މުޒާހަރާ ކުރުމުގެ ހައްގަކީ ރާއްޖޭގައި ދިރިއުޅޭ ބިދޭސީންނަށް ވެސް ގާނޫނުން ލިބިދީފައި އޮތް ހައްގަކަށް ވާއިރު، އެ ހައްގުގެ ބޭނުން ހިފައި ގދ. ތިނަދޫގައި މުޒާހަރާ ކުރި ބަންގުލަދޭޝްގެ ރައްޔިތުން ޑީޕޯޓު ކުރަން ސަރުކާރުން މަސައްކަތް ކުރަމުންދާ މައްސަލަ ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް) އިން ބަލަން ފަށައިފި އެވެ.
އެޗްއާރުސީއެމުން މިއަދު މީޑިއާތަކަށް ފޮނުވި ކުރު ބަޔާނެއްގައި ބުނީ ދިވެހިރާއްޖެއިން ސޮއި ކޮށްފައިވާ އދ. ގެ އިންސާނީ ހައްގުތަކުގެ އާންމު ގަރާރު (އައިސީސީޕީއާރު) ގެ 21 ވަނަ މާއްދާގައި ބިދޭސީން ހިމެނޭހެން ހުރިހާ އެންމެންނަށް ސުލްހަވެރިކަމާ އެކު މުޒާހަރާ ކުރުމުގެ ހައްގު ކަށަވަރު ކޮށްދޭންޖެހޭ ކަމަށެވެ.
އަދި އެ ހައްގަކީ ދިވެހިރާއްޖޭގެ ގާނޫނުއަސާސީގެ 32 ވަނަ މާއްދާގައި ވެސް ލިބިދީފައިވާ ހައްގެއް ކަމަށް އެޗްއާރުސީއެމުގެ ބަޔާނުގައި ބުނެފައިވެ އެވެ.
ގދ. ތިނަދޫގައި މިދިޔަ ހަފުތާގައި ބަންގްލަދޭޝް ރައްޔިތުންތަކެއް ސުލްހަވެރި މުޒާހަރާއެއް ކުރިއަށް ގެންދިޔައީ ބަންގްލަދޭޝްގެ ސަރުކާރާ ދެކޮޅަށް އެގައުމުގައި ކުރަމުންދާ މުޒާހަރާތަކަށް އެއްބާރުލުން ދިނުމުގެ ގޮތުންނެވެ.
ނަމަވެސް އެކަަމަކީ "ސިޔާސީ ހަަރަކާތެއް" ގެ ގޮތުގައި ލޭބަލްކޮށް، އެއީ ވިސާގެ ޝަރުތަކާ ހިލާފުވުން ކަމަށް ބުނެ އެކަމުގައި އިސްކޮށް އުޅުނު އެންމެން ޑީޕޯޓުކުރާނެ ކަމަށް ހޯމް މިނިސްޓަރު އަލީ އިހުސާން ވަނީ މި ފަހުން ވިދާޅުވެފަ އެވެ.
އެޗްއާރުސީއެމުން މިއަދު ބުނީ ސަރުކާރުގެ އެ ނިންމުން އެ ކޮމިޝަނުގެ ސަމާލުކަމަށް އައިސްފައިވާ ކަމަށާއި އެ މައްސަލަ ވަރަށް ކައިރިން ބަލަމުންދާ ކަމަށެވެ.
ތިނަދޫގައި ސުލްހަވެރި ހަޅުތާލު ކުރި ބިދޭސީން ޑީޕޯޓު ކުރަން ސަރުކާރުން ނިންމުމާ ގުޅިގެން ޓްރާސްޕޭރެންސީ މޯލްޑިވްސްއިން ވެސް ވަނީ ކަންބޮޑުވުން ފާޅުކޮށްފަ އެވެ.
އެ ޖަމިއްޔާއިން އިއްޔެ ނެރުނު ބަޔާނުގައި ވެސް ބުނީ ސުލްހަވެރިކަމާއެކު އެއްވެ އުޅުމާއި ޖަމިއްޔާ ހެދުމުގެ ހައްގަކީ އދ. ގެ އިންސާނީ ހައްގުތަކުގެ އާންމު ގަރާރާއި ރާއްޖޭގެ ގާނޫނުއަސާސީން ވެސް ކޮންމެ މީހަކަށް ލިބޭ ހައްގެއް ކަމަށެވެ.
ޓްރާންސްޕޭރެންސީން ބުނީ ގާނޫނު އަސާސީން ލިބިދޭ ހައްގެއް ނިގުޅައިގަނެވޭ ގޮތަށް ވިސާގެ ޝަރުތުތައް ކަނޑައެޅުމަކީ ގާނޫނާ ހިލާފު ކަމެއް ކަމަށެވެ. މިފަދަ އަސާސީރާއްޖޭގެ އެއްވެސް ގާނޫނަކާއި ގަވާއިދަކާ ހިލާފުނުވާހާ ހިނދަކު ރާއްޖޭގައި ތިބޭ ބިދޭސީން ހައްޔަރުކޮށް, ވަޒީފާއިން ވަކިކޮށް އަނބުރާ ފޮނުވާލުމަކީ އެ ޖަމިއްޔާއިން ކަންބޮޑުވާ ކަމަށް ވެސް އެ ބަޔާނުގައި ވެ އެވެ.
ޓްރާންސްޕޭރެންސީން ގޮވާލީ ހޯމް މިނިސްޓްރީގެ ނިންމުން ބާތިލުކުރުމަށެވެ. އަދި ހުރިހާ ބިދޭސީ މަސައްކަތްތެރިންނާއި އެ މީހުންގެ އާއިލާތަކުގެ މެންބަރުންގެ ހައްގުތައްް ހިމާޔަތްކުރުމާބެހޭ ބައިނަލްއަގްވާމީީ މުއާހަދާގައި ބައިވެރިވެ އެއަށް ޢަމަލުކުރުމަށާއި ބިދޭސީންނަށް އަޅާ ފިޔަވަޅުތަކާއި ތަފާތުކުރުންތައް ހުއްޓާލުމަށް އެ ޖަމިއްޔާއިން ގޮވާލާފައި ވެ އެވެ.
ޓްރާންސްޕޭރެންސީގެ ބަޔާން ނިންމާލަމުން ދިވެހި މުޖުތަމައު އާއި އިގުތިސޯދުގައި ބިދޭސީ މަސައްކަތްތެރިން އަދާކުރާ ދައުރު ހަނދާންކޮށްދެމުން، ރާއްޖޭގައި ދިރިއުޅޭ ބިދޭސީންގެ އަސާސީ، ގާނޫނީ އަދި ބައިނަލްއަގްވާމީ އިންސާނީ ހައްގުތައް ކަށަވަރުކުރުމަށް މަސައްކަތްކުރުމަށް ވެސް އެ ޖަމިއްޔާއިން ގޮވާލާފައި ވެ އެވެ.
