މިލާން (އޮގަސްޓް 18) - އިޓާލިއަން ލީގުގެ އާ ސީޒަނުގައި އެންމެ ފަހުގެ ޗެމްޕިއަން، އިންޓަ މިލާނާއި ދެ ވަނަ ހޯދި އޭސީ މިލާނުން ކުޅުނު ފުރަތަމަ މެޗުތަކުން އެއްވަރުވެ، ޕޮއިންޓަކުން ފުއްދާލަން ޖެހިއްޖެ އެެވެ.
އިންޓަ އިން ޖެނޯއާ ދަނޑުގައި 2-2 އިން އެއްވަރުވިއިރު، އަމިއްލަ ދަނޑުގައި ކުޅުނު މިލާނުން ވަނީ ފަހަތުން އަރައި ޓޮރިނޯއާ 2-2 އިން އެއްވަރުކޮށްފަ އެވެ.
ޖެނޯއާގެ އަލެސަންޑްރޯ ވޮގްލިއާކޯ ވަނީ އެ ޓީމަށް ލަނޑެއް ޖަހައިދީ ލީޑުނަގައިދީފަ އެވެ. އެހެން ނަމަވެސް، އެ ޓީމަަށް ކުރީގައި އޮވެވުނީ 10 މިނިޓެވެ. މެޗުގެ 30 ވަނަ މިނިޓްގައި މާކަސް ތުރާމް ވަނީ ލަނޑެއް ޖަހައި އިންޓަ އަށް އެއްވަރުކޮށްދީފަ އެވެ.
ތުރާމް ވަނީ މެޗުގެ 80 ވަނަ މިނިޓްގައި އިތުރު ގޯލެއް ޖަހައި، އިންޓަ އަށް އާ ސީޒަނުގެ ފުރަތަމަ މެޗުން މޮޅެއް ހޯދައިދޭން އުންމީދެއް ދީފަ އެވެ. އެކަމަކު، ޖެނޯއާ އިން ވަނީ އެކަމަށް ހުރަސް އަޅައިފަ އެވެ. ޖެނޯއާގެ ޖޫނިއާ މެސިއަސް ވަނީ އިތުރު ވަގުތުގެ ފަސް ވަނަ މިނިޓްގައި ލަނޑު ޖަހައި، އެ ޓީމަށް އެއްވަރުކޮށްދީފަ އެވެ.
ޓޮރިނޯ އިން ރޭ މިލާން ދަނޑުގައި 88 ވަނަ މިނިޓާ ހަމައަށް އޮތީ 2-0 އިން ކުރީގަ އެވެ. އެއީ، މަލިކް ތިއޯ އަތުން ބައިކޮޅަށް ވަން ގޯލާއި ޑުވާން ޒަޕާޓާ ޖެހި ލަނޑުންނެވެ. މިލާނަށް އުންމީދެއް ހޯދައިދިނީ، އެ ޓީމުގެ ޖޯޒީގައި ފުރަތަމަ ފަހަރަށް ރަސްމީ މެޗެއް ކުޅުނު އަލްވާރޯ މޮރާޓާ ޖެހި ގޯލުންނެވެ. އަދި އިތުރު ވަގުތުގެ ފަސް ވަނަ މިނިޓްގައި ނޯއާ އޮކާފޯ ވަނީ ގޯލެއް ޖަހައި މިލާނަށް ޕޮއިންޓެއް ހޯދައިދީފަ އެވެ.
ލީގުގައި ރޭ ޕާމާ އާއި ފިއޮރެންޓީނާ ކުޅުނު މެޗު ވަނީ 1-1 އިން އެއްވަރުވެފަ އެވެ. މިއީ، ތިން އަހަރުގެ މެދުކެނޑުމަކަށް ފަހު، އަލުން އިޓާލިއަން ލީގަށް އައިސް، ޕާމާ އިން ކުޅުނު ފުރަތަމަ މެޗެވެ.
