ރިޔާސީ އިންތިހާބުގައި މިއަދުގެ ސަރުކާރުން ވީ ވައުދުތަކަކީ ހިސާބެއް ކިތާބެއް ދުނިޔަވީ ހަގީގަތެއް، ހެޔޮ ލަފާ އިންސާނުން ކަންކުރާ ގޮތް ނުބަލައި ހަމައެކަނި އަދާވާތްތެރިވެ، ކޮންމެ ހާލެއްގަ ވެސް ވެރިކަމުގެ ބާރު ހޯދަން ދެއްކީ ދޮގުވެރި މަކަރުވެރި "މެއްކިއަވެލިއަން" ވާހަކަތަކެއް ކަމާއި އެކަމުގެ އަގު އަދާކުރަން މި ޖެހެނީ ދިވެހި ރައްޔިތުން ކަމަށް ކުރީގެ އެޓާނީ ޖެނެރަލް ޑރ. އަހުމަދު އަލީ ސަވާދު ވިދާޅުވެއްޖެ އެވެ.
ރާއްޖޭން ބޭރުގައި ދިރިއުޅުއްވަމުން ގެންދަވާ ސަވާދަކީ ރައީސް ޑރ. މުހައްމަދު މުއިއްޒުގެ ޓްރޭޑް އެންޑް އިންވެސްޓްމަންޓް އެޑްވައިޒަރު މުހައްމަދު އަލީ ޖަނާހުގެ ކޮއްކޮ އެވެ.
އެޓާނީ ޖެނެރަލް ކަމާއި ޓޫރިޒަމް މިނިސްރުކަން އޭނާ ކުރެއްވީ ކުރީގެ ރައީސް މުހައްމަދު ނަޝީދުގެ ވެރިކަމުގަ އެވެ.
މި ސަރުކާރަށް އަމާޒު ކުރައްވައި ސަވާދު ރޭ އެކްސްގައި ލިޔުއްވީ އިންޑިއާ ގުޅޭ ކަންކަމުގައި ރައީސް މުއިއްޒު ގެންގެވި "ޔޫ ޓާން"އަށް މީހުން ފާޑުކިޔަމުން ދަނިކޮށެވެ.
ރައީސް މުއިއްޒާއި އެ މަނިކުފާނުގެ ސަރުކާރުގެ ވެރިން، އިދިކޮޅުގައި ތިއްބެވިއިރު އިންޑިއާ އަށް އިންތިހާ އަށް ކުޑައިމީސްކޮށް ވާހަކަތަކާއި މަލާމާތުގެ ކުރެހުންތައް ހަދާފައި ވާއިރު، އަދި އެމްޑީޕީ އާއި އިންޑިއާގެ ބީޖޭޕީ އާއި ގުޅިވައިގެން ގިނަ ވާހަކަތައް ފެތުރި އެވެ. އިންޑިއާއާއެކު ވެފައިވާ އެއްބަސްވުންތަކަކީ ރާއްޖޭގެ އިސްތިގުލާލަށް ހުރި ނުރައްކަލެއް ކަމާއި، އިންޑިއާއިން އުޅެނީ ރާއްޖެ އަޅުވެތިކުރަންކަމަށް ބުނަމުން ދިޔަ އެވެ.
ރައީސް މުއިއްޒުގެ ސަރުކާރުގެ ވެރިން އިސްވެ ތިބެ އޭރު "އިންޑިއާ އައުޓު" ނަމުގައި ކެމްޕޭނު ހިންގާފައި ވާއިރު، ވެރިކަން ލިބުމުން ދެ ގައުމުގެ ގުޅުން ބަދަހިކުރަން މަސައްކަތް ކޮށް، ކުރިން ގޯސްވި އެއްބަސްވުންތައް ދަމަހައްޓައި އާ އެއްބަސްވުންތައް ވެސް ވަނީ ހަދައިފަ އެވެ.
އެކަންކަމަށް އިޝާރާތް ކުރައްވައި ސަވާދު ވިދާޅުވީ ދެއްކި ވާހަކަޔާ ކަންކުރާ ގޮތާ ދިމާނުވީމަ އެއީ ދޮގު މަކަރުވެރި ހުސް ބަސްތަކަކަށް މެނުވީ ނުވާނެ ކަމަށެވެ.
"ހަދާހާ ދޮގަކާ މަކަރެއްގެ އަގު އަދާކުރަންޖެހެނީ ދިވެހި ރައްޔިތުން. ވިސްނަންތިބީވެސް ރައްޔިތުން. ހަދާ ދޮގުތަކަށް ރައްދުދީ ހައްގު ގާއިމްކުރަންވެސް ތިބީ ރައްޔިތުން،" ސަވާދު ވިދާޅުވި އެވެ.
އެފަދަ ކަންކަމަކީ މެއްކިއަވެލިއަން ފިކުރު ކަމަށް ސަވާދު ވިދާޅުވި އެވެ. އެއީ ކޮންމެ އެއްޗެއް ކިޔައިގެންވެސް، ކޮންމެ ކަމެއް ކޮށްގެންވެސް ސިޔާސީ ބާރު ހޯދުން ކަމަށާއި އެއީ ދޮގާ މަކަރާ ހީލަތާ އޮޅުވާލުމާ ވައްކަމުން މީސްތަކުންގެ މައްޗަށް ގަދަވެގަތުން ކަމަށް އޭނާ ވިދާޅުވި އެވެ.
އެއީ އިސްލާމީ ތަހުޒީބާ އަހުލާގާ ހިލާފު އަދަބު އަހުލާގުގެ ހަމަތަކުން ބޭރު ސިޔާސީ ފިކުރެއް ކަމަށް ވެސް ސަވާދު ވިދާޅުވި އެވެ.
ރިޔާސީ އިންތިހާބުގައި ރައީސް މުއިއްޒު ވެވަޑައިގެންނެވި އެންމެ ބޮޑު ވައުދަކީ ރާއްޖޭގައި ގާއިމުވެފައިވާ އިންޑިއާގެ އަސްކަރިއްޔާ ފޮނުވައިލުމެވެ. ނަމަވެސް ރާއްޖޭގައި އޮތް އިންޑިއާ ދެ ހެލިކޮޕްޓަރާއި މަތިންދާ ބޯޓު ރައީސް މުއިއްޒު ފޮނުވައި ނުލަ އެވެ.
އިންޑިއާ ސަރުކާރާއެކު މަޝްވަރާ ކުރުމަށް ފަހު، އެ އުޅަނދުތައް ދުއްވަން ކުރިން ތިބި އިންޑިއާ ސިފައިންގެ ބަދަލުގައި އިންޑިއާގެ އަސްކަރިއްޔާގެ ދަށުގައި އޮތް ހިންދުސްތާން އޭރޮނެޓިކްސް ކުންފުނީގެ އެއްބަސްވުމުގައި ތިބި ބަޔަކު ގެނައުމަކީ ރިޔާސީ އިންތިހާބުގައިވި ވައުދު ފުއްދުން ކަމަށް މި ސަރުކާރުން، އަދި ރައީސް މުއިއްޒު ވެސް ގަބޫލުކުރައްވަ އެވެ.
ނަމަވެސް އެއީ ވީ ވައުދު ފުއްދުން ނޫން ކަމަށް ގިނަ ބަޔަކު ދަނީ ބުނަމުންނެވެ.
