މިއުނިކް (ޑިސެމްބަރު 1) - ޖަރުމަނު ލީގުގައި ރޭ މެޗުގެ ފުރިހަމަ ވަގުތު ހަމަވާން ފަސް މިނިޓަށް ވެފައިވަނިކޮށް ޖަމާލް މުސިއާލާ ޖެހި ގޯލުން ބަޔާން މިއުނިކުން 1-1 އިން ބޮރޫޝިއާ ޑޯޓްމަންޑާ އެއްވަރުކޮށްފި އެވެ.
މި ނަތީޖާއާ އެކު، ބަޔާނުން ލީގުގެ އެއް ވަނައިގައި އޮތީ 12 މެޗުން 30 ޕޮއިންޓާ އެކު އެވެ. ދެ ވަނައިގައި އޮތް އައިންޓްރަކްޓް ފްރޭންކްފާޓަށް 11 މެޗުން 23 ޕޮއިންޓް ލިބިފައިވާއިރު، ތިން ވަނައިގައި އޮތް އެންމެ ފަހުގެ ޗެމްޕިއަން، ބަޔާ ލެވަކޫސަން އިން ވަނީ 12 މެޗުން 23 ޕޮއިންޓް ހަމަކޮށްފަ އެވެ. ހަތަރެއްގައި އޮތް އާރްބީ ލައިޕްޒިގަށް 12 މެޗުން 21 ޕޮއިންޓް އަދި ފަސް ވަނައިގައި އޮތް ޑޯޓްމަންޑަށް ވަނީ 12 މެޗުން 20 ޕޮއިންޓް ލިބިފަ އެެވެ.
އަމިއްލަ ދަނޑުގައި ކުޅުނު ޑޯޓްމަންޑުން ފުރަތަމަ ހާފު ނިންމާލީ ލީޑުގަ އެވެ. އެ ޓީމުން ގޯލު ޖެހީ މެޗުގެ 27 ވަނަ މިނިޓްގަ އެވެ. ޑޯޓްމަންޑްގެ ފުލްބެކް، ޖޭމީ ގިޓެންގެ ފަރާތުން އިންޑިވިޖުއަލް މޮޅު ކުޅުމެއް ފެނުނު މި ގޯލުގައި ފޮނުވާލި ބޯޅަ ބަޔާންގެ ކީޕަރު މެނުއަލް ނޯޔާ އަށް ހުއްޓުވޭގޮތެއްނުވި އެވެ.
އަނިޔާއާ ހެދި ބަޔާންގެ ފޯވާޑް ހެރީ ކޭން ވަނީ ފުރަތަމަ ހާފު ނިމުމުގެ ކުރިން ބަދަލުކުރަން ޖެހިފަ އެވެ.
ވިންސެންޓް ކޮމްޕެނީ ކޯޗުކޮށްދޭ ބަޔާނަށް ރޭގެ މެޗުގައި ޑޯޓްމަންޑުގެ ކީޕަރު ގްރެގޯ ކޮބެލް ރަނގަޅަށް ޓެސްޓް ކޮށްލެވޭ ގޮތެއްނުވިއިރު، ބަޔާނުން އެއްވަރުކުރި ގޯލު ޖެހީ ވެސް ލިބުނު ކުޑަ ފުުުރުުސަތެއްގެ ބޭނުންހިފައިގެންނެވެ. މިއީ މައިކަލް އޮލީސޭ ނެގި ބޯޅައަކުން މުސިއާލާ ބޮލުން ޖެހި ގޯލެކެވެ.
