ސަރުކާރުގެ ހުރިހާ ސްކޫލެއްގެ ކްލާސް ރޫމްތަކުގައި "ކޮމިއުނިޓީގެ އެހީތެރިކަމާއެކު" އޭސީ ހަރުކުރަން އެޑިއުކޭޝަން މިނިސްޓްރީން މަޝްރޫއެއް ފަށާފައި ވަނިކޮށް، ސްކޫލްތައް އޭސީ ކުރަން ބެލެނިވެރިން އަތުން ފައިސާ ނަގާކަމުގެ ޝަކުވާ ބޮޑުވެއްޖެ އެވެ.
"އަދަދު" އަށް އެނގިފައިވާ ގޮތުގައި ބައެއް ސްކޫލްތަކުން އަންނަނީ ބެލެނިވެރިންނަށް ވަކިން ގުޅައި، އޭސީ ހަރުކުރުމަށް ބޭނުންވާ ފައިސާ ހޯދަމުންނެވެ.
ސަރުކާރުގެ ސްކޫލްތައް އޭސީކުރަން ނިންމީ ޖަމާލުއްދީން ސްކޫލްގެ ކްލާސް ރޫމްތަކަށް މާ ބޮޑަށް ހޫނުވާތީ ފަންކާ ގަންނަން ބެލެނިވެރިންނަށް ސްކޫލުން މެސެޖު ކުރަން ފެށި މައްސަލަ ބޮޑުވުމާއެކުގަ އެވެ.
އެކަމުގެ ޝަކުވާ ލިބެމުންދާ ފާހަގަކުރައްވާ އެޑިއުކޭޝަން މިނިސްޓަރު ޑރ. އިސްމާއިލް ޝަފީއު "އަދަދު" އަށް ވިދާޅުވީ އެއްވެސް ކުރިއަށް އޮތް ހަފްތާއެއްހާ ދުވަސް ތެރޭގައި އެކަމާ ގުޅިގެން ސްކޫލްތަކަށް އިރުޝާދެއް ދޭނެ ކަމަށާއި މިހާރު މަޝްވަރާ ކުރެވެމުންދަނީ އިރުޝާދު ދޭނެ ގޮތަކާމެދު ކަމަށެވެ.
ނަމަވެސް ކޮންޓްރިބުއުޝަންއަކީ ވަކި ނިޒާމެއްގެ ތެރެއިން ވަކި ގޮތަކަށް ފަހި މާހައުލެއްގައި ކުރެވޭނެ ކަމެއްކަން ފާހަގަކުރައްވާ ޑރ. ޝަފީއު ވިދާޅުވީ އެކަން އެއްކޮށް ނައްތާލައިފިނަމަ، ސްކޫލުގެ އެއް ކޯ ރިލޭޓް ގެއްލިގެންދާނެ ކަމަށެވެ.
"ސްކޫލެއްގެ ކުރިއެރުމަށް އަދި ދަރިވަރުންގެ ކުރިއެރުމަށް ކޮންޓްރިބިއުޓްކުރަން ޕޭރެންޓަކު ހުރެއްޖެނަމަ އެއަށް ހުރަހެއްއަޅާކަށް ނެތިން. އެކަމަކު ސްކޫލްތަކުން ވިސްނަންވާނެ އަގުބޮޑެތި އެއްޗެހިތައް ހޯދުމުގައި ވަކި ގޮތެއް ނެތް ކަމުގައިވަނީ ނަމަ ބެލެނިވެރިންނަށް ވަރަށް އުނދަގޫ އައިސްދާނެ،" މިނިސްޓަރު ވިދާޅުވި އެވެ.
އޭސީތަކަށް ދޭ ކަރަންޓުގެ 30 ޕަސެންޓު ކަރަންޓަކީ ސޯލާ ޕެނަލް ފަދަ ރިނިއުބަލް އެނާޖީ ބޭނުންކޮށްގެން އުފައްދާ ކަރަންޓަށް ހަދައި، މަދުވެގެން ދެ އަހަރު ތެރޭގައި ސަރުކާރު ސްކޫލްތަކުގެ ކްލާސް ރޫމްތައް އޭސީކޮށް ނިންމާނެ ކަމަށް ސަރުކާރުން ބުނެ އެވެ.
އެ މަޝްރޫއުގެ ދަށުން އޭސީ ހަރުކުރުމަށް 600 މިލިއަން ރުފިޔާ އަދި އެއަށްފަހު އޭސީތައް ބެލެހެއްޓުމާއި ބިލުތަކަށް އަހަރެއްގެ މައްޗަށް 178.5 މިލިއަން ރުފިޔާ ހޭދަވާނެ ކަމަށް މޯލްޑިވްސް ނެޝަނަލް ޔުނިވާސިޓީ (އެމްއެންޔޫ) ގެ ޗާންސެލަރު އަދި ފަންނީ ތަޖުރިބާކާރު ޑރ. ހަސަން ހަމީދު ލަފާކުރެ އެވެ.
