ބޭންކް އޮފް މޯލްޑިވްސް (ބީއެމްއެލް) ގެ ރުފިޔާ ކާޑުތަކުން ކުރެވޭ ޑޮލަރު މުއާމަލާތްތައް އެއްކޮށް ކަނޑާލައި ކުރިން ދޫކޮށްފައިވާ ކްރެޑިޓް ކާޑުތަކުގެ ލިމިޓު 100 ޑޮލަރަށް ކުޑަ ކުރަން ނިންމި ވަގުތު އިދިކޮޅު ފަރާތްތަކުން ބަގާވާތެއް ކުރަން އުޅުނު ކަމަށް ބުނެ ފުލުހުން ނެރުނު ބަޔާނަށް އާންމުންގެ ގިނަ ބަޔަކު ޖޯކު ޖަހައިފި އެވެ.
ފުލުހުން "އެކްސް" ގައި އާންމުކުރި އެ ބަޔާނާ ގުޅިގެން އާންމުން އެ ޕްލެޓްފޯމްގައި ބުނީ، އަނެއްކާ ވެސް ފުލުހުން ސިޔާސީ ކަންކަމުގެ ތެރެއަށް ވަދެ، ސިޔާސީ ބަޔާންތައް ނެރެން ފެށުމުން އެކަމާ ހިތްހަމަ ނުޖެހޭ ކަމަށެވެ.
"މީ ސީދާ ސިޔާސީ ނޫސްބަޔާނެއް. ޕޮލިހަކީ ސިޔާސީ އައްޑައަކަށް ނުހައްދަވާ. ބީއެމްއެލްގެ ޑިރެކްޓަރުންގެ ހައިސިއްޔަތުން ލިބިދޭ ބާރުގެ ދަށުން ނިންމާ ނިންމުމަކަށް ފުލުހުންނަށް ތަހުގީގެއް ނުހިންގޭނެ،" ވ. އަތޮޅު ކައުންސިލްގެ ރައީސް އަލީ ޝުޖާއު ވިދާޅުވި އެވެ.
ކުރީގެ އެސްޓީއޯގެ އެމްޑީ ހުސެއިން އަމްރު "އެކްސް" ގައި ވިދާޅުވީ އެމްއެމްއޭ ފެނަކަ ފެންވަރަށް ވެއްޓި، ފުލުހުންގެ އިދާރާ ފެނަކަ ފެންވަރަށް ވައްޓާނުލައްވަން އެދޭ ކަމަށެވެ.
"އަކުރުން އަކުރަށް ސިޔާސީ ސްޓޭޓްމެންޓެއްކަމަށް ދެކެން," މާފަންނު އުތުރު ދާއިރާގެ ކުރީގެ މެންބަރު އިމްތިޔާޒް ފަހުމީ ވިދާޅުވި އެވެ.
އޭގެ އިތުރުން، ބީއެމްއެލްއާ އެކު ގާތް މަސައްކަތްތަކެއް ކުރަމުން އަންނަ އެއް ފަރާތް ކަމަށްވާ، މުހައްމަދު ޝާރިފް ވިދާޅުވީ ބަޔާނުގެ ސަބަބުން ބީއެމްއެލްގެ މުވައްޒަފުން ނުރައްކަލަށް ހުށަހެޅިފައިވާ ކަމަށެވެ. އޭގެ ބަދަލުގައި ބަޔާން ނުނެރި ތަހުގީގު ހިންގިނަމަ މާ ރަނގަޅުވީސް ކަމަށެވެ.
"ޕޮލިހުގައި ތިއްބެވި ބޭފުޅުންނަކީ މިފަދަ ބަޔާންތައް ނެރުއްވާވަރުގެ ނާގާބިލު މީހުންނޭ ހިތަށް އަރާ ހަމަ،" ޝާރިފް ވިދާޅުވި އެވެ.
އެކްސްގެ އިތުރުން ފޭސްބުކްއަށް ފުލުހުން އާންމުކުރި އެ ބަޔާނަށް ވެސް ގިނަ ބަޔަކު ވަނީ ޖޯކު ޖަހައި، ސަރުކާރުގެ ނާގާބިލުކަމުގެ ވާހަކަ ދައްކައި ފާޑު ކިޔާފަ އެވެ. އަދި ފުލުހުން އެ ބަޔާން ނެރުނީ ސީދާ ސަރުކާރުގެ އޯޑަރަށް ހަގީގަތް އޮޅުވާލަން ކަމަށްވެސް އާންމުން ބުންޏެވެ.
"ބީއެމްއެލްއިން ސަރުކާރު ވައްޓާނުލީ ހަމަ ކިރިޔާ،" އެކަކު ބުންޏެވެ.
މީގެއިތުރުން ސަރުކާރަށް ފާޑު ކިޔައި ބައެއް މީހުން ބުނީ ހަގީގަތް އޮޅުވާލަން މަސައްކަތް ކުރި ނަމަވެސް، ވީ ގޮތް ރައްޔިތުންނަށް އޮޅުވާ ނުލެވޭ ކަމަށެވެ. އެގޮތުން ސަރުކާރުން ސަރުކާރަށް ކުރެވޭ ގޯސް ކަންކަމުގެ ޒިންމާ ނަގަން ދަސް ކުރަން ޖެހޭ ކަމަށް ވެސް ބައެއް މީހުން ބުންޏެވެ.
ފުލުހުން ނެރުނު ނޫސް ބަޔާނުގައި ބުނީ އެ ނިންމުން ބީއެމްއެލްއިން ނިންމި ވަގުތު ސަރުކާރުގެ މާލީ ހާލަތާ ގުޅޭގޮތުން އިދިކޮޅު އެމްޑީޕީން ނޫސްވެރިންގެ ބައްދަލުވުމެއް ބާއްވަމުން ދިޔަ ކަމަށާއި ހަމަ އެ ވަގުތު ސޯޝަލްމީޑިއާގައި އެތައް ސަތޭކަ "ބޮޓް އެކައުންޓު" ބޭނުން ކޮށްގެން ސަރުކާރު ވައްޓާލަން މަގުތަކަށް ނުކުތުމަށާއި އާންމު ހަމަޖެހުން ނަގާލަން ގޮވަމުންދިޔަ ކަމަށެވެ.
ބީއެމްއެލްގެ ނިންމުމާ ގުޅުވައި ގައުމުގެ އާންމު މަސްލަހަތު ނަގައިލުމަށް ބަޔަކު މަސައްކަތް ކުރި ކަމަށް ތުހުމަތުކޮށް ފުލުހުން ބުނީ ގާނޫނީ ވެރިކަމެއް ގައިރު ގާނޫނީ ގޮތުން ބަދަލު ކުރުމަށް އިއްޔެ ބަޔަކު މަސައްކަތް ކުރި ކަމުގައި ބެލޭނެ ޖާގަ އެބަ އޮތް ކަމަށެވެ.
ހިންގަން އުޅުނު ކަމަށް ސަރުކާރުން ތުހުމަތު ކުރާ ބަގާވަތަށް 48 ގަޑިއިރު ފާއިތުވި އިރު ވެސް އެ މައްސަލައިގެ ތުހުމަތުގައި އެއްވެސް މީހަކު ހައްޔަރެއް ނުކުރެ އެވެ.
