ރަޝިއާގެ ނިއުކްލިއާ ޕްރޮޓެކްޝަން ފޯސްގެ ޗީފް ލެފްޓިނަންޓް ޖެނެރަލް އިގޯ ކްރިލޮވްއަށް އަމާޒުކޮށް ބޮމުގެ ހަމަލާއެއްދީ އޭނާ މަރާލައިފި އެވެ.
އިލެކްޓްރިކް ސްކޫޓަރެއްގައި ފޮރުވާފައި އޮތް ބޮމެއް ގޮއްވާލައިގެން ކިރިލޮވްއަށް އެ ހަމަލާ ދިނީ މޮސްކޯގެ އެޕާޓްމަންޓެއް ކައިރީގަ އެވެ.
އެ ހަމަލާގައި ކިރިލޮވްގެ އިތުރުން އޭނާގެ އެސިސްޓެންޓު ވެސް މަރުވެފައިވާ ކަމަށް ؛ރަޝިއާ ސަރުކާރުން ވަނީ ކަށަވަރު ކޮށްދީފަ އެވެ.
ރޮއިޓާސްއިން ބުނާ ގޮތުގައި ބޮމުގެ ހަމަލާދިން ސަރަހައްދު ކޯޑަންކޮށް ކަމާބެހޭ ފަރާތްތަކުން ވަނީ މައްސަލަ ތަހުގީގު ކުރަން ފަށާފަ އެވެ.
މަރުވި ކިރިލޮވްއަކީ ރަޝިއާގެ ނިއުކްލިއާ، ބަޔަލޮޖިކަލް އަދި ކެމިކަލް ޕްރޮޓެކްޝަންގެ ސިފައިންނާ ހަވާލުވެގެން ހުންނެވި ޖެނެރަލެވެ.
މިކަމާ ގުޅިގެން މިހާތަނަށް ރަޝިއާގެ ރައީސް ލެޑިމިއާ ޕުޓިން އެއްވެސް އެއްޗެއް ބުނެފައި ނުވާއިރު، ކިރިލޮވްގެ މަރުގެ ބަދަލު ރަޝިއާއިން ހިފާނެ ކަމަށް ބެލެވެ އެވެ.
ރަޝިއާއިން އަންނަނީ ޔޫކްރެއިންއަށް ހަމަލާތައްދީ އެ ގައުމު ހިފުމަށް މަސައްކަތް ކުރަމުންނެވެެ.
