ޓިއުރިން (ނޮވެމްބަރު 19) - އެމެރިކާގެ ޓޭލާ ފްރިޓްޒް އަތުން ފަސޭހަކަމާ އެކު، 6-4، 6-4 އިން މޮޅުވެ، އޭޓީޕީ ފައިނަލްސްގެ ތަށި ހޯދި ފުރަތަމަ އިޓަލީ ކުޅުންތެރިޔާގެ ޝަރަފް، ދުނިޔޭގެ ރޭންކިން އެއް ވަނައިގައި އޮތް ޖަނިކް ސިނާ ހާސިލްކޮށްފި އެވެ.
އަނެއްކޮޅުން، މިއީ، އިޓަލީގައި ކުޅެގެން ސިނާ، 23، އަށް ލިބުނު އޭޓީޕީ ލެވަލް މުބާރާތެއްގެ ފުރަަތަމަ ތަށްޓެވެ.
"ވަރަށް ތަފާތު އިހުސާސެއް ކުރެވެނީ، މިއީ، އިޓަލީގައި ކުޅެގެން އަހަރެންގެ ފުރަތަމަ ޓްރޮފީ. މިއީ، އަަހަރެންގެ ކެރިއަރުގައި ވެސް ވަރަށް ހާއްސަ މުބާރާތެއް. ވަރަށް ރަނގަޅު ފެންވަރެއްގައި އަހަންނަށް ކުޅެވުނު މުބާރާތެއްގައި މި ކާމިޔާބު މި ލިބުނީ،" ސިނާ ބުންޏެވެ.
އޭޓީޕީ ފައިނަލްސްގެ ތަށި ސިނާ ހޯދާފައިވަނީ، މުބާރާތުގައި އޭނާ ކުޅުނު އެއްވެސް މެޗެއްގައި ސެޓެއް ވެސް ނުގެއްލި އެވެ. މިއީ، 1986 ވަނަ އަހަރު ލެޖެންޑަރީ ޓެނިސް ތަރި، އިވާން ލެޑްލް، ސެޓެއް ނުގެއްލި، އޭޓީޕީ ފައިނަލްސް ކާމިޔާބު ކުރި ފަހުން އެ ފަދަ ކާމިޔާބެއް ކުޅުންތެރިއަކަށް ހޯދުނު ފުރަތަމަ ފަހަރެވެ.
ބަލި ހާލަތުގެ ސަބަބުން، އޭޓީޕީ ފައިނަލްސްގެ ކުރިން އޮތް ޕެރިސް މާސްޓާސް މުބާރާތުގައި ސިނާ ނުކުޅެ އެވެ. އަދި އަނިޔާގެ ސަބަބުން، ސާބިއާގެ ތަރި، ނޮވަކް ޖޮކޮވިޗް، އޭޓީޕީ ފައިނަލްސް ނުކުޅޭތީ، މުބާރާތުގެ ކުރިން ވެސް ސިނާ އަކީ ފޭވަރިޓް ކަމަށް އޮތީ ބެލެވިފަ އެެވެ.
ސިނާ، މި ފަހަރުގެ ޓެނިސް ސީޒަން ނިންމާލާފައި މި ވަނީ، 70 މޮޅު ހޯދައިގެންނެވެ. ސިނާ ވަނީ އެންމެ ފަހުން ކުޅުނު 27 މެޗުގެ ތެރެއިން 26 މެޗުން މޮޅުވެފަ އެވެ. ބަލިވީ ޗައިނާ އޯޕަން ފައިނަލްގައި ސްޕެއިންގެ ކާލޯސް އަލްކަރާޒް އަތުންނެވެ.
ޓެނިސް ސީޒަނުގައި ސިނާ ވަނީ މި އަހަރު އަށް މުބާރާތް ކާމިޔާބުކޮށްފަ އެވެ. އޭގެ ތެރޭގައި، އަހަރުގެ ފުރަތަމަ ގްރޭންޑް ސްލޭމް އާއި އޮސްޓްރޭލިއާ އޯޕަން އާއި ފަހު ގްރޭންޑް ސްލޭމް ޔޫއެސް އޯޕަން ހިމެނެ އެވެ.
މި އަހަރުގެ މާޗް މަހު، ސިނާ ވަނީ މަނާބޭހަކަށް ދެ ފަހަރު ކުރި ޓެސްޓުން ވެސް ޕޮޒިޓިވް ވެފަ އެވެ. އެކަމަކު، އެއީ އޭނާ ގަސްދުގައި ކުރި ކަމެއް ނޫން ކަން ޔަގީންވުމުން، ކުޅުމުގެ ފުުރުސަތު ދިނީ އެވެ. ސިނާގެ މި މައްސަލަ ބެލިބެލުމުގައި އެނގިފައިވަނީ، މިއީ، ސިނާގެ ފިޒިއޯތެރަޕިސްޓް އޭނާ އަށް ދިން ބޭހެއްގައި ހިމެނުނު މާއްދާއެއް ކަމެވެ. ސިނާ ސަސްޕެންޑްކުރަން ނިންމި ނަމަވެސް، އޭނާ އެ މައްސަލައިގައި އެޕީލްކޮށް، ކުޅުުމުގެ ފުރުސަތު ހޯދީ، މައްސަލައިގެ ފުރިހަމަ ތަހުގީގެއް ކުރުމަށް ފަހު ގޮތެއް ނިމެންދެންނެވެ.
