ނޭޕާލުގެ ވެރިރަށް ކަތަމަންޑޫގައި މަތިންދާ ބޯޓެއް ވެއްޓި، ޕައިލެޓު ފިޔަވައި އޭގެއިން ދަތުރުކުރި އެންމެން މަރުވެއްޖެ އެވެ.
ޓްރިބުވަން އިންޓަނޭޝަނަލް އެއާޕޯޓުން ޕޮކަރާއަށް ދަތުރުކުރި އެ ބޯޓު ވެއްޓުނީ އަލިފާނުގެ ހާދިސާއެއް ދިމާވެ ނައްޓާލިތާ މާގިނައިރުތަކެއް ނުވަނީސް އެވެ.
ޖުމްލަ 19 މީހުންނާއެކު ސައުރިޔާ އެއާލައިންގެ އެ ބޯޓުގައި ތިބީ ޓެކްނިކަލް ސްޓާފުންނާއި، ދެ ކްރޫ މެންބަރުންނާއެކު ޓެސްޓު ދަތުރެކެވެ.
ނޭޕާލުގެ ކަމާބެހޭ އިދާރާތަކުން މިހާތަނަށް އެ ބޯޓު ވެއްޓެން މެދުވެރިވި ސަބަބެއް ހާމަކޮށްފައެއް ނުވެ އެވެ. ނަމަވެސް މައްސަލަ ބަލަމުން އަންނަ ކަމަށް ވަނީ ބުނެފަ އެވެ.
ނޭޕާލުގައި ދޭތެރެ ދޭތެރެއިން ފްލައިޓު ވެއްޓުމުގެ ހާދިސާތައް ދިމާވެ އެވެ. އެގޮތުން އެންމެ ފަހުން މިދިޔަ އަހަރުގެ ޖެނުއަރީގައި ފްލައިޓެއް ވެއްޓި 72 މީހުން ވަނީ މަރުވެފަ އެވެ.
އެ ގައުމުގައި އެންމެ ގިނަ މީހުން ފްލައިޓެއް ވެއްޓިގެން މަރުވީ 1992 ގަ އެވެ. އެފަހަރު ޕާކިސްތާން އިންޓަނޭޝަނަލް އެއާލައިންގެ ފްލައިޓު ވެއްޓުނު ހާދިސާގައި 167 މީހުން މަރުވި އެވެ.
