މިނިސްޓްރީތައް އަނދައިގެންދިޔަ އަލިފާނުގެ ސަބަބުން އެ ސަރަހައްދުގައި ހިންގާ ތިން ވިޔަފާރިއެއް ހުއްޓިފައި ހުންނަތާ މިއަދަށް ފަސް ދުވަސް ފާއިތުވެ ބޮޑު ގެއްލުމަކާ ކުރިމަތިލާން ޖެހިއްޖެ އެވެ.
ހައުސިން މިނިސްޓްރީ އާއި އިންފްރާސްޓްރަކްޗާ މިނިސްޓްރީގެ އިތުރުން އެންވަރަމެންޓް މިނިސްޓްރީ އަނދައިގެންދިޔަ އަލިފާނާ ގުޅިގެން ބުރާސްފަތި ދުވަހުން ފެށިގެން އަމީނީ މަގުގެ، އިއްޒުއްދީން މަގާއި ހަނދުވަރީ ހިނގުމާ ދެމެދު އޮންނަނީ ބަންދުކޮށްފަ އެވެ.
އެ ސަބަބާހުރެ އެ ކޮށީގައި ހުންނަ މުނި ހޯމްކެއާ ލިވިން ސެންޓަރާއި ހުންގާނު ފިހާރަ އަދި ހައި ސޭލްސް ފިހާރައިގެ ވިޔަފާރި ހުރީ ފާއިތުވި ފަސް ދުވަހު ވެސް ހުއްޓިފަ އެވެ. ނަތީޖާއެއްގެ ގޮތުން އެ ތިން ވިޔަފާރިއަށް ވެސް ބޮޑު ގެއްލުމަކާ ކުރިމަތިލާން ޖެހިފައިވާ ކަމަށް އެކަމާ ގުޅިގެން "އަދަދު" ނޫހާ ވާހަކަ ދެއްކި ވިޔަފާރިވެރިން ބުންޏެވެ.
"ވަރަށް ބޮޑު ގެއްލުމެއް، ކަސްޓަމަރުން އެބަ ބޭނުންވޭ ވަންނަން، އެކަމަކު މި ތަން [މަގު] ބަންދުކޮށްފައި އޮންނާތީ ކަސްޓަމަރަކަށް ނުވަދެވޭ މިތަނަކަށް، ލިބިފައި ހުރި ގެއްލުން ބަލައިލަން ވެސް ސަރުކާރުގެ ފަރާތުން އަދި ނާދޭ، މި އިމާރާތުގެ ހުރިހާ ބިއްލޫރިތަކެއް ތަޅައިގެން ގޮސްފައި އެހުރީ، ދުވާލެއްގެ މައްޗަށް 400،000-300،000ރ. ގެ ސޭލްސް ވާ ފިހާރައެއް މިއީ، އެކަމަކު ވިޔަފާރި ނުވެ މިހުރީ" އެ ސަރަހައްދުގައި ހިންގާ ފިހާރައެއްގެ އޮފިޝަލެއް ބުންޏެވެ.
ހައުސިން މިނިސްޓްރީ ހިންގަމުންދިޔަ ޓިނު އިމާރާތް ރޫޅާލުމުގެ މަސައްކަތް ކުރަން އަމީނީ މަގު ބަންދުކޮށްފައި އޮތް ސަރަހައްދުގައި ކެރޭނު އަޅާފައި -- ފޮޓޯ: މުހައްމަދު ޝަހުޒާން / އަދަދު
އޭނާ ބުނީ އަލިފާނާ ގުޅިގެން ގެއްލުން ލިބި، ހުއްޓުމަކަށް އައީ ސަރުކާރުގެ ތިން މިނިސްޓްރީ އެކަނި ނޫން ކަމަށާއި އެ ހާދިސާ އާ ގުޅިގެން އެ ސަރަހައްދުގައި ހުރި ފިހާރަތަކަށް ވެސް ގެއްލުންތަކެއް ލިބި ވިޔަފާރި ހުއްޓިފައިވާ ކަމަށެވެ.
