މެޑްރިޑް (އޮގަސްޓް 13) - ލިވަޕޫލަށް ބަދަލުވާން ލިބުނު އޮފާ ދޫކޮށްލައި، ރެއާލް ސޮސިއެޑާޑްގައި މަޑުކުރަން ސްޕެއިންގެ މިޑްފީލްޑަރު، މާޓިން ޒުބިމެންޑީ ނިންމާފައިވާ ކަމަށް މީޑިއާތަކުން ރިޕޯޓްކޮށްފި އެވެ.
މިދިޔަ އަހަރުގެ އޮކްޓޫބަރު މަހު ޒުބިމެންޑީ، 25، ވަނީ ސޮސިއެޑާޑާ އެކު ހަދާފައިވާ ކޮންޓްރެކްޓް، 2027 ވަނަ އަހަރުގެ ޖޫން މަހުގެ ނިޔަލަށް އާ ކޮށްފަ އެވެ.
އެ އެއްބަސްވުމުގައިވާ ގޮތުން، ޒުބިމެންޑީ އަށް އޭގެ ކުރިން އެ ކްލަބް ދޫކޮށްލެވޭނީ، އޭނާ ގަންނަން ބޭނުންވާ ކްލަބަކުން، 64 މިލިއަން ޑޮލަރު ދައްކައިފަ އެވެ. މި އަގު ކުޑަކުރެވޭނީ، ސޮސިއެޑާޑުން އެ ކަމަށް ރުހޭނަމަ އެވެ.
ލިވަޕޫލުން އޮތީ ޒުބިމެންޑީގެ ކޮންޓްރެކްޓް ގަންނަން ދޭން ޖެހޭ އަގު ދައްކާފައިވެސް އޭނާ ގެންނަން ތައްޔާރަށެވެ. އެކަމަކު، އެންމެ ފަހު ވަގުތު ޒުބިމެންޑީ ނިންމީ، ސޮސިއެޑާޑްގައި މަޑުކުރާށެވެ.
ރިޕޯޓްތައް ބުނާގޮތުން، ސޮސިއެޑާޑުން އަންނަނީ ޒުބިމެންޑީ އެއްބަސްވުން އާ ކުރަން އާ ޑީލެއް ދޭން މަޝްވަރާކުރަމުންނެވެ.
މީގެ ކުރިން، އާސެނަލާއި ބަޔާން މިއުނިކް އަދި އިންޓަ މިލާނުން ވެސް ޒުބިމެންޑީ ހޯދަން މަސައްކަތް ކުރި އެވެ. އެކަމަކު، އޭގެއިން އެއްވެސް ކްލަބެއްގެ ހުށަހެޅުން ގަބޫލުކުރަން އޭނާ ބޭނުމެއްނުވި އެވެ.
މި ފަހަރުގެ އިނގިރޭސި ޕްރިމިއާ ލީގުގައި ވާދަކުރާ ޓީމުތަކުގެ ތެރެއިން، ކުޅުންތެރިއަކު ސޮއިނުކުރާ ހަމައެކަނި ކްލަބަކީ ލިވަޕޫލް އެވެ.
