ލާމަރުކަޒީ ނިޒާމުގެ ދަށުން ރާއްޖޭގެ ރަށްތައް ހިންގުމަށް މިހާރު އެކުލަވާލާފައިވާ ކައުންސިލްތަކުގެ ބަދަލުގައި ރައްޔިތުންގެ ގިނަ ބަޔަކު ތާއީދުކުރާނީ ކުރީގަ އޮތް ކަތީބު ސިސްޓަމަށް ކަމަށް ތިނަދޫ އުތުރު ދާއިރާގެ މެންބަރު ސައުދުﷲ ހިލްމީ ވިދާޅުވެއްޖެ އެވެ.
އޭނާ މިހެން ވިދާޅުވީ، ލޯކަލް ކައުންސިލްތަކުން ހުސްވާ ގޮނޑިތަކަށް މެންބަރުން ހޮވުމަށް ބާއްވާ ބައި އިލެކްޝަންތައް އަހަރަކު ދެ ފަހަރު ބޭއްވުމަށް ލާމަރުކަޒީ ގާނޫނަށް އިސްލާހު ގެންނަން ހުށަހެޅި ބިލުގެ ބަހުސްގައި ވާހަކަ ދައްކަމުންނެވެ.
ކައުންސިލްތަކަށް ރައްޔިތުންގެ އިތުބާރު ގެއްލިފައިވާ ކަމަށާއި ގިނަ ބަޔަކު ކުރީގައި އޮތް ކަތީބު ސިސްޓަމް މާ ރަނގަޅު ކަމަށް ބުނަމުންދާ ކަމަށް ވެރިކަންކުރާ ޕީއެންސީގެ މެންބަރު ވަނީ ވިދާޅުވެފަ އެވެ. އަދި، ކަތީބުންނަށް ރައްޔިތުންގެ އިހުސާސްތަކާ އެއްގޮތަށް ވެރިކަންކުރަން އިނގުނު ކަމަށްވެސް އޭނާ ވިދާޅުވި އެވެ.
"އަޅުގަނޑު ދަންނަވާނީ ހަމަ މިހާރުވެސް ވޯޓެއް ލައިފިއްޔާމު, ފެންނަ ނުފެންނަ ވޯޓެއް ލައިފިއްޔާ, ދިވެހި ރާއްޖޭގެ ގިނަ ރައްޔިތުން ތާއީދުކުރާނީ ކަތީބު ސިސްޓަމަށް."
އެހެން ވިދާޅުވުމަށްފަހު ސައުދުﷲ ވަނީ ނަމަވެސް މިއީ ކަތީބު ސިސްޓަމުގެ ޒަމާނެއް ނޫން ކަމަށާއި މިއީ އިންތިހާބީ ޒަމާނެއް ކަމުން ކޮންމެވެސް ބަޔަކު އިންތިހާބު ކުރަން ޖެހޭނެ ކަމަށް ވިދާޅުވެ، ލޯކަލް ކައުންސިލްތަކަށް ހޮވަންވީ ހަމައެކަނި ރައީސަކާއި ނައިބު ރައީސެއް ކަމަށް ވިދާޅުވެފަ އެވެ.
އަދި، ކައުންސިލްގައި ބާކީ ތިބޭ މެންބަރުންނަކީ އިއުލާނުކޮށްގެން އެ "ވަޒީފާ" އަށް ނެގޭ މެންބަރުން ކަމަށް ހެދުމަށް ފެންނަ ކަމަށްވެސް އޭނާ ވިދާޅުވި އެވެ.
ރާއްޖޭގެ ރަށްތަކުގެ ހިންގުމަށް ކުރިން އޮތް ކަތީބު ސިސްޓަމުގައި ރަށްރަށުގެ ވެރިން އައްޔަން ކުރަނީ ރައީސުލްޖުމްހުރިއްޔާގެ ބެލުމުގެ ދަށުން އޭރު އޮތް އެޓޯލްސް މިނިސްޓްރީންނެވެ. އޭގެ ކުރިން އެކަން ކުރީ ރަސްރަސްކަލުންގެ ބެލުމުގެ ދަށުންނެވެ.
