ވޭޕާ ގުޅޭ ކަންބޮޑުވުންތަކާ މެދު މަޝްވަރާކުރަން އަތޮޅުތެރޭގެ ސްކޫލްތަކުގެ އިސްވެރިންނާއި ޕީޓީއޭއާއެކު މިނިސްޓްރީން މަޝްވަރާ ބައްދަލުވުމެއް މިއަދު ބާއްވައިފި އެވެ.
އެޑިއުކޭޝަނުން ބުނި ގޮތުގައި މިއަދު ބޭއްވީ ވޭޕް ކުރުމުގެ ނުރަނގަޅު އާދައާ މެދުގައި ހުރި ކަންބޮޑުވުންތަކާ ގުޅޭގޮތުން އެ ނިސްޓްރީން އޮންލައިންކޮށް ކުރިއަށް ގެންދާ ބައްދަލުވުންތަކުގެ ތެރެއިން ބައްދަލުވުމެކެވެ.
ވޭޕުން ލިބޭ ގެއްލުމުގެ މައުލޫމާތު މިއަދުގެ ބައްދަލުވުމުގައި ސްކޫލްތަކުގެ ވެރިންނާއި ޕީޓީއޭ މެންބަރުންނަށް ދެއްވީ ޑރ.މުހައްމަދު އަލީ އެވެ.
ރާއްޖޭގައި ވޭޕް މަނާ ކުރަން ސިއްހަތާ ބެހޭ ޖަމިއްޔާއަކުން ގޮވާލާފައި އޮއްވައި، ދުންފަތުގެ ހުރިހާ ބާވަތްތަކެއް މަނާ ކުރަން މޯލްޑިވިއަން މެޑިކަލް އެސޯސިއޭޝަން (އެމްއެމްއޭ) އިން ވެސް ވަނީ ގޮވައިލައިފަ އެވެ.
ގައިން ގަޔަށް ނާރާ ބަލިތަކާ ދެކޮޅަށް މަސައްކަތްކުރާ ބައެއް ޖަމިއްޔާތަކުން އުފައްދާފައިވާ އެންސީޑީ އެލަޔަންސްއިން ވެސް ވަނީ ވޭޕް މަނާކުރަން މީގެ ކުރިން ގޮވާލައިފަ އެވެ.
ސިނގިރޭޓުގެ ބަދަލުގައި ސިއްހަތަށް ގެއްލުން ކުޑަ އެއްޗެއްގެ ގޮތުގައި ވޭޕު އެތެެރެކުރި ކަމުގައިވި ނަމަވެސް ދިރާސާތަކުން އެއީ ސިއްހަތަށް ގެއްލުންހުރި އެއްޗެއްކަމަށް ދައްކާ ކަމަށާއި އޭގައި ހިމެނޭ މެންތަލް އާއި ސިނަމަން ފަދަ ފްލޭވާތަކަކީ ޒުވާން ޖީލު މިކަމަށް ދެވިހިފުމަށް ބޭނުންކުރާ އުކުޅެއް ކަމަށް އެމްއެމްއޭގެ ނޫސްބަޔާނުގައިވެ އެވެ.
އަންނަ ޑިސެމްބަރުން ފެށިގެން ސިނގިރޭޓަކުން ނަގަމުން އަންނަ އިމްޕޯޓް ޑިއުޓީއިން 2ރ. ބޮޑުކޮށް އިލެކްޓްރޯނިކް ސިނގިރޭޓާއި ވޭޭޕް ކުރުމަށް ބޭނުންކުރާ އާލާތްތަކާއި އޭގެ ބައިބައިން އިމްޕޯޓް ޑިއުޓީ ނަގަމުންދާ ރޭޓު 200 ޕަސެންޓަށް ބޮޑު ކުރަން ސަރުކާރުން ވަނީ ނިންމައިފަ އެވެ.
