ބޮސްވާނާއިން ފެނުނު ދުނިޔޭގެ ދެވަނައަށް އެންމެ ބޮޑު ޑައިމަންޑް އަތަށް ލިބުމުން އެ ގައުމުގެ ރައީސް މޮކްގްވީޓްސީ މަސީސީއަށް ބޮޑު ހައިރާން ކަމެއް ލިބިއްޖެ އެވެ.
މަސީސީއަކީ އެ ޑައިމަންޑުގައި އެންމެ ފުރަތަމަ އަތްލާން ފުރުސަތު ލިބުނު އެކަކެވެ. އެއާއެކު ޑައިމަންޑް އަތަށް ލިބުމާއެކު ލިބުނު ހައިރާންކަން ލިބުނު ވީޑިއޯ ސޯޝަލް މީޑިއާގައި އަންނަނީ ދައުރުވަމުންނެވެ.
"2،492 ކެރެޓްގެ ޑައިމަންޑެއް ހޯދުމަކީ ލިބޭ ބޮޑު އުފަލެއް. އެއާއެކު އެންމެ ފަހުގެ ޓެކްނޮލޮޖީ ބޭނުންކޮށްގެން ޑައިމަންޑް ހޯދުމަކީ ލިބުނު ހިތްހަމަޖެހުމެއް،" ލޫކްރާގެ ރައީސް ވިލިއަމް ލޭމްބް ވިދާޅުވި އެވެ.
މިދިޔަ ބުރާސްފަތި ދުވަހު ބަރުދަނުގައި 498.4 ގްރާމް ހުރި އެ ޑައިމަންޑް ފެނިފައި ވަނީ ކެނޭޑިއަންގެ މައިނިން ކޮމްޕެނީ ލުޑްކާރާ ޑައިމަންޑް ކޯޕްއަށެވެ.
އެންމެ ފަހުން މިފަދަ ޑައިމަންޑެއް ބޮސްވާނާއިން ފެނިފައި ވަނީ 2019 ގަ އެވެ. އެފަހަރު ފެނިފައި ވަނީ 1،758 ކެރެޓްގެ ޑައިމަންޑެކެވެ.
ދުނިޔޭގެ އެންމެ ބޮޑު ޑައިމަންޑް ފެނިފައި ވަނީ 1905 ގައި ސައުތު އެފްރިކާއިންނެވެ. އެފަހަރު ފެނިފައި ވަނީ 3،106 ކެރެޓްގެ ޑައިމަންޑެކެވެ.
