މިނިވަން މުއައްސަސާތަކަށް ސަރުކާރުން ބިރު ދެއްކުން ހުއްޓާލަން ޖެހޭ ކަމަށް އިދިކޮޅު މައި ޕާޓީ އެމްޑީޕީގެ ރައީސް އަބްދުﷲ ޝާހިދު މިއަދު ވިދާޅުވެއްޖެ އެވެ.
"އެކްސް" ގައި ކުރެއްވި ޕޯސްޓެއްގައި ޝާހިދު ވިދާޅުވީ މީޑިއާގެ މިނިވަންކަމާއި، މީޑިއާ ރެގިއުލޭޓްކުރުމަށް މަތިކޮށްފައިވާ މީޑިއާ ކައުންސިލްގެ މުސްތަގިއްލުކަމާ ދެކޮޅަށް ސަރުކާރުން ހިންގާ އަމަލުތައް ހުއްޓާލަންޖެހޭ ކަމަށެވެ.
ޝާހިދު އެގޮތަށް ވިދާޅުވީ މީޑިއާ ކައުންސިލުގެ ރައީސް އަހުމަދު މުސްތަފާ ޕީއެސްއެމްއިން ވަކި ކުރި ކުރުމަށް އަމާޒުކޮށެވެ. އޭނާ ވަކި ކުރީ "އަދަދު" އިން ހެދި ތަހުގީގީ ޑޮކިއުމެންޓަރީ "ޖީ ސްކީލާން" އަށް އިނާމު ލިބުނު މަންޒަރު ޕީއެސްއެމް އިން ލައިވް ކުރުމުންނެބވެ.
މިގޮތުން، ޝާހިދު ވިދާޅުވީ މީޑިއާ ކައުންސިލް ޕީއެސްއެމްއިން ވަކި ކުރުމަކީ ބަލައިގަނެވޭނެ ކަމެއް ނޫން ކަމަށާއި ސަރުކާރުގެ ނާގާބިލުކަމާއި އަނިޔާވެރިކަން ދުވަހަކަށްވުރެ ދުވަހެއް އިތުރުވަމުންދާ ކަމަށެވެ.
ޕީއެސްއެމް އިން ވަކި ކުރިއިރު، މުސްތަފާ ހުންނެވީ ނިއުސް އޮޕަރޭޝަންސް މެނޭޖަރުގެ މަގާމުގަ އެވެ. އިއްޔެ ވަޒީފާއިން ވަކި ކުރިއިރު، ޕީއެސްއެމްގައި އޭނާ 30 އަހަރު ވަނީ ހިދުމަތްކޮށްދީފަ އެވެ.
"ޖީ ސްކީލާން" އަކީ މިހާރުގެ ރައީސް ޑރ. މުހައްމަދު މުއިއްޒުގެ ބައްޕާފުޅު އަވަހާރަވި ފަހުން ބައްޕާފުޅުގެ އަނބިކަނބަލުން މާލެ ވަޑައިގަތުމަށް މަސައްކަތް ކުރުމުން ރާއްޖެ ނާރުވައި ޑީޕޯޓްކޮށްލި މައްސަލައަށް ތައްޔާރުކޮށްފައިވާ ތަހުގީގީ ޑޮކިއުމެންޓަރީއެކެވެ.
