ހުޅުމާލެ ފޭސް 1 ގައި ޖުލައި، 8 ވަނަ ދުވަހުގެ ރޭ ހިންގި މާރާމާރީއެއްގައި ޒުވާނަކަށް ބޮޑެތި އަނިޔާތަކެއް ދިނުމާ ގުޅިގެން، އެ ޒުވާނާގެ އާއިލާއިން ކަންބޮޑުވުން ފާޅުކޮށްފި އެވެ.
"އަދަދު" އަށް އެނގިފައިވާ ގޮތުގައި އެ މާރާމާރީގައި އަނިޔާވީ މ. ރަތްމަންދޫއަށް ނިސްބަތްވާ އަހުމަދު ނަޒީފް، 26 އެވެ. އޭނާ މަސައްކަތް ކުރަނީ ހުޅުމާލޭގައި ހުންނަ އެސްޓީއޯ ފިހާރައެއްގަ އެވެ.
ނަޒީފްގެ އާއިލާއިން އޭނާގެ ބޮޑުބޭބެ "އަދަދު" އާ ވާހަކަދަމުން ބުނީ ގްރޫޕަކުން ނަޒީފަށް ހަމަލާދިނީ ސައިކަލުގައި ގޮސް ރެޑްވޭވް ފިހާރައާ ދިމާލުގައި އޮންނަ ޕާކެއް ކައިރީ މަޑުކޮށްލި ވަގުތު ކަމަށެވެ.
ހަމަލާދިނީ ކީއްވެގެންކަން މިހައިތަނަށް ވެސް އެނގިފައިނުވާ ކަމަށާއި ނަޒީފްއަކީ ވަރަށް މަޑުމައިތިރިކޮށް އުޅޭ ކުއްޖެއް ކަމަށާއި އެ ހަމަލާއާއެކު އާއިލާއަށް ބޮޑު ސިހުމަކާއި ހިތާމައެއް ލިބިފައިވާ ކަމަށް ވެސް އޭނާ ބުންޏެވެ.
"ނަޒީފްގެ ފުށްކިބައިން ބޮޑުތަނެއް ފަޅައިލި. ނިއްކުރި މަތިން ދެތަން ފަޅައިލި. ސިކުނޑިއަށް ލޭ އެޅުނު. ތުންފަތްވެސް ފަޅާލާފައި ވަނީ. އެއް ލޯ ވެސް ހުރީ ވަރަށް ބޮޑަށް ދުޅަވެފައި،" ނަޒީފްގެ ބޮޑުބޭބެ ބުންޏެވެ.
ހާދިސާއާ ގުޅިގެން ފުލުހުންގެ ފަރާތުން މިހައިތަނަށް ވެސް އެދެވޭ ކަހަލަ ޖަވާބެއް ލިބިފައި ނުވާކަން ފާހަގަކޮށް ،މިކަމަށް އިންސާފު ލިބޭނެ ކަމާމެދު ނަޒީފްގެ ބޮޑުބޭބެ ސުވާލު އުފެއްދި އެވެ.
"އާއިލާގެ ވަރަށް ބޮޑެތި ކަންބޮޑުވުންތައް މިކަމާ ގުޅިގެން އެބަހުރި. ކޭސްއަށް އެޓެންޑުވީ އެތައް ދުވަހެއް ފަހުން. ވަރަށް ބޮޑަށް އެދެން ފުލުހުން މިކަން ސީރިއަސްކޮށް ބެލުމަށް. ނަޒީފްއަށް ވަނީ ނަފްސާނީ ގޮތުން ވަރަށް އަސަރުކޮށްފައި،" އޭނާ ބުންޏެވެ.
ފުލުހުން ބުނީ އެ މައްސަލަ ތަހުގީގު ކުރަމުން ގެންދާ ކަމަށާއި އެހެން ނަމަވެސް އެއްވެސް މީހަކު އަދި ހައްޔަރު ކޮށްފައި ނުވާ ކަމަށެވެ.
"ނަޒީފްގެ މަންމަ އަބަދު ރޮނީ. ދަރިފުޅަށް އެފަދަ ބޮޑެތި ޒަހަމްތައް ލިބިފައި ހުރުމުން ދެރަަވާނެތާ. ނަޒީފްގެ އަންހެނުން ވެސް ހުރީ ވާނުވާގައި. އެއްވެސް މީހަކާ މައްސަލައެއް ޖެހިފައި އޮތްކަން ނޭގޭ ކަމަށް ބުނި،" ނަޒީފްގެ ބޮޑުބޭބެ ބުންޏެވެ.
މިފަދަ އާންމު ނިކަމެތި މީހުންނާ ގުޅޭ މައްސަލަތަކުގައި ފުލުހުން އަމަލުކުރާ ގޮތާ މެދު ހިތްހަމަނުޖެހުން ފާޅުކޮށް އޭނާ ބުނީ ހައިޕްރޮފައިލް މީހުންގެ ކަންކަމުގައި ފުލުހުން އަވަދިނެތި މަސައްކަތްކޮށް، ކުށްވެރިން ވެސް ފަސޭއިން ހޯދާ ކަމަށެވެ.
ކައިވެނިކޮށްގެން އުޅޭ ނަޒީފްގެ މަންމައާއި ބައްޕަގެ ހުރި ހަމައެކަނި ދަރިފުޅަކީ އޭނާ އެވެ. ނަޒީފްގެ ބައްޕަ ވަނީ މަރުވެެފަ އެވެ.
