ކެލިފޯނިއާ (ޖުލައި 3) - ކޮޕަ އެމެރިކާ ފުޓުބޯޅަ މުބާރާތުގައި ގްރޫޕް ޑީގެ ފަހު މެޗުގައި ކޮލަމްބިއާ އިން ބްރެޒިލާ 1-1 އިން އެއްވަރުކޮށް ގްރޫޕް ޑީގެ އެއް ވަނަ ޓީމުގެ ގޮތުގައި ކުއާޓާ ފައިނަލުން ޖާގަ ހޯދައިފި އެވެ.
މެޗު ފަށައިގެން ބްރެޒިލް ޓީމުގެ ފަރާތުން އަވަސް އެޓޭކުތަކެއް ފެނިގެންދިޔައިރު، މެޗުގެ 10 ވަނަ މިނެޓުގައި ބްރޫނޯ ހިމަނޭޒް އޭރިއާ ބޭރުން ފޮނުވާލި ބާރު ހަމަލާގެ ހުރަހަކަށްވީ ކޮލަމްބިއާގެ ކީޕަރު ކެމީލޯ ވާގަސް އެވެ.
މެޗުގެ 12 ވަނަ މިނެޓުގައި ބްރެޒިލް އަށް ލީޑު ނަގާދިނީ ލިބުނު ހިލޭ ޖެހުމަކުން ރަފީނިއާ އެވެ. ރަފީނިއާ ފޮނުވާލި ބޯޅަ އަމާޒުވީ ގޯލުގެ މަތީ ކަނަށެވެ.
އޭގެ ފަހުން، މެޗުގެ 16 ވަނަ މިނެޓުގައި ކޮލަމްބިއާ އަށް ނަތީޖާ ހަމަހަމަ ކޮށްދޭން އެ ޓީމުގެ ކެޕްޓަން ހަމޭސް ރޮޑްރިގޭޒް އަށް ވަނީ ފުރުސަތު ލިބިފަ އެވެ. އެކަމަކު، އޭރިއާ ތެރެއިން ހުހަށްހުރެ އޭނާ ފޮޮނުވާލި ހަމަލާ ދިޔައީ ގޯލުގެ ހުރަސް ދަނޑިމަތިން ބޭރަށެވެ.
މެޗުގެ 20 ވަނަ މިނެޓުގައި ކޮލަމްބިއާގެ ޑަވިންސަން ސަންޗޭޒް ގޯލު ޖެހި ނަމަވެސް ވީޑިއޯ އެސިސްޓެންޓް ރެފުރީ (ވީއޭއާރް) ބެލުމަށްފަހު އޭނާ ގޯލު ޖެހިއިރު, އޮފްސައިޑްގައި ހުރިކަމަށް ވަނީ ނިންމައިފަ އެވެ.
ކޮލަމްބިއާގެ ކެޕްޓަން ހަމޭސް ރޮޑްރިގޭސް، މެޗުގެ 34 ވަނަ މިނެޓުގައި ފޮނުވާލި ނުރައްކާތެރި ހިލޭ ޖެހުން ގޯލުގެ ތެރެއަށް ވަދެވަދެ ހުއްޓައި ދިފާއުކުރީ ބްރެޒިލްގެ ކީޕަރު އެލިސަން ބެކާ އެވެ.
ފުރަތަމަ ހާފުގައި ގޯލު ޖަހަން ލިބުނު އެންމެ ހުސްފުރުސަތު ލިބުނީ ކޮލަމްބިއާގެ ލުއިސް ޑިއާޒް އަަށެވެ. ބްރެޒިލްގެ ކީޕަރު އެލިސަންގެ ޕާސް ލިބުނީ އޭރިއާ ބޭރުގައި މުޅިން ހުހަށްހުރި ލުއިސް ޑިއާޒްގެ ފަޔަށެވެ. އެކަމަކު، ލުއިސް ޑިއާޒް ފޮނުވާލި ހަމަލާ އެލިސަން ވަނީ ދިފާއު ކޮށްފަ އެވެ.
ފުރަތަމަ ހާފުގެ އިތުރު ވަގުތުގައި ކޮލަމްބިއާ އިން ވަނީ ގޯލު ޖަހާ ނަތީޖާ ހަމަހަމަ ކޮށްފަ އެވެ. ޖޯން ކޯޑަބާ އޭރިއާ ތެރެއަށް ހުސްކޮށްލި ބޯޅަ އެއް ގޯލުގެ ތެރެއަށް ފޮނުވާލައިގެން މި ގޯލު ކޮލަމްބިއާ އަށް ކާމިޔާބު ކޮށްދިނީ ޑެނިއަލް މުނިއޯސް އެވެ.
ދެ ވަނަ ހާފު ފަށައިގެން ހަމަހަމަ ކުޅުމެއް ދެ ޓީމުގެ ފަރާތުން ފެނިގެންދިޔައިރު, މި ހާފުގައި ގިނަ ފައުލްތަކެއް ފެނިގެންދިޔަ އެވެ.
މެޗުގެ 68 ވަނަ މިނެޓުގައި ކޮލަމްބިއާ އަށް ވަނީ ގޯލު ޖަހަން ރަނގަޅު ފުރުސަތެއް ލިބިފަ އެވެ. ހަމޭސް ނަގާދިން ހުރަހަކަށް މުޅިން ހުސްކޮށް އަރާ ޖޯން ކޯޑަބާ ބޮލުން ފޮނުވާލި ނަމަވެސް ބްރެޒިލްގެ ކީޕަރު އެލިސަން ވަނީ އެ ހަމަލާ ދިފާއު ކޮށްފަ އެވެ.
މެޗުގެ 84 ވަނަ މިނެޓުގައި ކޮލަމްބިއާ އަށް ވަނީ ލީޑު ނަގަން ރަނުގެ ފުރުސަތެއް ލިބި ބޭކާރުވެފަ އެވެ. އޭރިއާ ތެރެއަށް ލުއިސް ޑިއާޒް ހުސްކޮށްލި ބޯޅަ މުޅިން ހުހަށްހުރެ ބޯރޭ ފޮނުވާލި ނަމަވެސް ދިޔައީ ގޯލާ އަމާޒުނުވެ ބޭރަށެވެ.
މި ނަތީޖާ އާއެކު ގްރޫޕް ޑީގެ އެއް ވަނަ ޓީމުގެ ގޮތުގައި ކޮލަމްބިއާ ކުއާޓާ ފައިނަލަށް ދިޔައީ, ކުޅުނު ތިން މެޗުން ހޯދި ހަތް ޕޮއިންޓާ އެކުގަ އެވެ. ދެ ވަނައިގައި އޮތް ބްރެޒިލް އަށް ތިން މެޗުން ލިބެނީ ފަސް ޕޮއިންޓެވެ.
