މިއަދު މެންދުރު ގއ. ދެއްވަދޫއަށް ދިޔަ ފިޝަރީޒް މިނިސްޓްރީގެ ޓީމެއް އެ ރަށުން ބޭރުކޮށްލައިފި އެވެ.
ދެއްވަދޫއިން މި ނޫހާ ވާހަކަ ދެއްކި މަސްވެރިއަކު ބުނީ މަސް ފިނި ކުރާ އާރްއޯ ޕްލާންޓާ ގުޅޭ މައުލޫމާތު ދޭން ދިޔަ ފިޝަރީޒް މިނިސްޓްރީގެ ހަ މީހުން ހިމެނޭ ޓީމު ރަށުން ބޭރުކޮށްލީ މަސްވެރިން ނުކުމެ ކަމަށެވެ.
"އަހަރުމެން މެންދުރު ނަމާދަށް ތިއްބާ ވަގަށް އެ ޓީމުން އެރީ. އެކަމަކު މަސްވެރިން ނުކުމެ އެމީހުން ބޭރުކޮށްލައިފި. މިހާރު ގޮސްފި،" އޭނާ ބުންޏެވެ.
މި ނޫހާ ވާހަކަ ދެއްކި މަސްވެރިޔާ ބުނީ މަސްވެރިންގެ މައްސަލައަކީ މިފްކޯއަށް ވިއްކި މަހަށް ފައިސާ ނުލިބުމެވެ. މަސް ގަތުމަށްފަހު ގިނަވެގެން ދެ ހަފުތާގެ ތެރޭގައި އިސާ ދިނުމަކީ ސަރުކާރުގެ ވައުދެކެވެ.
"ބާނާފައި ހުރި މަހަށް ފައިސާއެއް ނުލިބޭ. އަހަރުމެންނަށް އެބައިން ފަސް ބިލަށްވާ ފައިސާ ނުލިބި. އެއީ ގާތްގަނޑަށް އެންމެ ދޮޅު ލައްކަ ރުފިޔާ،" އޭނާ ބުންޏެވެ.
ފިޝަރީޒް މިނިސްޓްރީގެ ޓީމު އިއްޔެ ވެސް ދެއްވަދޫއަށް އަރަން މަސައްކަތް ކުރި އެވެ. ނަމަވެސް މަސްވެރިން ބަނދަރުމައްޗަށް ނުކުމެ، ވަނީ އެމީހުން ހުއްޓުވައިފަ އެވެ. ހަމަ އެ ޓީމުން ގއ. ދާންދޫއަށް ވެސް އަރަން ބުރާސްފަތި ދުވަހު މަސައްކަތް ކުރި އެވެ. އެކަމަކު ދާންދޫއަށް ވެސް އެރިޔަ ނުދީ، މަސްވެރިން ވަނީ އެ ޓީމު ރަށުން ބޭރުކޮށްލައިފަ އެވެ.
މަސްވެރިންނަށް ދޭން ޖެހޭ ފައިސާ ދޫނުކުރާތީ މީގެ ކުރިން މަސްވެރިން މުޒާހަރާ ކުރުމުން، ސަރުކާރަށް ޕްރެޝަރު ބޮޑުވެގެން އެއްފަހަރާ ހުރިހާ ފައިސާ ދޫކުރި އެވެ. މަސްވެރިންނަށް ސަރުކާރުން ދޭ ފައިސާތައް ލަސްވެގެން ދެ ހަފުތާ ތެރޭގައި ޖަމާކޮށްދޭނެ ކަމަށް ސަރުކާރުން އޭރު ބުނި ނަމަވެސް، ފައިސާ ދޫނުކޮށް މިހާރު ދެ މަސްވަރު ވެފައިވާ ކަމަށް މަސްވެރިން ބުންޏެވެ.
