ޓީ20 ވޯލްޑް ކަޕް ކޮލިފައިންގެ އޭޝިއާ ކޮލިފަޔާ އޭ ގައި ވާދަކުރުމަށް، ރާއްޖޭގެ ގައުމީ ކްރިކެޓް ޓީމު މެލޭޝިއާ އަށް ފުރައިފި އެވެ.
މެލޭޝިއާގައި ކުރިއަށްދާ ކޮލިފައިންގައި، ރާއްޖެ ހިމެނޭ ގޮތަށް ހަތް ގައުމެއް ވާދަކުރާނެ އެވެ. އެއީ، މެލޭޝިއާ، ކުވެއިތު، ހޮންގް ކޮންގް، މޮންގޯލިއާ، މިޔަންމާ އަދި ސިންގަޕޫރު އެވެ.
މި ހަތް ގައުމުގެ މެދުގައި، ކުޅޭ ލީގު ބުރަށް ފަހު، އެންމެ ގިނަ ޕޮއިންޓް ހޯދާ ދެ ޓީމެއް، ރީޖަނަލް ފައިނަލް ބުރަށް ހޮވޭނެ އެވެ. ރީޖަނަލް ފައިނަލުގައި، މުޅި އޭޝިއާ އިން ނުވަ ޓީމެއް ވާދަކުރާނީ، ޓީ20 ވޯލްޑް ކަޕުން އޭޝިއާ ލިބޭ ފަހު ދެ ޖާގަ އަށެެވެ.
މި ފަހަރުގެ ކޮލިފައިންގެ ކުރިން، ގައުމީ ކްރިކެޓް ޓީމުން މެލޭޝިއާގައި ތިން ވޯމްއަޕް މެޗެއް ކުޅޭނެ އެވެ. ކްރިކެޓް ބޯޑުން ބުނީ، މިއީ ކޮލިފައިން މެޗުތަކަށް ތައްޔާރުވުމާއި މާހައުލަށް ހޭނުމުގެ ބޭނުމުގައި ކުޅޭ މެޗުތަކެއް ކަމަށެވެ.
ކޮލިފައިންގައި ރާއްޖޭގެ މެޗުތަކަށް ބަލާއިރު، މި މަހު 30 ގައި މެލޭޝިއާއާ ކުޅުމަށް ފަހު، 31 ގައި ބައްދަލުކުރާނީ، ސިންގަޕޫރާއާ އެވެ. އޭގެ ފަހުން، ސެޕްޓެމްބަރު ދެ ވަނަ ދުވަހު، ކުވެެއިތާ ކުޅުމަށް ފަހު، ސެޕްޓެމްބަރު ތިން ވަނަ ދުވަހު ހޮންގް ކޮންގްއާ ބައްދަލުކުރާނެ އެވެ. އަދި ސެޕްޓެމްބަރު މަހު ފަސް ވަނަ ދުވަހު މިޔަންމާއާ ކުޅުމަށް ފަހު، ކޮލިފައިން މި ބުރުގެ ފަހު މެޗުގައި، ރާއްޖޭން ސެޕްޓެމްބަރު މަހު ހަ ވަނަ ދުވަހު ކުޅޭނީ މޮންގޯލިއާއާ އެވެ.
ގައުމީ ކްރިކެޓް ޓީމުގެ ކޯޗަކީ، ސްރީ ލަންކާގެ ޕަސިންދު ލިޔަނާރަޗީ އެވެ. މެނޭޖަރަކީ، އަލީ މުހައްމަދު މަނިކް އެވެ.
ޓީ20 ވޯލްޑް ކަޕް ކޮލިފައިންގައި ވާދަކުރާ ރާއްޖޭގެ ސްކޮޑު:
ޔޫސުފް އަޒްޔާން (ކެޕްޓަން)
އާދަމް ނާސިފް އުމަރު (ވައިސް ކެޕްޓަން)
އާޒިން މުހައްމަދު
މަބްސަރު އަބްދުﷲ
މުހައްމަދު އައްޒާމް
އިސްމާއިލް އަލީ
މުހައްމަދު ރިޝްވާން
އިބްރާހިމް ރިޒާން
ލީމް ޝަފީގް
އަލީ ޝުނާން
ހަސަން އިބްރާހިމް
މުހައްމަދު މިއުވާން
މުހައްމަދު ޝިޔާމް
ޕިޔަލް ކުމާރު
