މިިހާރު ކުރިއަށްދާ ވޮލީބޯލް އެސޯސިއޭޝަން ކަޕްގެ ފިރިހެން ޑިވިޝަނުގެ ފައިނަލުގެ ފުރަތަމަ ޖާގަ ދިވެހި ސިފައިންގެ ކްލަބުން ހޯދިއިރު، ތިން ވަނަ ސެމީގައި ކްލަބް އެޗްޑީސީ އާއި ސްޕޯޓްސް ކްލަބް ސިޓީ ބައްދަލުކުރަން ޖެހިއްޖެ އެވެ.
މުބާރާތުގައި ރޭ ކުޅުނު ސެމީ ފައިނަލް ދެ ވަނަ މެޗުގައި ވާދަކުރީ ދެ ގްރޫޕްގެ އެއް ވަނަ އެވެ. އެ މެޗުން ސިޓީ އަތުން ސިފައިން މޮޅުވީ 3-0 އިންނެވެ. ސެޓުތައް ސިފައިންގެ ޓީމުން ގެންދިޔައީ 25-20، 28-26 އަދި 25-23 އިންނެވެ. މެޗުގެ މޮޅު ކުޅުންތެރިއަކީ ސިފައިންގެ ޓީމުގެ ޗިރާގު އެވެ.
ދެ ވަނަ ސެމީން ބަލިވި ސިޓީން ތިން ވަނަ ސެމީގައި މިރޭ ކުޅޭނީ ފުރަތަމަ ސެމީން މޮޅުވި އެޗްޑީސީއާ ދެކޮޅަށެވެ. އެޗްޑީސީން ވަނީ ފުރަތަމަ ސެމީގައި ފަސޭހަކަމާ އެކު، ޕޮލިސް ކްލަބްގެ އަތުން 3-0 އިން މޮޅުވެފަ އެވެ.
މި މެޗުގެ ސެޓުތައް އެޗްޑީސީން ގެންދިޔައީ 25-20، 25-17 އަދި 25-23 އިންނެވެ. މެޗުގެ މޮޅު ކުޅުންތެރިއަކީ އެޗްޑީސީގެ ޒަންޓެމިރު އޫލޫ އެވެ.
މިރޭ ކުޅޭ ތިން ވަނަ ސެމީން މޮޅުވާ ޓީމެއް ފައިނަލުގައި ސިފައިންނާ ދެކޮޅަށް ކުޅޭނީ ހޯމަ ދުވަހުގެ ރޭގަ އެވެ.
ވޮލީބޯލް އެސޯސިއޭޝަން ކަޕްގެ ފިރިހެން ޑިވިޝަންގައި މުޅިން އަލަށް ވާދަކޮށް ޗެމްޕިއަންކަން ހޯދި ސިޓީ ސްޕޯޓްސް ކުލަބް މި ފަހަރު ވަނީ ގްރޫޕް ސްޓޭޖުން ކަޓައިފަ އެވެ. އެ ޓީމުން އެންމެ ފަހުން ބޭއްވި އެސޯސިއޭޝަން ކަޕްގެ ޗެމްޕިއަންކަން ހޯދީ ފައިނަލުގައި ސީދާ ތިން ސެޓުން، ކުލަބް ވެމްކޯ ބަލިކޮށްފަ އެވެ.
