ދޯހާ، ގަަތަރު (ސެޕްޓެމްބަރު 24) - ކޮލަމްބިއާގެ ތަރި ހަމޭސް ރޮޑްރިގޭޒް ގަތަރުގެ ކްލަބް އަލް ރައްޔާނަށް ބަދަލުވީ އޭނާ ކުރިން ކުޅެމުން އައި އެވަޓަން އިން ދިން ވަރަށް ވުރެ ކުޑަ މުސާރަ އަކަށް ކަމަށް ރިޕޯޓްތައް ބުނެފި އެވެ.
މިދިޔަ ސީޒަން ފެށުމުގެ ކުރިން ރެއާލް މެޑްރިޑް ދޫކޮށް އެވަޓަން އަށް ބަދަލުވި އުމުރުން 30 އަހަރުގެ ހަމޭސް އަށް އެ ޓީމުން ސީޒަނަކަށް 13.6 މިލިއަން ޑޮލަރު ދޭން އެއްބަސްވި އެެވެ. އެއީ 2022 ވަނަ އަހަރުގެ ޖޫން މަހުގެ ނިޔަލަށް ނިމޭ ކޮންޓްރެކްޓެކެވެ.
އިއްޔެ، އަލް ރައްޔާނަށް ތިން އަހަރުގެ ކޮންޓްރެކްޓެއްގައި ހަމޭސް ސޮއިކުރީ ސީޒަނަކަށް 8.5 މިލިއަން ޑޮލަރަށް ކަމަށް ރިޕޯޓްތައް ބުނެ އެވެ.
އަލް ރައްޔާން ކުޅުންތެރިއެއްގެ ގޮތުގައި މީޑިއާއާ ބައްދަލުކުރުމަށް ފަހު ހަމޭސް ބުނީ އޭނާ އަކީ ކޮންމެ ކްލަަބަކަށް ކުޅުނުއިރު ވެސް މޮޅުވާން މަސައްކަތްކުރި ކުޅުންތެރިއެއް ކަމަށާއި އެކަން ގަތަރުގައި ވެސް ތަކުރާރުކުރަން ބޭނުންވާ ކަމަށެވެ.
"ވަރަށް ގިނަ ދުވަސްތަކެއް ވެއްޖެ އަހަންނަށް ބޭނުންވާ ލެވަލަށް ނުކުޅެވޭތާ. މި ޓީމުގައ އަހަރެންގެ އަސްލު ކުޅުން ދައްކަން ބޭނުން. ފުރަތަމަ ކަމަކަށް އަހަރެން އެބަޖެހޭ ފިޓްނަސް ރަނގަޅުކުރަން. ވަރަށް ގިނަ ދުވަސްވެއްޖެ ރަނގަޅަށް ޓްރެެއިން ނުކުރެވޭތާ،" ހަމޭސް ބުންޏެެވެ.
އަލް ރައްޔާން ކުޅުންތެރިއެއްގެ ގޮތުގައި ހަމޭސް ނޫސްވެރިންނާ ބައްދަލުކުރަނީ.-- ފޮޓޯ: އޭއެފްޕީ
ހަމޭސް އެވަޓަން އަށް ކުޅުނީ އެ ކްލަބްގެ ތާރީހުގައި އެންމެ މުސާރަ ބޮޑު ކުޅުންތެރިއާގެ ގޮތުގަ އެވެ. މިދިޔަ އަަހަރު އެވަޓަންގައި ހުރި ކޯޗު ކާލޯ އަންޗެލޮޓީގެ އެދުމަށް އެ ޓީމަށް ބަދަލުވި ހަމޭސް އެ ޓީމު ދޫކޮށްލަން ނިންމި އެންމެ ބޮޑު ސަބަބަކީ މި ސީޒަނުގައި އެވަޓަނާ ހަވާލުވި ކޯޗު ރަފައެލް ބެނިޓޭޒްގެ ޕްލޭނުން ޖާގައެއް ނެތުމުންނެވެ.
މި ސީޒަން ފެއްޓުމުގެ ކުރިން އެވަޓަން އިން ވަނީ ހަމޭސް އާއި 10 މިލިއަން ޑޮލަރު ދީފައި ޕޯޓޯގެ ލުއިޒް ޑިއާޒް ގެންނަން ހުށަހަޅައިފަ އެވެ. އެ ޑީލަށް ޕޯޓޯގެ ރުހުމެއް ނުލިބުނެވެ. އޭގެ ފަހުން ހަމޭސް ހޯދަން ތުރުކީގެ އިސްތަންބޫލް ބަސަކްޝެހީރުން ހުށަހެޅީ ލޯން އެއްބަސްވުމެކެވެ. އެވަޓަން އިން އެ ޑީލަށް އެއްބަސްނުވި ސަބަބަކީ މުސާރައިގެ 30 ޕަސެންޓް އެވަޓަން އިން ދޭން ޖެހޭ ގޮތަށް ބަސަކްޝެހީރުން އެދުމުންނެވެ.
ހަމޭސްގެ ސޮއި ހޯދި އަލް ރައްޔާނުގެ ކޯޗަކަށް ހުރީ ފްރާންސްގެ ކުރީގެ ޑިފެންޑަރު އަދި ޕީއެސްޖީގެ ކުރީގެ ކޯޗު ލޯރެންޓް ބްލޮންކް އެވެ. މި ސީޒަނުގައި މިހާތަނަށް އަލް ރައްޔާން ކުޅުނު ތިން މެޗުން ވެސް އަދި މޮޅެއް ނުލިބެ އެވެ.
ބްރެޒިލްގައި 2014 ވަނަ އަހަރު ބޭއްވި ފީފާ ވޯލްޑް ކަޕުގައި އެންމެ ގިނަ ގޯލު ޖަހައިގެން ވިދާލި ހަމޭސް، އަށް އެންމެ ފަހުން ކޮޕަ އެމެރިކާގައި ކުޅުނު ކޮލަމްބިއާ ޓީމުން ފުރުސަތެއް ނުލިބުނެވެ. ހަމޭސް ގަަތަރުގެ ކްލަބަކަށް ބަދަލުވުމުގެ އެންމެ ބޮޑު އެއް ސަބަބަކީ ކޮލަމްބިއާ ގައުމީ ޓީމުގެ ޖާގަ ކަށަވަރުކުރުމާއި އަންނަ އަހަރުގެ ވޯލްޑް ކަޕަށް ތައްޔާރުވާން ގަތަރުގެ މާހައުލަށް ހޭނުމުގެ ގޮތުންނެވެ. އޭނާ ވަނީ ގަތަރު ވޯލްޑް ކަޕްގައި ކުޅެން ބޭނުންވާ ކަމަށް އަލް ރައްޔާންގެ ނޫސްވެރިންގެ ބައްދަލުވުމުގައި ވެސް ބުނެފަ އެވެ.
