މެޑްރިޑް (ނޮވެމްބަރު 11) - ސްޕެނިޝް ލީގުގައި ރޭ އަނިޔާގެ ސަބަބުން ބާސެލޯނާ އިން ލަމީން ޔަމާލް ނުލައި ކުޅުނު މެޗުގައި ރެއާލް ސޮސިއެޑާޑް އަތުން 1-0 އިން ބަލިވެއްޖެ އެވެ.
ޗެމްޕިއަންސް ލީގުގައި އެންމެ ފަހުން ރެޑްސްޓާ އަތުން މޮޅުވި މެޗުގައި 17 އަހަރުގެ ޔަމާލަށް ލިބުނު އަނިޔާއާ ހެދި އޭނާ ނުލައި ކުޅެން ޖެހުމުން، ރޭގެ މެޗުގައި ބާސެލޯނާގެ އެޓޭކް ފެނުނީ އާދައިގެ ގޮތަކަށެވެ.
ބާސެލޯނާގެ ރޮބަޓް ލެވަންޑޯސްކީ ޖެހި ގޯލެއް ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލައިފައި ވެސް އޮފްސައިޑް ކަމަށް ނިންމިއިރު، ދެން، އެ ޓީމުގެ އެޓޭކްގައި ނުރައްކާތެރި ހަމަލާތަކެއް ފޮނުވާނުލެވުނެވެ.
ސޮސިއެެޑާޑުން މި މެޗުގައި ޖެހި ހަމައެކަނި ލަނޑު ކާމިޔާބުކުރީ 33 ވަނަ މިނިޓްގައި ޝެރާލްޑޯ ބެކާ އެވެ. މީގެ އިތުރުން ވެސް މި މެޗުގައި ލަނޑު ޖަހާނެ ފުރުސަތުތައް ސޮސިއެޑާޑަށް ލިބި ބޭނުުމެއް ނުކުރެވުނެވެ.
މެޗަށް ފަހު ބާސެލޯނާގެ ކޯޗު ހަންސީ ފްލިކް ބުނީ، ޓީމުން ރޭވި ގޮތަށް ގިނަ ކަންކަން ނުދިޔައިރު، މެޗުންް މޮޅުވާން ބޭނުންވާ މަސައްކަތުގެ ރޭޓު ވެސް އެ ޓީމުގެ ކިބައިން ނުފެނުނު ކަމަށެވެ. މި ހުރިހާ ކަމަކަށް ބަލާއިރު، މި ނަތީޖާއާ މެދު ކުރެވޭނެ ޝަކުވާއެއް ނެތް ކަމަށް ފްލިކް ވަނީ ބުނެފަ އެވެ.
ލީގުގެ އެއް ވަނައިގައި އޮތް ބާސެލޯނާ އަށް މި ވަގުތު ހަ ޕޮއިންޓުގެ ލީޑެއް ލިބިފައި އޮތް ކަމުގައި ވިޔަސް، މެޗު ހަމަކުރާއިރު، އެ ފަރަގު ތިން ޕޮއިންޓަށް ކުޑަވުމުގެ ފުރުސަތު އެބައޮތެވެ. ބާސެލޯނާ އަށް 13 މެޗުން 33 ޕޮއިންޓް ލިބިފައިވާއިރު، ރެއާލުން ވަނީ 12 މެޗުން 27 ޕޮއިންޓް ހޯދައިފަ އެވެ.