ނަމަވެސް ސަރުކާރުން ވަގުތީ ހައްލު ހޯދައިދިނީ ހަމައެކަނި އެ މިނިސްޓްރީތަކަށް ކަން ފާހަގަކޮށް އޭނާ ބުނީ އެ ސަރަހައްދުގައި ހުރި ފިހާރަތަކަށް ލިބުނު ގެއްލުން ބަލައިލަން ސަރުކާރުގެ ފަރާތުން ވެސް އަދި ކަމާބެހޭ އެއްވެއް އިދާރާއަކުން ވެސް މިހައިތަނަށް ގޮސްފައި ނުވާ ކަމަށެވެ.
"ސަރުކާރުގެ ތިން ވުޒާރާ ހިންގަން ދަރުބާރުގޭގައި ވަގުތީ ސެޓަޕެއް ދެ ދުވަހުން ޖަހާ ނިންމާލައިގެން އެތަނުގައި މަސައްކަތް ފަށައިގެން ކުރިއަށް އެ ގެންދަނީ، އެކަމަކު މިއީ އެތައް ބައެއްގެ ވިޔަފާރިތަކެއް، ކިތައް ފިހާރަ މިހުރީ ބަންދުކޮށްފައި، ހުޅުވޭނެ ދުވަހެއް ނޭނގޭ، ހަމަ މަޑުމަޑުން ކޮށްލަކޮށްލައި އެ ތިބެނީ ދެ މީހަކު މަސައްކަތް،" އޭނާ ބުންޏެވެ.
އަލިފާނުގައި އަނދައިގެންދިޔަ މިނިސްޓްރީތައް ރޫޅާލުމުގެ މަސައްކަތް ކުރަމުންދަނީ ސަރުކާރު ހިއްސާވާ ކުންފުނިތަކުގެ މުވައްޒަފުންނެވެ. ނަމަވެސް އެ މަސައްކަތް ކުރަމުންދަނީ ވަރަށް ލަސް ދުވެއްޔެއްގައި ކަމަށް އެ ސަރަހައްދުގައި ހިންގާ އެހެން ފިހާރައެއްގެ އޮފިޝަލެއް ވެސް ބުންޏެވެ.
ހައުސިން މިނިސްޓްރީ ހިންގި ޓިނު އިމާރާތް ރޫޅާލުމުގެ މަސައްކަތް ކުރަނީ -- ފޮޓޯ: މުހައްމަދު ޝަހުޒާން / އަދަދު
"އެހެން ތަނަކަށް މުދާ ބަދަލު ކުރަން މިހާރު މަސައްކަތް މިކުރަނީ، ވަރަށް ބޮޑަށް ގެއްލުންވެއްޖެ ވިޔަފާރިއަށް، އެއްވެސް ކަސްޓަމަރަކަށް މިތަނަކަށް ނުވަދެވޭ، މަސައްކަތް ކުރިއަށް އެ ދަނީ ވަރަށް ލަސްކޮށް،" އެ ސަރަހައްދުގައި ހިންގާ އެހެން ވިޔަފާރިއެއްގެ އޮފިޝަލެއް ބުންޏެވެ.
ބުރާސްފަތި ދުވަހުގެ އަލިފާނާ ގުޅިގެން އެ ސަރަހައްދު ބަންދުކޮށްފައި އޮންނަތާ މިއަދަށް ފަސް ދުވަސްވީއިރު ހައުސިން މިނިސްޓްރީ ހިންގަމުންދިޔަ ޓިނު އިމާރާތް ރޫޅާލައި އެ ސަރަހައްދު ހުޅުވޭނެ ދުވަހެއް އަދި ނޭނގެ އެވެ. އަދި އެފަދަ މައުލޫމާތެއް ސަރުކާރުން ހާމައެއް ވެސް ނުކުރެ އެވެ.
އަލިފާނާ ގުޅިގެން ސަރުކާރުގެ ތިން މިނިސްޓްރީގެ އިތުރުން އެ އިމާރާތްތަކުގައި ހިންގަމުންދިޔަ އީޕީއޭ އާއި ސިޓީ ކައުންސިލުގެ ލޭންޑް އެންޑް ވައިޓަލްސް ޑިޕާޓުމެންޓްގެ ހިދުމަތްތައް ވެސް ވަނީ ހުއްޓުމަކަށް އައިސްފަ އެވެ.
