މާލެ އަތޮޅު ފިނޮޅަކަށް ދަތުރު ގޮސް އުޅެނިކޮށް ގެއްލުނު މއ. އަސަރީ ހަނދާން، މުހައްމަދު ތަސްލީމް 43އ. ހޯދުމަށްޓަކައި އިންޓަޕޯލް ޔެލޯ ނޯޓިސްއަކަށް އެދިފައިވާ ކަމަށް ފުލުހުން ބުނެފި އެވެ.
ފުލުހުންގެ އިދާރާއިން ދެންމެ ނެރުނު ނޫސް ބަޔާނެއްގައި ބުނީ ތަސްލީމް ހޯދުމަށްޓަކައި ފުލުހުންނާއި އެމްއެންޑީއެފްގެ ޑައިވް ޓީމުތަކުން އެ ފިނޮޅުގެ މޫދާއި ވަށައިގެންވާ ކަނޑުގެ ސަރަހައްދު ހިމެނޭހެން ތިން ދުވަސް މަތިން ޖުމުލަ 943،998 އަކަ ކިލޯމީޓަރުގެ ސަރަހައްދެއް ޑައިވްކޮށްގެން ބަލާފައިވާ ކަމަށެވެ.
ތަސްލީމު ހޯދުމަށްޓަކައި އޭނާ އާއެކު ފިނޮޅަށް ދަތުރުދިޔަ މީހުންގެ އިތުރުން އެތަނަށް ދަތުރުދިޔަ އެހެން ގުރޫޕެއްގައި ހިމެނޭ 12 މީހުންނާ ވެސް ސުވާލު ކޮށްފައިވާ ކަމަށް ފުލުހުން ބުންޏެވެ. އަދި، ތަހުގީގު ބޭނުމަށް ތަސްލީމުގެ ފޯނާއި ލެޕްޓޮޕު ފުލުހުންގެ ބެލުމުގެ ދަށަށް ގެންގޮސް ތަހުލީލު ކުރަމުންދާ ކަމަށް ފުލުހުން ބުންޏެވެ.
އޭގެއިތުރުން އެ ފަސްގަނޑަށް ދަތުރު ދިޔުމަށް ތަސްލީމު އާއި އިތުރު ބަޔަކު ބޭނުން ކުރި ދެ ލޯންޗު ބަލައި ފާސްކޮށްފައިވާ ކަމަށް ފުލުހުން ބުންޏެވެ.
ފުލުހުން ބުނީ ކ. ހުވަފެންފުށީގެ ދެކުނުން ހިއްކާފައި އޮތް ފަސްގަނޑަށް މިދިޔަ އޯގަސްޓު 29، ގެ ހަވީރު 5:00 ހާއިރު ތަސްލީމުއާ އެކު 25 މީހުންނާއި ދެ ކުޑަކުދިން ދަތުރު ދިޔަކަން ތަހުގީގަށް މިހައިތަނަށް ލިބުނު މައުލޫމާތުން އެނގޭ ކަމަށެވެ. އެމީހުން އެ ދަތުރު ދިޔައީ މީހެއްގެ އުފަންދުވަސް ފާހަގަ ކުރުމަށާއި އެންގޭޖުމެންޓު ޕާޓީއަކަށް ކަމަށް ވެސް ފުލުހުން ބުނެފައިވެ އެވެ.
ދަތުރުގައި ތަސްލީމު ބައިވެރިވީ އެ ޕާޓީގެ ބެކްޑްރޮޕް ހަދައި ދިނުމާއި އެތަނުގެ ކަރަންޓުގެ ބައެއް މަސައްކަތްތައް ކޮށްދިނުމަށް ކަމަށް ވެސް ފުލުހުންގެ ބަޔާނުގައި ބުންޏެވެ.
ދަތުރު ދިޔަ ދުވަހުގެ ރެ އާއި ތަސްލީމު ގެއްލުނު އޯގަސްޓު 30، ގެ ހެނދުނު ވެސް ތަސްލީމު އެ ދަތުރުގެ ބައިވެރިންނާއެކު ހަރަކާތްތެރިވެފައިވާކަން ދަތުރުގެ ބައިވެރިން ނަގާފައި ހުރި ބައެއް ފޮޓޯތަކުން އެނގޭ ކަމަށް ފުލުހުން ބުންޏެވެ.
އެ ފަސްގަނޑުގައި ހުއްޓައި ތަސްލީމު އެންމެފަހުން ފެނިފައި ވަނީ އޯގަސްޓު 30، ވީ ހުކުރު ދުވަހުގެ ހެނދުނު 7:45 އާއި 9:00 އާ ދެމެދުގައި ކަމަށް ތަހުގީގަށް އެނގިފައިވާ ކަމަށް ފުލުހުންގެ ބަޔާނުގައި ބުނެފައިވެ އެވެ.
ތަސްލީމު ގެއްލުނުކަން، ދަތުރުދިޔަ މީހުންނަށް ވެސް އެނގި އޭނާ ހޯދަން ފެށީ އެދުވަހުގެ ހެނދުނު މާލެއައި ލޯންޗެއްގައި އޭނާ މާލެއަށް ފޮނުވުމަށްޓަކައި، ހޯދާ ނުފެނުމުން، އިތުރު ލޯންޗެއްގައި ތަސްލީމު މާލެއަށް ދިޔަތޯ ބަލަން، އާއިލާއަށް ގުޅުމުން ކަމަށް ދަތުރުގެ ބައިވެރިން މައުލޫމާތު ދީފައިވާ ކަމަށް ފުލުހުން ބުންޏެވެ.
ތަސްލީމު ގެއްލުމުގެ ކުރިން އޭނާ މާލެ ދާން ބޭނުންވެގެން ދަތުރު ދިޔަ މީހުންގެ ގާތު އެ ވާހަކަ ދައްކާފައިވާކަން ވެސް ތަހުގީގަށް އެނގިފައިވާ ކަމަށް ފުލުހުން ބުންޏެވެ.
ފުލުހުން ބުނީ ތަސްލީމް ގެއްލުނު ހާދިސާއާ ގުޅިގެން ކުރަމުންދާ ތަހުގީގަށް ލިބެމުންދާ ކުރިއެރުން ތަސްލީމުގެ އާއިލާއާ ހިއްސާ ކުރަމުންދާ ކަމަށެވެ.
