ދޯހާ، ގަތަރު (ނޮވެމްބަރު 17) - ބައިނަލްއަގުވާމީ އެކުވެރިކަމުގެ މެޗުތަކުގައި ރޭ އަފްގާނިސްތާން އަތުން 2-0 އިން ނޭޕާލް މޮޅުވިއިރު، ފަހު ވަގުތު ލަނޑު ޖަހައި، ޔަމަަން އަތުން ސްރީ ލަންކާ އިން 1-0 އިން ވަނީ ކުރިހޯދައިފި އެެވެ.
ލަންކާގެ ކޯޗުކަމާ އަބްދުﷲ އަލް މުތައިރީ ދާއިމީ ކޮންޓްރެކްޓެއްގައި ހަވާލުވި ފަހުން އެ ޓީމު ކުޅުނު ފުރަތަމަ މެޗުގައި ޔަމަން އަތުން މޮޅުވި ގޯލު ޖެހީ މެޗުގެ 89 ވަަނަ މިނިޓްގަ އެވެ. މިއީ، އޭރިއާތެރެއަށް އައި ދިގު އެއްލުމެއްގައި ލިބުނު ފުރުސަތެއްގައި، ޖެކް ހިންގާޓް ބޮލުން ޖެހި ގޯލެކެވެ.
ކްރިސްޓަލް ޕެލަސް ޔޫތު ޓީމަށް ކުރިން ކުޅުނު ހިންގާޓަކީ އިންގްލެންޑަށް އުފަން ނަމަވެސް ލަންކާ ދަރިކޮޅަށް ނިސްބަތްވާ ކުޅުންތެރިއެކެވެ. އޭނާ ލަންކާ ޓީމަށް ކުޅެން ފެށީ، މި އަހަރުގެ މާޗް މަހުގަ އެވެ.
ނަބިން ނެޕޯންގެ ކޯޗުކަމުގައި ނޭޕާލުން މިދިޔަ ބުދަ ދުވަހު ތަޖިކިސްތާނާ ކުޅުނު މެޗުން 4-0 އިން ވަނީ ބަލިވެފަ އެވެ. އެކަމަކު، ރޭ އަފްގާނިސްތާން އަތުން މޮޅުވެ، ވަނީ ހަަމަޖެހުމެއް ހޯދައިފަ އެވެ.
އެގާރަ އަހަރު ފަހުން އަފްގާނިސްތާނާ އެކު ނުކުތް މެޗުގައި، ނޭޕާލްގެ ލަނޑުތައް ޖެހީ، ދެ ވަނަ ހާފުގެ ކުރީކޮޅުގައި ޖަންގް ކާކީގެ އިތުރުން، މެޗު ނިމެން 12 މިނިޓަށް ވެފައިވަނިކޮށް، ރޯހިތު ޗާންދް އެވެ. މިއީ، ތަޖުރިބާކާރު ކުޅުންތެރިޔާ ރޯހިތު ނޭޕާލް ޓީމަށް ޖަހައިދިން ފުރަތަމަ ގޯލެވެ.
