ރާއްޖެ އާންމުކޮށް އައިސް ގޮސް އުޅޭ އިންޑިއާ ރައްޔިތެއް ކަމަށްވާ އަބްދުލް ރަގޫބު ނިސްތާރު ހަލީމް ރަހްމާން 27، މަނީ ލޯންޑަރިންގެ ތުހުމަތުގައި ހައްޔަރު ކުރުމުން ފަސް ދުވަހަށް ބަންދު ކުރުމަށް ކްރިމިނަލް ކޯޓުން އިއްޔެ އަމުރުކޮށްފި އެވެ.
އޭނާ ބަންދުކުރަން ބޭނުންވާ ވަރަށް ހެކި ފުލުހުން ހުށަހެޅިއިރު އޭނާ ބަންދުގައި ބަހައްޓަން އަމުރަކަށް ކޯޓުގައި އެ އިދާރާއިން އެދުނީ މުޖުތަމައުގެ ސަލާމަތަށް އޭނާގެ ފަރާތުން ނުރައްކަލެއް ކުރިމަތިވެދާނެ ކަމަށް ބުނެ އެވެ.
އެ މީހާ ބަންދުކުރީ ނިންމީ ޖިނާއީ ބޮޑު މައްސަލައަކަށް ތުހުމަތު ކުރެވުމުގެ އިތުރުން އޭނާ އަތުން ފެނުނު ފައިސާއަކީ ކޮން ފައިސާއެއްކަން ސާފުކޮށްދީފައި ނުވާތީ ކަމަށެވެ. އަދި އޭނާގެ ދަތުރުފަތުރުގެ ތާރީހަށް ބަލާއިރު ވެސް ޝައްކުވާ ފަދަ އަމަލުތަކެއް ހުރުމުންނެވެ.
ފުލުހުން ކޯޓަށް ދީފައިވާ ބަޔާނުގައި ވާގޮތުން އޭނާގެ އަތުން ވަނީ ގިނަ އަދަދެއްގެ ޑޮލަރުތަކެއް ފެނިފަ އެވެ. އެއީ އެހެން މީހުން އޭނާ އާ ހަވާލުކޮށްފައިވާ ޑޮލަރުތައް ކަން އޭނާ އަތުން ފެނުނު ލިޔެކިޔުންތަކުން އެނގޭ ކަމަށް ވެސް ކޯޓުގައި ބުނެފައިވެ އެވެ.
އަބްދުލް ރަގޫބު ވަރަށް ގިނައިން ރާއްޖެ އަންނަ ކަމަށާއި އަދި އެ އަންނަ ދުވަސް ނޫން ޖެހިގެން އަންނަ ދުވަހު ފުރާކަން ވެސް ފާހަގަކުރެވިފައިވާ ކަމަށް ބަޔާނުގައިވެ އެވެ. އަދި އޭނާގެ ނަންވެސް ޕާސްޕޯޓުން ބަދަލުކޮށްފައިވާކަން ބަޔާނުގައިވެ އެވެ.
އޭނާގެ ދިފާއީ ވަކީލު ކޯޓުގައި ބުނެފައިވަނީ އޭނާ ބަންދުކުރަން ކޯޓަށް ހާޒިރުކޮށްފައިވަނީ ފުލުހުންގެ ބެލުމުގެ ދަށަށް ގެންގޮސް 24 ގަޑިއިރު ފަހަނައެޅިފަހުން ކަމަށެވެ. އެހެންކަމުން އެއީ އޭނާގެ ހައްޔަރު އިޖުރާތުތައް ރަނގަޅު ނޫން ކަމަށް ދިފާއީ ވަކީލު ބުނެ އެވެ. ނަމަވެސް, ފުލުހުން މި ވާހަކަތައް ދޮގުކުރެ އެވެ.
ކޯޓުގައި ދިފާއީ ވަކީލު އެދިފައިވަނީ ހަރުކަށި ޝަރުތުތަކަށްފަހު އަބްދުލް ރަގޫބު ދޫކޮށްލުމަށެެވެ. އަދި އޭނާގެ މައްޗަށް މަނީ ލޯންޑަރިން ކުރުމުގެ ތުހުމަތުގައި އެއްވެސް ހެއްކެއް ފުލުހުން ހުށައަޅާފައި ނުވާ ކަމަށް ވަކީލު ކޯޓުގައި ބުނެފައިވެ އެވެ.
މީގެކުރިން ވެސް ގިނަ އަދަދެއްގެ ޑޮލަރުތަކަކާ އެކީ ރާއްޖެއިން ބޭރަށް ފުރަން އުޅުނު ބިދޭސީއެއް ވަނީ ހައްޔަރުކޮށްފަ އެވެ. އެފަހަރު އެމީހާ އަތުން ފެނިފައިވަނީ 81،030 ޑޮލަރެވެ.
