އެމަނިކުފާނުގެ ތަސައްވުރަކީ 2040 ވަނަ އަހަރު އަންނައިރު ރާއްޖެއަކީ ފުރިހަމައަށް ތަރައްގީވެފައި އޮތް ގައުމަކަށް ހެދުން ކަމަށް އދ. 79 ވަނަ އާންމު މަޖިލީހުގެ ބަހުސްގައި ތަގުރީރު ކުރައްވަމުން މިރޭ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް މުއިއްޒު ދެއްވި ތަގުރީރުގައި ދިވެހިރާއްޖެއާމެދު އެމަނިކުފާނު ގެންގުޅުއްވާ ވިޝަން ހިއްސާ ކުރައްވަމުން ވިދާޅުވީ، 2040 އަންނަންވާއިރަށް ތަރައްގީވެފައި އޮތް ކަމަށް ރާއްޖެ ހެދުމަކީ ބޮޑު މަސައްކަތެއް ކަމަށް ހީވި ނަމަވެސް، ދަތި އުނދަގޫ ކިތަންމެ ކަމެއް ރާއްޖޭގެ ތާރީހުގައި ހާސިލުކޮށްފައިވާ ކަމަށެވެ.
"ދިވެހިރާއްޖެ ތަރައްގީވެފައި އޮތް ގައުމަކަށް ހެދުމަކީ ބުރަ، އުނދަގޫ އަދި ދުރު މުސްތަގުބަލެއްގައި ނޫނީ ނުވާނެ މަސައްކަތެއް ކަމަށް ހީވި ނަމަވެސް އަމާޒެއް ފެނި، ޕްލޭނެއް އޮތިއްޔާ އެއީ ހާސިލު ކުރެވޭނެ ނަތީޖާއެއް. ދަތިތަކުން އަރައިގަނެ، ކުރި ހޯދުމަކީ ދިވެހިންނަށް އާ ކަމެއް ނޫން،" ރައީސް ވިދާޅުވި އެވެ.
ރާއްޖެއަށް 1965 ވަނަ އަހަރު މިނިވަންކަން ލިބުނު އިރުގެ ހާލަތާއި މިވަގުތުގެ ހާލަތާ ހާސްބައި ތަފާތުކަން ފާހަގަ ކުރައްވަމުން ރައީސް ވިދާޅުވީ، ކުރު މުއްދަތެއްގެ ތެރޭގައި މިޑްލް-އިންކަމް ފެންވަރުގެ ގައުމެއްގެ ދަރަޖަ ހާސިލުވެފައިވާތީ ރާއްޖެއިން ފަހުރުވެރިވާ ކަމަށެވެ.
"1965 ވަނަ އަހަރު މިނިވަންކަން ލިބުނުއިރު ދުނިޔޭގެ އެންމެ ފަގީރު ގައުމުތަކުގެ ތެރޭގައި ރާއްޖެ ހިމެނޭ. ރާއްޖޭގެ އާބާދީގެ ތިން ބައިކުޅަ އެއް ބަޔަށް އެއިރު ލިޔަންކިޔާކަށް ނޭނގޭ. ކޮންމެ 10 ތުއްތު ކުއްޖަކުން އެއް ކުއްޖަކަށް ވުރެ ގިނައިން އޭނާގެ ފުރަތަމަ އުފަންދުވަހުގެ ކުރިން ދިޔައީ މަރުވަމުން. އެއިރުގައި އެއްވެސް އިންޑަސްޓްރީއެއް ނެތް، އެކްސްޕޯޓު ކުރަނީ މަދު އެތިކޮޅެއް އަދި ފައިސާ ލިބޭނެ އޮތީ މަދު ގޮތްތަކެއް،" ރައީސް ވިދާޅުވި އެވެ.
ރައީސް ވިދާޅުވީ 2040 އަންނަންވާއިރު ރާއްޖެއަކީ ދުނިޔޭގެ ފެންވަރުގައި ވެސް ފާހަގަކޮށްލެވޭ ގައުމަކަށް ހެދުމަށް އެމަނިކުފާނު ބޭނުންވެވަޑައިގަންނަވާ ކަމަށެވެ.
"[ބޭނުންވަނީ] ރާއްޖެއަކީ އެހެން ގައުމުތަކުގެ އިހްތިރާމް ލިބިފައިވާ، ރިލެވަންޓު، ދިމާވާ މައްސަލަތަކާ ކުރިމަތިލުމުގެ ގާބިލުކަން ލިބިފައިވާ ގައުމަކަށްވުމަށް. [ބޭނުންވަނީ] އިންސާފުވެރި އަދި އެންމެންގެ ބައިވެރިވުން ލިބޭ މުޖްތަމައެއް ބިނާ ކުރަން،" ރައީސް ވިދާޅުވި އެވެ.
ރައީސް ދިވެހިރާއްޖެއާ މެދު ގެންގުޅުއްވާ ތަސައްވުރު ހިއްސާ ކުރައްވަމުން އެމަނިކުފާނު އިތުރަށް ވިދާޅުވީ ރާއްޖޭގެ ހައުސިން މައްސަލަ އެއްކޮށް ހައްލުކޮށް، ޓުއަރިޒަމް ފުޅާކޮށް މިހާރަށް ވުރެ ބޮޑަށް ތަރައްގީ ކުރުމަކީ އެމަނިކުފާނުގެ އަމާޒެއް ކަމަށެވެ.
އޭގެ އިތުރުން، އިޒްރޭލުން ގާޒާގައި ހިންގާ ނަސްލުހޭދު ކުރުން ކުށްވެރި ކުރައްވައި، އެކަން ހުއްޓުވުމުގެ މަސައްކަތް ދުނިޔެއިން ކުރަންޖެހޭނެ ކަމަށް ވެސް ރައީސްގެ ތަގުރީރުގައި މިރޭ ވިދާޅުވި އެވެ. އަދި ވިދާާޅުވީ އިޒްރޭލުން ހިންގާފައިވާ އަދި ހިންގަމުންދާ ކުށްތަކަށް ޖަވާބުދާރީކޮށް އެކަށީގެންވާ އަދަބު ދޭންޖެހޭ ކަމަށެވެ.
