ބްރުސެލްސް، ބެލްޖިއަމް (އޮގަސްޓް 23) - ބެލްޖިއަމް ގައުމީ ފުޓްބޯޅަ ޓީމުގެ ކޯޗަކަށް ޑޮމެނިކޯ ޓެޑެސްކޯ ހުއްޓައި، އެ ޓީމަށް ނުކުޅޭނެ ކަމަށް ރެއާލް މެޑްރިޑްގެ ކީޕަރު ތިބޯ ކޯޓުއާ ބުނެފި އެވެ.
މި ފަހަރުގެ ޔޫރޯ ފުޓްބޯޅަ މުބާރާތަށް ކޯޓުއާ، 32، ފިޓްވި ނަމަވެސް، އޭނާގެ ހާލަތު ޓީމަށް ނަގާ ފެންވަރަށް ނެތް ކަމަށް ބުނެ، ކޯޓުއާ ޔޫރޯ ސްކޮޑަށް ނުނަގަން ޓެޑެސްކޯ ނިންމި އެވެ. އެ ފަހަރު ވެސް ޓެޑެސްކޯ އާއި ކޯޓުއާގެ ދެމެދުގައި މައްސަލަ ގޯސް ވާހަކަ މީޑިއާގައި ދެކެވުނެވެ.
އިންޓަގްރާމްގައި ކޯޓުއާ ކުރި ޕޯސްޓެއްގައި ބުނެފައިވަނީ، މި ފަހުން، ބެލްޖިއަމް ކޯޗު، ޓެޑެސްކޯއާ އެކު އެ ކުރިއަށްދިޔަ ކަންކަމަށް ފަހު ގޮތެއް ނިންމާފައިވާ ކަމަށެވެ.
"މި މެނޭޖްމަންޓް އޮއްވައި ބެލްޖިއަމް ގައުމީ ޓީމަށް ނުކުޅެން އަހަރެން ނިންމައިފިން،" ޗެލްސީ އާއި އެތުލެޓިކޯ މެޑްރިޑަށް ވެސް ކުރިން ކުޅެފައިވާ ކޯޓުއާ ބުންޏެވެ.
ކޯޓުއާ ބުނީ އޭނާގެ މި ނިންމުމާ ގުޅިގެން އެކި ފަރާތްތަކުގެ ތަފާތު ހިޔާލުތައް ހުންނާނެ ކަމަށާއި މިއީ ހާލަތާއި އަދާކުރަން ޖެހޭ ޒިންމާއާ ހުރިހާ ކަމަކަށް ބަލާއިރު، އެންމެ ރަނގަޅު ގޮތް ކަމަށެވެ. އަދި އޭނާގެ ނިންމުން ބެލްޖިއަމް ފުޓްބޯޅަ ފެޑެރޭޝަނާ ވެސް ހިއްސާކޮށްފައިވާނެ ކަމަށާއި އެ ފެޑެރޭޝަނާ އެކު ބޭއްވި ބައްދަލުވުންތަކުގައި ދެފަރާތަށް ވެސް އެއްބަސްވެވޭނެ ވާހަކަތަކެއް ދެކެވުނު ކަމަށް ކޯޓުއާ ބުނެފައިވެ އެވެ.
"ބޭނުންވަނީ އަހަރެންގެ ވާހަކަ ނުދައްކައި، ބެލްޖިއަމް ގައުމީ ޓީމުގެ އުންމީދުތަކައިގެން ކުރިއަށްދެވޭނެ މާހައުލެއް ޓީމުގައި އޮންނަން،" ކޯޓުއާ ބުންޏެވެ.
ކޯޓުއާ ވަނީ ބެލްޖިއަމް ގައުމީ ޓީމަށް 102 މެޗު ކުޅެދީފަ އެވެ.
