ލޮސް އެންޖެލްސް، ޔުނައިޓެޑް ސްޓޭޓްސް (އޮގަސްޓް 4) - ލިވަޕޫލާ ހަވާލުވި ނެދަލެންޑްސްގެ ކޯޗު އާނޭ ސްލޮޓް އަށް އެ ކްލަބްގެ ވަޒީފާ ނިސްބަތުން ފަސޭހަވާނެ ކަމަށް މެންޗެސްޓާ ޔުނައިޓެޑްގެ ނެދަލެންޑްސް ކޯޗު، އެރިކް ޓެން ހާގް ބުނެފި އެވެ.
ލިވަޕޫލުން ރޭ އެމެރިކާ ޓުއާގެ މެޗުތައް ނިންމާލީ، މެންޗެސްޓާ ޔުނައިޓެޑްގެ މައްޗަށް 3-0 އިން ކުރިހޯދައިގެންނެވެ. އެމެރިކާ ޓުއާގައި ލިވަޕޫލް ކުޅުނު ހުރިހާ މެޗަކުން މޮޅުވިއިރު، އާ ކޯޗު ސްލޮޓް ބޭނުންވާ ގޮތަށް ކުޅުން ބަދަލުވަމުން އަންނަ ކަމުގެ ކަންކަން ވެސް ފާހަގަވެފައިވެ އެވެ.
ރޭގެ މެޗަށް ފަހު، ޔުނައިޓެޑްގެ ކޯޗު ޓެން ހާގް ބުނީ، ސްލޮޓް އަށް ލިވަޕޫލްގެ ކޯޗުކަން ކުރަން ފަސޭހަވުމުގެ ސަބަބުތައް ގިނަ ކަމަށެވެ.
"ވަރަށް ރަނގަޅު ސްޓްރަކްޗާއެއް އޮތް ކްލަބެއް (ލިވަޕޫލް) އެއީ. ކުޅުންތެރިން ވެސް ވަރަށް ހުނަރުވެރި، އަނެއްކޮޅުން ކްލޮޕް (ލިވަޕޫލްގެ ކުރީގެ ކޯޗު) ކުޅުވި ފުޓްބޯޅަ ވެސް ވަރަށް ރަނގަޅު. އަހަންނަށް ޔަގީން މި ހުރިހާ ފަސޭހައަކާ އެކު، އާނޭ (ސްލޮޓް) އަށް މީގެ އަށް އިތުރު ފުރިހަމަ ކަމެއް ގެނެވޭނެކަން،" ޓެން ހާގް ބުންޏެވެ.
ކްލޮޕް، ލިވަޕޫލްގައި ގެންގުޅުނު ފިލޯސަފީގެ ކަންކަމާއި ސްލޮޓްގެ ވިސްނުމުގައި ހުރި ކަންކަން އެކުއެކީގައި ރަނގަޅު މިސްރާބަކަށް ގެންދެވޭނަމަ، ލިވަޕޫލަށް ގިނަ ކާމިޔާބީތަކެއް ހޯދޭނެ ކަމަށް ޓެން ހާގް ވަނީ ބުނެފަ އެވެ.
ސްލޮޓް އާއި ޓެން ހާގް ވަނީ ނެދަލެންޑްސް ފުޓްބޯޅައިގައި ހަތަރު ފަހަރު ބައްދަލުކޮށްފަ އެވެ. ފުރަތަމަ ދެ މެޗުން، ސްލޮޓް ކޯޗުކޮށްދިން، އޭޒެޑް އަލްކްމާރް މޮޅުވިއިރު، ދެން ކުޅުނު ދެ މެޗުން ޓެން ހާގްގެ އަޔަކްސް ވަނީ ކުރިހޯދައިފަ އެވެ.
ކުރިއަށް އޮތް ސީޒަނަށް ތައްޔާރުވާން ޓެން ހާގްގެ ޔުނައިޓެޑުން، ދެ ކުޅުންތެރިއަކުގެ ސޮއި ހޯދާފައިވާއިރު، އެ ޓީމުން އަންނަނީ އިތުރު ޓްރާންސްފާތަކެއް ފުރިހަމަކުރަން މަސައްކަތް ކުރަމުންނެވެ. އަނެއްކޮޅުން، ސްލޮޓްގެ ލިވަޕޫލަކީ ޕްރިމިއާ ލީގުގައި ކުރިއަށް އޮތް ސީޒަނުގައި ވާދަކުރާ 20 ޓީމުގެ ތެރެއިން ކުޅުންތެރިއަކު ސޮއިނުކޮށް އޮތް ހަމައެކަނި ޓީމެވެ.
