ރިއޯ ޑި ޖަނެއިރޯ، ބްރެޒިލް (ޑިސެމްބަރު 17) - ކުރިން ބްރެޒިލް ގައުމީ ފުޓްބޯޅަ ޓީމާއި އިންޓަ މިލާނަށް ކުޅުނު ބްރެޒިލްގެ މަޝްހޫރު ފޯވާޑް، އެޑްރިއާނޯ، ރަސްމީކޮށް ފުޓުބޯޅަ ކުޅުން ހުއްޓާލައިފި އެވެ.
އެޑްރިއާނޯ 42، އަކީ ދެހާހުގެ ކުރީކޮޅު އެމްޕެރާގެ ނަމުން މަޝްހޫރުވި ފޯވާޑެކެވެ. އެކަމަކުު، ރަލުގެ ބާވަތްތައް ޕްރޮމޯޓްކޮށް ހެދުމުން އޭނާ އަށް ގިނަ ބަޔެއްގެ ފާޑުކިޔުންވަނީ އަމާޒުވެފަ އެވެ.
އެޑްރިއާނޯ ފުޓުބޯޅަ ކުޅުން ހުއްޓާލީ އޭނާގެ ކެރިޔަރުފެށި ފްލެމިންގޯ ޖާޒީގަ އެވެ. އެ ގޮތުން ފްލެމިންގޯ ލެޖެންޑްސް އަދި ފްރެންޑްސް އޮފް އިޓަލީއާ ދެމެދު ކުޅުނު މި މެޗު ފްލެމިންގޯ އިން ކާމިޔާބުކުރީ 4-3 ގެ ނަތީޖާ އަކުންނެވެ.
މި މެޗުގެ ކުރިން އެޑްރިއާނޯ އެންމެ ފަހުން މެޗެއް ކުޅުނީ މީގެ އަށް އަހަރު ކުރިންނެވެ.
އެޑްރިއާނޯ ވަނީ ބްރެޒިލްގެ ގައުމީ ޓީމަށް 48 މެޗު ކުޅެދީފަ އެވެ. އަދި 2004 ވަނަ އަހަރު ބްރެޒިލް އިން ކޮޕާ އެމެރިކާ ކާމިޔާބުކުރިއިރު, އެޑްރިއާނޯގެ ހިއްސާ ބޮޑެވެ.
މީގެ އިތުރުން އިޓަލީގެ ކްލަބް އިންޓަ މިލާންއާ އެކު ގިނަ ކާމިޔާބީތަކެއް އެޑްރިއާނޯ ހޯދި އެވެ. އޭގެ ތެރޭގައި، އިޓާލިއަން ލީގު ހަތަރު ފަހަރާއި އިޓާލިއަން ކަޕް ދެ ފަހަރު ހިމެނެ އެވެ.
ފުޓްބޯޅަ ކެރިއަރުގައި އެޑްރިއާނޯ ކުޅެފައިވާ ކްލަބްތަކަށް ބަލާއިރު، ޕާމާ، ރޯމާ، ކޮރިންތިއަންސް، ސައޮ ޕައޮލޯ އަދި ފިއޮރެންޓީނާ ވެސް ހިމެނެ އެވެ.
