ރުފިޔާ ކާޑުތަކުން ޑޮލަރުގެ މުއާމަލާތް ނުކުރެވޭ ގޮތަށް ހަދަަން ބޭންކް އޮފް މޯލްޑިވްސް އިން މިދިޔަ އާދީއްްތަ ދުވަހު ނިންމި ނިންމާ ގުޅޭ ގޮތުން ފުލުހުން ޖިނާއީ ތަހުގީގެއް ކުރުން ހުތުުރު ކަމަށާއި ބޭންކުގެ މައްސަލަ ބެލޭނީ މަރުކަޒީ ބޭންކް (އެމްއެމްއޭ) އަށް ކަމަށް ކުރީގެ ރައީސް އަބްދުﷲ ޔާމީނު ރޭ ވިދާޅުވެއްޖެ އެވެ.
ބީއެމްއެލްގެ ނިންމުމާ ގުޅިގެން ސޯޝަލް މީޑިއާގައި އާންމުން ނުރުުހުން ފާޅުކުރި ކުރުން އެއީ ބަގާވާތެއް ކަމަށް ތުހުމަތުކޮށް ޖިނާއީ ތަހުގީގެއް ފަށާފައިވާ ކަމަށް ފުލުހުން އިއްޔެ ބުންޏެވެ.
ޕީއެންއެފްގެ އޮފީހުގައި ރޭ ބޭއްވި ޖަލްސާގެ އޯޑިއަންސްގައި އިންނަވައި، ފުލުހުންގެ އެ ނިންމުމަށް ފާޑުވިދާޅުވެ ވާހަކަ ދައްކަަވަމުން ޔާމީނު ވިދާޅުވީ ފުލުހުން އެގޮތަށް ވާހަކަ ދެއްކުމަކީ ހުތުރު ކަމެއް ކަމަށެވެ.
"ފުލުހުން ދެ ފަހަރުން އެއްފަހަރު ބަޔާނެއް ނެރެފައި، ސަރުކާރެއް ގާނޫނާ ހިލާފަށް ނޫނީ، ގައިރުގާނޫނީ ކަންތައްތަކަކުން [ސަރުކާރު] ވައްޓައިލަން އުޅޭ [ވާހަކަ]، އެއްވާ ވާހަކަ ދެއްކުން މިއީ އައިބު ކަންތައްތައް، މިއީ އައިބު ހުތުރު ވާހަކަ،" ޔާމީނު ވިދާޅުވި އެވެ.
ސަރުކާރުން ފުލުހުން ލައްވައި އެކަހަލަ މަސައްކަތްތައް ނުކޮށް ރައްޔިތުންނަށް ކަމެއް ކޮށްދެވޭތޯ އުޅުން ރަނގަޅު ކަމަށް ވެސް އެމަނިކުފާނު ވިދާޅުވި އެވެ.
ފުލުހުންގެ ބަޔާނުގައި ސިފަކުރަން އުޅެގައި އޮތީ އެމަނިކުފާނު ތުހުމަތުކުރެއްވި ގޮތުގައި ސިޔާސީ މީހުން ބޭންކް ލައްވައި ކަމެއް ކުރުވަން އުޅުނު ކަމަށެވެ.
"މީގައި އަދި ރަނގަޅުވާނީ [ފުލުހުން ނެރުނު] އެ ބަޔާނުގައި ބުނި ނަމަ ، ބޭންކް އޮފް މޯލްޑިވްސްއަށް މި މަޝްވަރާ ދިނީ، ބޭންކް އޮފް މޯލްޑިވްސްގެ ޑެބިޓްކާޑުން މި ޑްރޯކުރާ، ޑޮލަރަށް މާރުކުރާ އެތި، އެކަން ވެސް ކުޑަކުރަން ބޭންކަށް މަޝްވަރާދިނީ ސިޔާސީ މީހުންނޭ،" ޔާމީނު ވިދާޅުވި އެވެ.
ފުލުހުން އެފަދަ ބަޔާނެއް ނެރެގެން އުޅޭ އިރު ހަގީގަތުގައި ހިނގައިގެން އުޅޭ ކަމަކަކީ އެމަނިކުފާނު ވިދާޅުވި ގޮތުގައި ބޭންކުން ނިންމި ނިންމުމެކެވެ.
"މިއީ ބޭންކް އޮފް މޯލްޑިވްސްގެ ކަމެއް އިނގޭތޯ، މިކަހަލަ މައްސަލަ އެއް އުޅެންޏާ، މަރުކަޒީ ބޭންކު ހުންނާނެ މަރުކަޒީ ބޭންކަަށް ބެލޭނެ އިނގޭތޯ،" ޔާމީނު ވިދާޅުވި އެވެ.
އޭގެ ބަދަލުގައި އެކަން ބޮޑު ޖިނާއީ މައްސަލައަކަށް ހަދައިގެން ސަރުކާރުން އުޅޭތީ ފާޑުވިދާޅުވި އެވެ. ބޭންކްގެ އެ ނިންމުމާ ގުޅިގެން ސޯޝަލް މީޑިއާގައި މީހުން ހިޔާލުފާޅުކުރި މައްސަލަ ޖިނާއީ މައްސަލައަކަށް ހަދައިގެން ފުލުހުން އުޅޭތީ އެކަމާ ވެސް އެމަނިކުފާނު ކަންބޮޑުވުން ފާޅުކުރެއްވި އެވެ.
