މިއާމީ (ޖުލައި 16) - ކޮޕަ އެމެރިކާ ފުޓްބޯޅަ މުބާރާތުގެ ފައިނަަލުގައި އާޖެންޓީނާ އަތުން 1-0 އިން ކޮލަމްބިއާ ބަލިވި މެޗަށް ފަހު، އެ ގައުމުގެ ފުޓްބޯޅަ ފެޑެރޭޝަންގެ ރައީސް، ރަމޯން ޖެސޫރޫން، ބައިވެރިވެގެން ހިނގި މާރާމާރީއެއްގެ މައްސަލަައިގައި އޭނާ ހައްޔަރުކޮށްފި އެވެ.
މިއާމީ ޕޮލިސް ޑިޕާޓްމަންޓުން، ރަމޯން، 71، އާއި އޭނާގެ ދަރިފުޅު، ރަމޯން ޖަމީލް ޖެސޫރޫން، 43، ހައްޔަރުކޮށްފައިވަނީ، ސެކިއުރިޓީ އޮފިސަލުންތަކަކަށް ހަމަލާދީފައިވާތީ އެވެ.
ހާޑްރޮކް ސްޓޭޑިއަމްގައި ކުޅުނު ފައިނަލް މެޗަށް ފަހު، ރަމޯން އާއި ޖަމީލް، އެކުގައި، ދަނޑުގެ އެންޓްރަންސްއާ ދިމާލަށް ދިޔަ ވަގުތު ސެކިއުރިޓީން އެ ފުރުސަތު ނުދޭން ނިންމުމާ އެކު، ރަމޯން އާއި ޖަމީލް ވަނީ ސެކިއުރިޓީންނަށް ހަމަލާދީފަ އެވެ. އެ ގޮތުން، ރަމޯން ވަނީ ސެކިއުރީ އޮފިސަރެއްގެ ކަރުގައި ހިނފައި ބިންމައްޗަށް ވައްޓާލައި، ބޮލުގައި ވެސް ޖަހައިފަ އެވެ. އަދި ޖަމީލް ވަނީ އެ ތަނަށް އައި އަންހެން ސެކިއުރިޓީ އޮފިސަަރަކަށް ވެސް ހަމަލާދީފަ އެވެ.
މީގެ އިތުރުން، ރަމޯން އާއި ޖަމީލް ވަނީ ސެކިއުރީޓީ މެނޭޖަރަށް ވެސް ހަމަލާދީފަ އެވެ.
މިއާމީ ފުލުހުން، މި މައްސަަލައިގެ ތަހުގީގު ކުރިއަށްގެންދަން ފަށާފައިވާއިރު، ރަމޯން އާއި ޖަމީލް ހައްޔަރުކުރީ އެ ދެ މީހުން ހައްޔަރުކުރާ ވަރަށް ވީޑިއޯ އިން ހެކި ލިބިފައިވާތީ އެވެ.
މި މައްސަލައިގައި، ރަމޯން އާއި ޖަމީލްގެ ފަރާތުން މީޑިއާގައި އެއްވެސް ފަރާތަކުން ވާހަކަ ދައްކާފައިނުވާއިރު، ކޮލަމްބިއާ ފުޓްބޯޅަ ފެޑެރޭޝަނުން ވެސް ރަސްމީކޮށް ވާހަކަ ދައްކާފައިނުވެ އެވެ.
ކޮޕަ އެމެރިކާ ފައިނަލް މި ފަހަރު ކުރިއަށް ގޮސްފައިމިވަނީ މައްސަލަ ބޮޑުކޮށެވެ. އެ ގޮތުން، މެޗު ފަށަން ހަމަޖައްސާފައި އޮތް ގަޑިއަށް ވުރެ، ފެށުން 80 މިނިޓަށް ލަސްވި އެވެ. އެއީ، ޓިކެޓް ނެތް ފަރާތްތަކަކުން ދަނޑަށްވަދެ ތިބުމުން ދިމާވި މައްސަލައަކާ ހެދި އެވެ. އަނެއްކޮޅުން، މެޗުގެ ކުޅުން ނިމުމުން، ކޮލަމްބިއާގެ ސަޕޯޓަރުންނާއި އުރުގުއޭގެ ކުޅުންތެރިންނާ ދެމެދު ހަމަނުޖެހުންތަކެއް ވަނީ ހިނގައިފަ އެވެ.
