މޯލްޑިވްސް ޑިވެލޮޕްމަންޓު ބޭންކުގެ އޮފީސް މިރޭ ރަސްމީކޮށް ހުޅުވައިފި އެވެ.
އުމްރާނީ ތަރަައްގީއަށް ލޯނު ދޫކުރަން ހާއްސަކޮށް ހުޅުވި ޑިވެލޮޕްމަންޓު ބޭންކުގެ އޮފީސް ހުޅުވީ ކުދިި ވިޔަފާރިތަކަށް ހާއްސަކޮށް ހިންގި ބިޒްނަސް ސެންޓަރު ކޯޕަރޭޝަން (ބީސީސީ) ހުރި އިމާރާތުގަ އެވެ.
ޑިވެލޮޕްމަންޓް ބޭންކުގެ އޮފީސް ހުޅުވައިދެއްވީ ރައީސް ޑރ. މުހައްމަދު މުއިއްޒެވެ. އެ ބޭންކު އުފައްދަވަން އެމަނިކުފާނުގެ ނިންމެވީ މެއި، 2024، ގަ އެވެ. އެ ބޭންކު ހުޅުވާނެ ކަމަށް ސަރުކާރުން އެންމެ ފުރަތަމަ ބުނީ ޖުލައި މަހުގެ ތެރޭގަ އެވެ.
ޑިވެލޮޕްމަންޓު ބޭންކު ހިންގަން ބޭނުންވާ ލައިސެންސް މޯލްޑިވްސް މަނިޓަރީ އޮތޯރިޓީއިން ދޫކުރީ އޮކްޓޯބަރު 13، ގަ އެވެ. ލައިސެންސް ދޫކުރީ އަހަރެއްގެ ތެރޭގައި ބޭންކިން ހިދުމަތް ދިނުމަށް ޝަރުތު ކުރުމަށްފަހެވެ.
ސަރުކާރުގެ ސިޔާސަތުތަކާ އެއްގޮތްވާ ގޮތުގެ މަތީން، ދެމެހެއްޓެނިވި އިގްތިސާދީ އަދި އިޖުތިމާޢީ ތަރައްގީއަށް އިންވެސްޓުކުރުމާއި، އުމްރާނީ ތަރައްގީއަށް ބޭނުންވާ ފައިސާ ހޯދުމަކީ މި ބޭންކް އުފެއްދުމުގެ އަމާޒެއް ކަމަށް ސަރުކާރުން މީގެކުރިން ބުނެފައިވެ އެވެ.
އޭގެ އިތުރުން, އިތުރުން، ޕީއެސްއައިޕީ މަޝްރޫއުތަކަށް ފައިސާ ދިނުމުގައި ދިމާވާ ގޮންޖެހުންތައް ހައްލުކުރުމާއި، ރާއްޖޭގެ ބޭންކިން ނިޒާމުގައި ބޭރު ފައިސާ ބެހެއްޓުމުގެ ޝައުގުވެރިކަން އިތުރުކުރުން ހިމެނޭ ކަމަށް ވެސް ސަރުކާރުން ހާމަކޮށްފައިވެ އެވެ.
ސަރުކާރުން ބުނާ ގޮތުގައި ބޭންކިން ނިޒާމުގެ ތެރެއަށް ޑިވެލޮޕްމަންޓް ބޭންކެއް ވައްދަން ޖެހުނީ، މިހާރު އޮތް ބޭންކިން ނިޒާމުގެ ތެރެއިން ރައްޔިތުން ބޭނުންވާ ތަރައްގީ ގެނެވޭނެ ޖާގަ ނެތުމުންނެވެ. އަދި މި ބޭންކު ގާއިމުކުރެވުމުން، ތަރައްގީއަށް ބޭނުންވާ ލޯނާއި ފައިސާ ދިނުމުގަ މިހާރަށް ވުރެ މާ ލުއި ގޮތްތަކެއް ފަހިވެގެންދާނެ ކަމަށް ސަރުކާރުން ބުނެފައިވެ އެވެ.
ޑިވެލޮޕްމަންޓު ބޭންކުގެ ޗެއާޕާސަނަކަށް އައްޔަނުކޮށްފައި ވަނީ އޭޝިއާގެ ބޭންކިން ސެކްޓަރުގެ ތަޖުރިބާކާރެއް ކަމަށްވާ އަރުނީ ގުނަތިލެކެ އެވެ. އޭނާއަކީ ސްރީ ލަންކާއަށް އުފަން ސިންގަޕޫރު ރައްޔިތެކެވެ. އޭނާ ޑިގްރީއާ ހަމައަށް ކިޔެވީ ލަންކާގެ ކޮލޮމްބޯ ޔުނިވާސިޓީންނެވެ. އެއަށްފަހު މާސްޓާސް ހެދީ އެމެރިކާގެ ހާވާޑު ޔުނިވާސިޓީންނެވެ.
އެ ބޭންކުގެ ސީއީއޯއަކަށް އައްޔަނުކުރީ ނޮއެލް ގްރެގާ ޕެޓަސަން-ޖޯންސްއަކީ އިނގިރޭސިވިލާތުގެ ރައްޔިތެކެވެ. ދެކުނު އެފްރިކާގެ ކޭޕް ޓައުން ޔުނިވާސިޓީން ޑިގްރީ ފުރިހަމަ ކުރުމަށް ފަހު މާސްޓާސް ހެދީ އޮކްސްފޯޑް ޔުނިވާސިޓީންނެވެ. އޭނާއަކީ ވެސް ބޭންކިން ދާއިރާގައި 28 އަހަރު ހޭދަކޮށްފައިވާ ތަޖުރިބާކާރު ބޭންކަރެކެވެ.
