ކޮލަމްބޯ (ނޮވެމްބަރު 5) - ވަގުތީ ކޯޗެއްގެ ގޮތުގައި ހުރެ، ކުވެއިތުގެ އަބްދުﷲ އަލް މުތައިރީ، ސްރީ ލަންކާ ގައުމީ ފުޓްބޯޅަ ޓީމުގައި ހުރެ ކުރި މަސައްކަތް ރަނގަޅުވުމުން، ސްރީ ލަންކާ ފުޓްބޯޅަ ފެޑެރޭޝަނުން އޭނާގެ އެއްބަސްވުން ދާއިމީކޮށްފި އެވެ.
މީގެ ތިން މަސް ކުރިން، ލަންކާއާ ހަވާލުވެހުރި، އިނގިރޭސި ކޯޗު އެންޑީ މޮރިސަން އަށް ދިމާވި އަނިޔާގެ މައްސަލައަކާ ހުރެ، އޭނާ ސާޖަރީއެއް ހަދަން ޖެހުމުން އޭނާ ވަނީ ބްރޭކެއް ނަގައިފަ އެވެ. އެ މުއްދަތާ ދިމާވީ، އޭޝިއަން ކަޕް ކޮލިފައިން ޕްލޭއޮފްގައި ލަންކާ އާއި ކެމްބޯޑިއާ މެޗު ތާވަލުކުރި ދުވަސްވަރަށެވެ.
އެ ގޮތުން، އޭޝިއަން ކަޕް ކޮލިފައިން ޕްލޭއޮފް ދެ މެޗުގައި ރަނގަޅަށް ކުޅެ، މުތައިރީގެ ކޯޗު ކަމުގައި، ކެމްބޯޑިއާ އަތުން ލަންކާ މޮޅުވުމާ ގުޅިގެން، އޭނާއާ މެދު ލަންކާގެ ފުޓްބޯޅަ ފެޑެރޭޝަނުން ތިބީ ހިތްހަމަޖެހިފަ އެވެ. އަދި އެކުވެރިކަމުގެ މެޗުތަކުގައި އެންމެ ފަހުން މިޔަންމާއާ ކުޅުނު ދެ މެޗުގައި، ލަންކާ އެއް މެޗުން 0-0 އިން އެއްވަރުވެ، އަނެއް މެޗުން 2-0 އިން ބަލިވިއިރު، މި ދެ މެޗުގައި ވެސް މުތައިރީގެ އިރުޝާދުގެ ދަށުން ލަންކާ އިން ރަނގަޅަށް ކުޅުނެވެ.
ލަންކާ ފުޓްބޯޅަ ފެޑެރޭޝަނުން ނިންމީ އަންނަ އަހަރުގެ ސާފް ޗެމްޕިއަންޝިޕަށް ލަންކާ ޓީމު ތައްޔާރުކޮށް، އެ މުބާރާތުގައި ރަނގަޅު ނަތީޖާއެއް ނެރުމުގެ ޓާގެޓެކެވެ. މިދިޔަ އަހަރު ބޭއްވި ސާފް ޗެމްޕިއަންޝިޕްގައި ލަންކާ އަށް ނުކުޅެވުނީ ފީފާގެ ސަސްޕެންޝަނެއްގައި އޮތުމުންނެވެ.
މީގެ ކުރިން، މުތައިރީ ވަނީ 2021 ވަނަ އަހަރު މާލޭގައި ބޭއްވި ސާފް ޗެމްޕިއަންޝިޕްގެ ފައިނަލަށް ނޭޕާލް ގެންގޮސްދީފަ އެވެ. މިއީ ނޭޕާލުން ސާފް ސީނިއާ ފުޓްބޯޅަ މުބާރާތުގެ ފައިނަލުގައި ކުޅުުނު ހަމައެކަނި ފަހަރެވެ.
މުތައިރީ އަކީ އޭޝިއާގެ ފުޓްބޯޅައިގައި ތަޖުރިބާ ހުރި ކޯޗެކެވެ. ކިރްގިސްތާންގެ 17 އަހަރުން ދަށުގެ ޓީމަށް ވެސް ކޯޗުކޮށްދިން މުތައިރީ، ނޭޕާލް ކޯޗުކަން، 2022 ވަނަ އަހަރު ދޫކޮށްލުމަށް ފަހު، ދެން، މުތައިރީ ފެނުނީ އަފްގާނިސްތާންގެ ކޯޗުގެ މަގާމުންނެވެ. މިދިޔަ އަހަރު، އެކުވެރިކަމުގެ މެޗެއްގައި އަފްގާނިސްތާނުން ބަންގްލަދޭޝާ ކުޅެމުން، މުތައިރީ އާއި ބަންގްލަދޭޝްގެ ކޯޗިން ސްޓާފުންނާ ދެމެދު މައްސަލަތަކެއް ޖެހުނެވެ. އޭގެ ސަބަބުން، ފަހުން އަފްގާނިސްތާނުން ވަނީ މުތައިރީގެ އެއްބަސްވުން ނިމުމަކަށް ގެނެސްފަ އެވެ.
