ރަހީނުކޮށްގެން މާލެ ގެއެއްގެ ތެރޭގައި އަންހެނަކު ގެންގުޅުމަށްފަހު، މަގުމައްޗަށް ނެރެ އޭނާގެ ކަރުގައި ވަޅިޖައްސާފައި ހުއްޓައި ފުލުހުން އެ އަންހެން މީހާ މިރޭ ސަލާމަތްކޮށްފި އެވެ.
އަންހެން މީހާ ރަހީނު ކުރި ފިރިހެން މީހާ މަސައްކަތް ކުރީ ސައިކަލެއްގައި އޭނާއާއެކު ފިލުމަށެވެ. ކަރުގައި ވަޅި ޖެއްސުމަށްފަހު ސައިކަލު ދުއްވަން އަންހެން މީހާއަށް މަޖުބޫރު ކުރުވި އެވެ. ނަމަވެސް ފުލުހުންގެ ޓީމަކުން އެ ސަރަހައްދަށް އެޓެންޑުވެ، ފިރިހެން މީހާގެ ބޮލުގައި ބެޓަނަކުން ޖެހުމަށްފަހު އަންހެން މީހާ ސަލާމަތް ކުރި އެވެ.
ރަހީނުކޮށްގެން ގެންގުޅުނު އަންހެން މީހާއަށް އައިޖީއެމްއެޗް ހޮސްޕިޓަލުގައި ދަނީ ފަރުވާދެމުންނެވެ. އޭނާގެ ހާލު ރަނގަޅު ކަމަށް ހޮސްޕިޓަލާ ހަވާލާދީ ފުލުހުން ބުނެ އެވެ. އަންހެން މީހާ ސަލާމަތް ކުރަން އުޅުމުގެ ތެރޭގައި ފިރިހެން މީހާއަށް ވެސް އަނިޔާވެފައިވާތީ އޭނާއަށް ވެސް ދަނީ އޭޑީކޭގައި ފަރުވާދެމުންނެވެ.
".... އެހެންކަމުން އަންހެން މީހާގެ ފުރާނަ ސަލާމަތް ކުރުމަށް ފުލުހުން ބާރުގެ ބޭނުންކޮށް އަންހެން މީހާ ވަނީ އެ ފިރިހެން މީހާގެ ކިބައިން ސަލާމަތް ކޮށްފައި،" ފުލުހުން ބުންޏެވެ.
އެ ފިރިހެން މީހާ ވަނީ އަންހެން މީހާއަށް މަރާލާނެ ކަމަށް ބުނެ، އަންހެން މީހާ ކަރުގައި ވަޅި ޖައްސައި ފުލުހުންނަށް އިންޒާރުދީ ގެއަށް ވައްދާ އަނިޔާކޮށް، އެއަށްފަހު ގެއިން ނެރެގެން ސައިކަލަށް އަންހެން މީހާ އަރުވައިގެން ކަރުގައި ވަޅި ޖައްސައިގެން ދުއްވާފައި ކަމަށް ފުލުހުން ބުންޏެވެ.
ސޯޝަލް މީޑިއާގައި ދައުރުވަމުންދާ ވީޑިއޯތަކާއި ފޮޓޯތަކުން ފެންނަ ގޮތުގައި ބާރުގެ ބޭނުންކޮށްގެން ފުލުހުން އެ ފިރިހެން މީހާ އަންހެން މީހާގެ ކިބައިން ސަލާމަތް ކުރީ މުގުރެއް ބޭނުންކޮށްގެން ފިރިހެން މީހާގެ ބޮލަށް ހަމަލާދީގެންނެވެ. އޭނާއަށް ލިބުނު އަނިޔާ ދަނެގަތުމަށް ދަނީ ޓެސްޓުތަކެއް ހަދަމުންނެވެ.
ފުލުހުން ބުނީ އެ ފިރިހެން މީހާގެ ބޮލަށް ލިބުނު އަނިޔާ ބެލުމަށް މިރޭ ސީޓީ ސްކޭނެއް ހައްދާނެ ކަމަށެވެ. ނަމަވެސް އިތުރު ތަފްސީލެއް ނުދެ އެވެ.
