މެޑްރިޑް (އޮގަސްޓް 8) - ރެއާލް ސޮސިއެޑާޑަށް ކުޅެމުން އަންނަ ސްޕެއިން ގައުމީ ޓީމުގެ މިޑްފީލްޑަރު، މާޓިން ޒުބިމެންޑީ އަށް ލިވަޕޫލުން ފާރަލަމުން އަންނަ ކަމަށް މީޑިއާ ރިޕޯޓްތައް ބުނެފި އެވެ.
މި ފަހަރުގެ އިނގިރޭސި ޕްރިމިއާ ލީގުގައި ވާދަކުރާ ޓީމުތަކުގެ ތެރެއިން، ކުޅުންތެރިއަކު ސޮއިނުކުރާ ހަމައެކަނި ކްލަބަކީ ލިވަޕޫލް އެވެ. ލިވަޕޫލްގެ ކޯޗުކަމާ ހަވާލުވި ނެދަލެންޑްސްގެ އާނޭ ސްލޮޓް ވަނީ ޓީމަށް ބޭނުންވާ ކުޅުންތެރިއަކު ގަންނަން ފަސްނުޖެހޭނެ ކަމަށް ބުނެފަ އެވެ.
އެކަމަކު، ސްލޮޓް ވިސްނައިގެން ހުރީ، އެ ކްލަބްގެ ސްކޮޑުގެ ހުރިހާ ކުޅުންތެރިން އެކުގައި ޕްރެކްޓިސްތަކެއް ކުރުމަށް ފަހު ކަންކަން ބަލާފައި ޓްރާންސްފާ މާކެޓަށް ނުކުންނާށެވެ. އެ ގޮތުން، އެމެރިކާ ޓުއާގައި ލިވަޕޫލުން ކުޅުނު ތިން މެޗުން ވެސް މޮޅުވިއިރު، މިހާރު އަންނަނީ ޕްރީ ސީޒަނުގެ ފަހު މެޗުތަކަށް ތައްޔާރުވަމުންނެވެ.
އެ ގޮތުން، ލިވަޕޫލަށް ބޭނުންވާ ކުޅުންތެރިން ފާހަގަކޮށް، ގަންނަން މަސައްކަތް ވަނީ ފަށައިފަ އެވެ.
ސްޕެއިނާއި އިނގިރޭސި މީޑިއާ ރިޕޯޓްތައް ބުނާގޮތުން، ލިވަޕޫލުން މިހާރު މަސައްކަތް ފަށާފައިވަނީ، ސޮސިއެޑާޑަށް ކުޅޭ ޒުބިމެންޑީ، 25، ގަންނާށެވެ.
މިދިޔަ އަހަރުގެ އޮކްޓޫބަރު މަހު ޒުބިމެންޑީ ވަނީ ސޮސިއެޑާޑާ އެކު ހަދާފައިވާ ކޮންޓްރެކްޓް، 2027 ވަނަ އަހަރުގެ ޖޫން މަހުގެ ނިޔަލަށް އާ ކޮށްފަ އެވެ. އެ އެއްބަސްވުމުގައިވާ ގޮތުން، ޒުބިމެންޑީ އަށް އޭގެ ކުރިން އެ ކްލަބް ދޫކޮށްލެވޭނީ، އޭނާ ގަންނަން ބޭނުންވާ ކްލަބަކުން، 64 މިލިއަން ޑޮލަރު ދައްކައިފަ އެވެ. މި އަގު ކުޑަކުރެވޭނީ، ސޮސިއެޑާޑުން އެ ކަމަށް ރުހޭނަމަ އެވެ.
ޒުބިމެންޑީ އަކީ މި ފަހަރު ޔޫރޯ ކާމިޔާބުކުރި ސްޕެއިން ޓީމަށް ވެސް ކުޅެފައިވާ ކުޅުންތެރިއެކެވެ. އެ ގޮތުން، ޔޫރޯގައި އަލްބޭނިއާއާ ދެކޮޅަށް ސްޕެއިނުން ކުޅުނު މެޗުގައި އެއްކޮށް ކުޅުނުއިރު، ސެމީ ފައިނަލުގައި، ފްރާންސް އަދި ފައިނަލުގައި އިންގްލެންޑާ ދެކޮޅަށް ޒުބިމެންޑީ ވަނީ ބަދަލަކަށް ކުޅެން އަރައިފަ އެވެ.
