ނިއު ޔޯކް، ޔުނައިޓެޑް ސްޓޭޓްސް (ސެޕްޓެމްބަރު 9) - މަނާ ބޭހަށް ޕޮޒިޓިވްވި މައްސަލައެއްގެ ސަބަބުން ކުޅުމާ ދުރުގައި ހުރުމަށް ފަހު، އެނބުރި އައިސް އިޓަލީގެ ޖަނިކް ސިނާ، ޔޫއެސް އޯޕަންގެ ޗެމްޕިއަންކަން ހޯދައިފި އެެވެ.
މި އަހަރުގެ މާޗް މަހު، ސިނާ ވަނީ މަނާބޭހަކަށް ދެ ފަހަރު ކުރި ޓެސްޓުން ވެސް ޕޮޒިޓިވް ވެފަ އެވެ. އެކަމަކު، މީގެ 19 ދުވަސް ކުރިން ސިނާގެ އެ ކަންކަން ބަލައި ނިންމިއިރު، އެއީ އޭނާ ގަސްދުގައި ކުރި ކަމެއް ނޫން ކަން ޔަގީންވުމުން، ކުޅުމުގެ ފުުރުސަތު ދިނީ އެވެ. ސިނާގެ މި މައްސަލަ ބެލިބެލުމުގައި އެނގިފައިވަނީ، މިއީ، ސިނާގެ ފިޒިއޯތެރަޕިސްޓް އޭނާ އަށް ދިން ބޭހެއްގައި ހިމެނުނު މާއްދާއެއް ކަމެވެ.
ސިނާ ސަސްޕެންޑްކުރަން ނިންމި ނަމަވެސް، އޭނާ އެ މައްސަލައިގައި އެޕީލްކޮށް، ކުޅުުމުގެ ފުރުސަތު ހޯދީ، މައްސަލައިގެ ފުރިހަމަ ތަހުގީގެއް ކުރުމަށް ފަހު ގޮތެއް ނިންމަންދެނެވެ. މައްސަލަ ބަލައި ނިންމިއިރު، ސިނާގެ ކުށެއް ނެތެވެ.
މި މައްސަލައިގެ ސަބަބުން ކުޅުމުގެ ފޯމަށް ގިނަ އަސަރުތަކެއް ކުރި ނަމަވެސް، އެނބުރި އައިސް އޭނާ މި ވަނީ އަހަރުގެ ފަހު، ގްރޭންޑް ސްލޭމް ޓެނިސް މުބާރާތް ކަމަށްވާ ޔޫއެސް އޯޕަން ފުރަތަމަ ފަަހަރަށް ކާމިޔާބުކޮށްފަ އެވެ.
ފަނަރަ އަހަރު ތެރޭގައި ގްރޭންޑްސްލޭމް ފައިނަލެއްގައި ކުޅުނު ފުރަތަމަ އެމެރިކާގެ ކުޅުންތެރިޔާ، ޓޭލާ ފްރިޓްޒް އަތުން ސިނާ މޮޅުވީ، 6-3 6-4 7-5 އިންނެވެ.
ސިނާ އަކީ، 1977 ވަނަ އަހަރުގެ ގިލެރްމޭ ވިޔާސް އަށް ފަހު، އެއް ސީޒަނެއްގައި، ކެރިއަރުގެ ފުރަތަމަ ދެ ގްރޭންޑްސްލޭމް ކާމިޔާބުކުރި ފުރަތަމަ ކުޅުންތެރިޔާ އެވެ. ސިނާ މި ފަހަރު ވަނީ، އޮސްޓްރޭލިއަން އޯޕަން ވެސް ކާމިޔާބުކޮށްފަ އެވެ. އަދި ސިނާ އަކީ، ޓެނިހުގެ ދުނިޔޭގެ ރޭންކިން އެއް ވަނަ އަށް އެރި އިޓަލީގެ ފުރަތަމަ ކުޅުންތެރިޔާ އެވެ.
