ވަކި މީހަކު އިސްތިސްނާ ނުކޮށް އިންޓަނޭޝަނަލް ކޯޓުތަކުގެ އަމުރުތައް ރާއްޖެއިން ތަންފީޒު ކުރާނެ ކަމަށް ހޯމް މިނިސްޓަރު، އަލީ އިހުސާން ވިދާޅުވެއްޖެ އެވެ.
އިޒްރޭލުގެ ބޮޑުވަޒީރު، ބެންޖަމިން ނަތަންޔާހޫ އާއި އިޒްރޭލުގެ ކުރީގެ ޑިފެންސް މިނިސްޓަރު، ޔޮއޭވް ގަލަންޓް ހައްޔަރު ކުރަން އިންޓަނޭޝަނަލް ކްރިމިނަލް ކޯޓު (އައިސީސީ) އިން ނެރުނު އަމުރު ތަންފީޒު ކުރުމާ ގުޅޭގޮތުން "އަދަދު" ނޫހަށް މައުލޫމާތު ދެއްވަމުން އިހުސާން ވިދާޅުވީ އިންޓަނޭޝަނަލް ކޯޓުތަކުގެ އަމުރުތައް ތަންފީޒު ކުރަން އެއްވެސް ހުރަހެއް ނެތް ކަމަށެވެ.
"އަޅުގަނޑުމެންނަކަށް އެއްވެސް ހުރަހެއް ނޯންނާނެ އިންޓަނޭޝަނަލް ކޯޓުތަކުގެ އަމުރު ތަންފީޒު ކުރާކަށް، އިންޓަނޭޝަނަލް ކޯޓުތަކުގެ އަމުރު ވަކި މީހަލު އިސްތިސްނާ ނުކޮށް އަޅުގަނޑުމެން ތަންފީޒު ކުރާނަން،" އިހުސާން ވިދާޅުވި އެވެ.
ނަތަންޔާހޫ އާއި ގަލަންޓު ހައްޔަރު ކުރަން އައިސީސީން އަމުރު ކުރީ މިމަހުގެ 21 ގަ އެވެ. އެ ދެމީހުން ހައްޔަރު ކުރަން އަމުރު ކުރީ މިދިޔަ އަހަރުގެ އޮކްޓޫބަރުން ފެށިގެން މި އަހަރުގެ މޭ މަހާ ހަމައަށް ހިންގި ލާއިންސާނީ ޖަރީމާތަކުގެ ކުށުގަ އެވެ.
އެ އަމުރު ނެރުމާއެކު، އަމުރަށް ތަބާވާނެތޯ ނުވަތަ ނޫންތޯ ސުވާލު އުފެދުނީ ހުޅަނގުގެ ބައެއް ގައުމުތަކުގެ މެދުގަ އެވެ. އިޒްރޭލުގެ އެންމެބޮޑު މަދަދުގާރު، އެމެރިކާ އާއި ޗެކް ރިޕަބްލިކުގެ އިތުރުން އާޖެންޓީނާ އާއި ހަންގޭރީ ފަދަ ގައުމުތަކުން އައިސީސީގެ އަމުރަށް ތަބާނުވާނެ ކަމަށް ބުނެ ބަޔާން ނެރުނުއިރު، ޔޫރަޕިއަން ޔޫނިއަނާއި އިޓަލީ، ނެދަލެންޑްސް އަދި ކެނެޑާ ފަދަ ގައުމުތަކުން ބުނީ އެ އަމުރު ތަންފީޒު ކުރާނެ ކަމަށެވެ.
