ކާރެއްގެ ތެރޭގައި ދިވެހި ފިރިހެނަކު ރަހީނުކޮށް އަނިޔާކުރި މައްސަލާގައި އިތުރު ހަތަރު މީހަކު ހައްޔަރުކޮށްފައިވާ ކަމަށް ފުލުހުން ބުނެފި އެވެ.
ހުޅުމާލެ އޯކިޑުމާ ހިނގުމުގައި ކާރެއްގެ ތެރޭގައި ދިވެހި ފިރިހެނަކު ރަހީނުކޮށް އަނިޔާ ކުރި މައްސަލައިގައި އެންމެ ފުރަތަމަ ހައްޔަރުކުރީ މާލެ، ދަފުތަރު ނަމްބަރު ރސ 9022، ތަލާލް މޫސާ، 37، އެވެ. އޭނާ ހައްޔަރުކުރިކަން ފުލުހުން މީޑިއާތަކަށް އެންގީ މިއަދު އެވެ.
މި މައްސަލައާ ގުޅިގެން އިތުރު ތަފުސީލު ދެމުން ފުލުހުން މިރޭ ބުނީ، ތޮލާލްގެ އިތުރުން ދިވެހި ހަތަރު ފިރިހެނަކު ހާދިސާ ހިނގި ސަރަހައްދުން ހައްޔަރުކޮށްފައިވާ ކަމަށެވެ.
އިތުރަށް ހައްޔަރުކުރީ
- ހދ. ކުމުންދޫ، ރަތްބަގީޗާގެ، ހުސާމް އިބްރާހިމް، 34،
- ގ. ކަޅަގާރިމާގެ، މާލެ، ހުސެއިން ހައިކަލް ނިޔާޒު، 23،
- ހދ. ކުމުންދޫ، ރަތްބަގީޗާގެ، އާދަމް ޝަރީފު، 36،
- ހުޅުމާލެ ފުލެޓު 04-1-71، އަހުމަދު ރިޝްފާން، 26،
ތޮލާލު ހިމެނޭހެން މި ފަސް މީހުންގެ ބަންދަށް ހުޅުމާލެ މެޖިސްޓްރޭޓް ކޯޓުން ހަތް ދުވަސް ޖަހާފައިވާ ކަމަށްވެސް ފުލުހުން ބުންޏެވެ.
މި މައްސަލާގައި ރަހީނުކުރި މީހާ އެމީހާއަށް ބިރުދައްކައި އޭނާގެ އާއިލާއަށް ގުޅައި ފައިސާއަށް ތަލާލު ޑިމާންޑު ކުރި ކަމަށް ފުލުހުން މިއަދު ބުންޏެވެ. ނަމަވެސް އެ މީހާއަށް ލިބިފައިވަ އަނިޔާގެ ތަފުސީލެއް އަދި ނުދެ އެވެ.
މައްސަލަ އިތުރަށް ތަހުގީކުރަމުންދާ ކަމަށް މިރޭވެސް ފުލުހުން ބުންޏެވެ.
