހުކޮޅު ކަމަށާއި، އެ އިންޓަވިއު ޝާއިއުކުރާނެ ވަގުތެއް ނިންމީ މުޅިން ވެސް ޕަބްލިޝަރުން ކަމަށެވެ. އެހެންކަމުން، އިންޓަވިއު އާންމުކުރި ވަގުތާ ޝާހީ އާއިލާގެ ހަރަކާތްތަކާ އެއްވެސް ގުޅުމެއް ނެތް ކަމަށް އޭނާ ވިދާޅުވި އެވެ.
މީގެ އިތުރުން، "ބައެއް މީހުން އެ ގުޅުން ރަނގަޅުވާން ބޭނުން ނުވާ" ކަމަށް ހެރީ ވިދާޅުވި ބަހަކީ، އޭނާގެ ބޭބޭފުޅު ވަލީއަހުދު އަމީރު ވިލިއަމް ނުވަތަ އާއިލާގެ އެހެން މެންބަރަކަށް އަމާޒުކޮށް ވިދާޅުވި ބަހެއް ނޫން ކަމަށް ވެސް ތަރުޖަމާނު ވިދާޅުވި އެވެ.
ހެރީ އާއި މޭގަން އިނގިރޭސިވިލާތް ދޫކޮށް އެމެރިކާއަށް ދިރިއުޅުން ބަދަލުކުރީ 2020 ވަނަ އަހަރު އެވެ. އެއީ ޝާހީ އާއިލާގެ ރަސްމީ ޒިންމާތަކުން ވަކިވެ، އާއިލާއާ ދެމެދު އުފެދުނު ބޮޑު ހިޔާލުތަފާތުވުންތަކަކަށް ފަހުގަ އެވެ.
ހެރީ ނެރުއްވި އޭނާގެ ހަޔާތުނާމާ "ސްޕެއާ" އިން ވަނީ އާއިލާގެ ތެރޭގައި އުފެދިފައިވާ މައްސަލަތަކުގެ ފުންމިނާއި، ބޭބޭފުޅު ވިލިއަމްއާ އޮތް ގުޅުން ހީނަރުވެފައިވާ މިންވަރު ހާމަވެފަ އެވެ.
ހެރީ މިހާރު އިނގިރޭސިވިލާތުގައި ހުންނެވުމުން އާއިލާއާ ޖިސްމާނީ ގޮތުން ކައިރިވި ނަމަވެސް، ވިލިއަމްއާ އޮތް ގުޅުމަށް މާ ބޮޑު ކުރިއެރުމެއް އައިސްފައެއް ނުވެ އެވެ. އެހެންނަމަވެސް، މި އިންޓަވިއުގައި ހެރީ ވަނީ އަލުން ގުޅުން ގާއިމުކުރުމަށް ތައްޔާރަށް ހުންނެވިކަން ހާމަކުރައްވާފަ އެވެ.
މިއީ 2025 ވަނަ އަހަރުގެ މޭ މަހު އެމެރިކާގައި ދިރިއުޅުއްވަމުން ބީބީސީއަށް ދެއްވި އިންޓަވިއުއެއްގައި ވެސް އޭނާ ދެއްކެވި ފަދަ، ގުޅުން ބަދަހިކުރުމުގެ ވާހަކަތަކެކެވެ.
އަލުން އިނގިރޭސިވިލާތަށް ދިރިއުޅުން ބަދަލުކުރި ސަބަބާ ގުޅޭ ގޮތުން ޖީކިއުއިން ސުވާލުކުރުމުން ހެރީ ވިދާޅުވީ، އެއީ އާއިލާއަށް ލިބޭ ފުރުސަތުތަކަށްޓަކައި ކަމަށެވެ. އަދި ދަރިންނަށް އިނގިރޭސިވިލާތުގެ ސްކޫލަކުން ތައުލީމު ދިނުމަކީ އޭނާއަށް ވަރަށް މުހިންމު ކަމެއް ކަމަށާއި، އެކަމުގެ މުހިންމުކަން ކުރިން އިހުސާސް ނުކުރެވޭ ކަމަށް ވެސް ވިދާޅުވި އެވެ.
ހެރީ ވިދާޅުވި ގޮތުގައި އޭނާގެ ދަރިން ކަމަށްވާ އާޗީ އާއި ލިލިބެޓް އެ ގައުމުގައި އުޅެނީ ވަރަށް އުފަލުންނެވެ. އަދި އެކަމުގެ ސަބަބުން އެ ކުދިންނަށް މުޅިން ތަފާތު ތަޖުރިބާތަކެއް ލިބެމުންދާ ކަމަށް އޭނާ ވިދާޅުވި އެވެ.
"އާއިލާއާ ގާތުގައި، އަދި އިނގިރޭސިވިލާތުގެ ފަސްގަނޑުގައި މަދު ދުވަސްކޮޅަކަށް ވުރެ ގިނަ ދުވަހު މަޑުކޮށްލެވުމަކީ ލިބޭ ވަރަށް ބޮޑު ހިތްހަމަޖެހުމެއް،" ހެރީ ވިދާޅުވި އެވެ.
ކެންސަރު ބައްޔަށް ފަރުވާ ހޯއްދަވަމުން ގެންދަވާ ބައްޕާފުޅު، ރަސްގެފާނު ޗާލްސްގެ ސިއްހީ ހާލަތާ ގުޅޭ ގޮތުން ވާހަކަދައްކަވަމުން ހެރީ ވިދާޅުވީ، ރަސްގެފާނުގެ ހާލުކޮޅު ރަނގަޅުވަމުން އަންނަ ކަމަށެވެ.
މީގެ އިތުރުން، 1997 ވަނަ އަހަރު މަންމާފުޅު ޑަޔާނާ އަވަހާރަވުމުން ލިބުނު ފުން ހިތާމައިގެ ތެރޭގައި ބޮޑުވުމާ ގުޅޭ ގޮތުން ވެސް އޭނާ ވާހަކަދެއްކެވި އެވެ.
ހެރީ ވިދާޅުވީ، މަންމާފުޅުގެ ހަނދާންތަކަކީ އޭނާގެ މަސައްކަތުގައި ކުރިއަށް ދިއުމަށް ލިބޭ ހިތްވަރެއް ކަމަށާއި، އެ ހިތާމައިގެ ތެރެއަށް ގެނބި، މާޒީގައި ހިފެހެއްޓިފައި ހުންނަން ބޭނުން ނުވާ ކަމަށެވެ.
