މާލޭގައި މިދިޔަ ބުދަ ދުވަހުގެ ރޭ ހިނގި ނުރައްކާތެރި އެކްސިޑެންޓެއްގައި އަނިޔާވި ޒުވާނަކަށް އައިޖީއެމްއެޗް ހޮސްޕިޓަލުގައި ފަރުވާ ދެނިކޮށް ރޭ ދަންވަރު މަރުވެއްޖެ އެވެ.
އައިޖީއެމްއެޗްއިން ބުނީ މަރުވީ މުހައްމަދު ލީވާން އަބްދުލް ލަތީފް، 21، ކަމަށާއި އޭނާ މަރުވީ ވެންޓިލޭޓަރަށް ލާފައި އޮއްވައި ކަމަށެވެ.
އެ އެކްސިޑެންޓް ހިނގީ ބުދަ ދުވަހުގެ ރޭ ބޮޑުތަކުރުފާނު މަގާއި ކޮއިމަލާ ހިނގުން ގުޅޭ ކަންމަތީ ކާރަކާއި ސައިކަލެއް ޖެހިގެންނެވެ. ލީވާންއަކީ ސައިކަލު ދުއްވި މީހާ އެވެ.
މިއީ ހަތަރު ދުވަސް ތެރޭގައި އެކްސިޑެންޓެއްގައި މަރުވި ދެވަނަ ޒުވާނާ އެވެ. އެގޮތުން ބުރާސްފަތި ދުވަހުގެ ރޭ ހުޅުމާލޭގައި ކާރަކާއި ސައިކަލެއް ޖެހި ހިނގި އެކްސިޑެންޓެއްގައި ޒުވާނަކު ވަނީ މަރުވެފަ އެވެ.
މާލޭ ސިޓީގައި ހިނގާ އެކްސިޑެންޓުތައް އަންނަނީ ދުވަހަކަށްވުރެ ދުވަހެއް އިތުރު ވަމުންނެވެ.
ސަރުކާރުން ވަނީ އެކްސިޑެންޓުތައް މަދު ކުރަން ހަރުކަށި ފިޔަވަޅުތައް އަޅަން ނިންމައި، އެ ފިޔަވަޅުތައް އިއުލާން ކޮށްފަ އެވެ.
އޭގެއިތުރުން ފުލުހުން އަންނަނީ އެކްސިޑެންޓުތަކާ ގުޅޭ މައްސަލަތައް ތަހުގީގު ކުރަމުންނެވެ.
