ކުރީގެ އިކޮނޮމިކް މިނިސްޓަރު އަދި އެމްޑީޕީގެ ޗެއާޕާސަން ފައްޔާޒް އިސްމާއިލްގެ ފާޑު ކިޔުން އަމާޒުވުމާއެކު، އޯޝަން ކަނެކްޓް މޯލްޑިވްސް (އެމްއެފްސީ) ގެ ބައިނަލްއަގުވާމީ ސަބްމެރިން ކޭބަލް ސިސްޓަމް މަޝްރޫއު އެއްވެސް ބަދަލެއް ނުގެނެސް ކުރިއަށް ގެންދަން ރައީސް ޑރ. މުހައްމަދު މުއިއްޒު ނިންމަވައިފި އެވެ.
ރައީސް އޮފީހުން ބުނީ އެގޮތަށް ރައީސް މުއިއްޒު ނިންމެވީ އެ މަޝްރޫއު އިތުރަށް ކުރިޔަށް ގެންދާނެ ގޮތަކާ ގުޅޭގޮތުން ފިނޭންސް މިނިސްޓްރީން އިއްޔެ ވަޒީރުންގެ މަޖިލީހަށް ހުށަހެޅި ކަރުދާހަށް މަޝްވަރާކުރެއްވުމަށްފަހު ވަޒީރުންގެ މަޖިލިސްގެ ލަފަޔާއެކު ކަމަށެވެ.
"ވަޒީރުންގެ މަޖިލީހުން ނިންމަވާފައި ވަނީ މި މަޝްރޫޢަށް އިތުރަށް ބޭނުންވާ ލޯނު ފައިސާ ހަމަޖެއްސުމަށްޓަކައި އިކުއިޓީއަށް ދައްކަންޖެހޭ 2.92 މިލިޔަން ޑޮލަރު ސަރުކާރުން ފައިނޭންސްކޮށް، ލޯނުގެ ފައިސާ މި މަސައްކަތަށް އިންވެސްޓްކޮށް، ކުރިއަށް ގެންގޮސް ނިންމެވުމަށް،" ރައީސް އޮފީހުން ބުންޏެވެ.
ސަރުކާރުގެ އިސްފަރާތްތަކުން އޯޝަން ކަނެކްޓް ޕްރޮޖެކްޓަކީ ބޭކާރު މަސައްކަތެއް ކަމަށް ސިފަކުރުމުން، ސަރުކާރަށް ކުރާ އިތުބާރު ކުޑަވާ ކަމަށް އެމްޑީޕީގެ ޗެއާޕާސަން ފައްޔާޒް އިސްމާއިލް ވިދާޅުވެފައި ވަނިކޮށެވެ.
ފައްޔާޒް "އެކްސް" ގައި ކުރެއްވި ޕޯސްޓެއްގައި ވިދާޅުވީ ސަރުކާރުގެ އިސްފަރާތްތަކުން އޯޝަން ކަނެކްޓް ޕްރޮޖެކްޓަކީ ބޭކާރު މަސައްކަތެއް ކަމަށް ސިފަކުރުމުން، ސަރުކާރުގެ ސިޔާސަތެއް ނެތްކަމަށް އާއްމު ރައްޔިތުންނަށް ފެންނަމުންދާ ކަމަށެވެ.
މީގެ އިތުރުން ރައީސް މުއިއްޒު ވަނީ "ހާއްސަ އެހީއަށް ބޭނުންވާ މީހުންގެ މަރުކަޒު" ހެލްތު މިނިސްޓްރީގެ މެންޑޭޓުގެ ތެރެއިން ހިންގަވާގޮތަށްވެސް ވަޒީރުންގެ މަޖިލީހުގެ ލަފަޔާއެކު ނިންމަވާފަ އެވެ.
ރައީސް މުއިއްޒު މިގޮތަށް ނިންމެވީ ވަނީ ހާއްސަ އެހީއަށް ބޭނުންވާ މީހުންގެ މަރުކަޒު ހިންގުމާއި ބެލެހެއްޓުމުގެ ޒިންމާ ބަދަލުކުރުމާ ގުޅޭގޮތުން މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓުން، ހުށަހެޅުއްވި ކަރުދާހަށް ވަޒީރުންގެ މަޖިލީހުގައި މަޝްވަރާކުރެއްވުމަށް ފަހުގައި ކަމަށް ރައީސް އޮފީހުން ބުންޏެވެ.
އެ މަރުކަޒު ހިންގުމަށް ކަނޑައަޅުއްވާފައިވާ ބަޖެޓާއި، މަރުކަޒުގެ މަސައްކަތްތަކާ ހަވާލުވެ ތިބި މުވައްޒަފުން ހެލްތު މިނިސްޓްރީގެ ދަށަށް ބަދަލުކުރެއްވުމަށް ވެސް ވަޒީރުންގެ މަޖިލީހުން ވަނީ ނިންމާފަ އެވެ.
