ޕެރިސް (ޖުލައި 23) - ކޮލަމްބިއާ ގައުމީ ޓީމުގެ ކެޕްޓަން، ހަމޭސް ރޮޑްރިގޭޒް، ބްރެޒިލްގެ ކްލަބް، ސައޮ ޕައޮލޯއާ އެކު ހަދާފައިވާ ކޮންޓްރެކްޓް އުވާލުމަށް ފަހު، އެނބުރި ޔޫރަޕްގެ ޓީމަކަށް ބަދަލުވާން ތައްޔާރުވަމުން އަންނަ ކަމަށް މީޑިއާ ރިޕޯޓްތައް ބުނެފި އެވެ.
ހަމޭސް، 33، މިދިޔަ ޖުލައި މަހު، ސައޮ ޕައޮލޯ އަށް ސޮއިކުރީ ދެ އަހަރުގެ ކޮންޓްރެކްޓެއްގަ އެވެ. އެކަމަކު، މިހާރު އޭނާ ވަނީ ބާކީ އެއް އަހަރު އޮއްވައި ސައޮ ޕައޮލޯގެ ކޮންޓްރެކްޓް އުވާލަން އެ ކްލަބްގެ މެނޭޖްމަންޓާ އެކު އެއްބަސްވުމަަކަށް އަތުވެފަ އެވެ.
ރިޕޯޓްތައް ބުނާގޮތުން، ހަމޭސްގެ ވިސްނުމަކީ، އެނބުރި ޔޫރަޕްގެ ކްލަބަކަށް ބަދަލުވާށެވެ. ހަމޭސް މި ގޮތަށް، ނިންމާފައިވަނީ، ދާދި ފަހުން ނިމުނު ކޮޕަ އެމެރިކާ ފުޓްބޯޅަ މުބާރާތުގައި އޭނާ ދެއްކި މޮޅު ކުޅުމާ އެކު ގިނަ ކްލަބްތަކެއްގެ އޮފާ ލިބިފައިވާތީ އެވެ. ވިއްސަކަށް އަހަރު ފަހުން، ކޮލަމްބިއާ އިން ކޮޕަ އެމެރިކާ ފައިނަލަށް ދަތުރުކުރިއިރު، ޓީމުގެ ތަރި އަކީ ހަމޭސް އެވެ. ފައިނަލުގައި އާޖެންޓީނާ އަތުން ކޮލަމްބިއާ ބަލިވި ނަމަވެސް، މުބާރާތުގެ މޮޅު ކުޅުންތެރިއަކީ ހަމޭސް އެވެ.
އާޖެންޓީނާގެ ބަންފީލްޑް ދޫކޮށް، 2010 ވަނަ އަހަރު ޕޯޗުގަލްގެ ޕޯޓޯ އަށް ބަދަލުވި ހަމޭސް ވަނީ ޔޫރަޕްގައި، ފްރާންސްގެ މޮނާކޯ، ސްޕެއިނުގެ ރެއާލް މެޑްރިޑް، ޖަރުމަނުގެ ބަޔާން މިއުނިިކް، އިންގްލެންޑްގެ އެވަޓަން، ގަތަރުގެ އަލް ރައްޔާން އަދި ގްރީސްގެ އޮލިމްޕިއާކޯސް އަށް ކުޅެފަ އެވެ.
