އެމެރިކާގެ ރިޔާސީ އިންތިހާބުގައި ވާދަ ކުރައްވާ އެ ގައުމުގެ ކުރީގެ ރައީސް ޑޮނަލްޑް ޓްރަމްޕް އަވަހާރަކޮށްލަން ދިން ބަޑީގެ ހަމަލާގައި ވަޒަން އެރީ އޭނާގެ ކަނާއަތު ކަންފަތަށް ކަމަށް ޓްރަމްޕް ވިދާޅުވެއްޖެ އެވެ.
ރާއްޖެ ގަޑިން ފަތިހު 4:00 ހާއިރު ބަޓްލާ، ޕެންސިލްވޭނިއާގައި ކުރިއަށް ގެންދިޔަ ކެމްޕެއިނުގެ ރެލީއެއްގެ ތެރެއިން ޖުމުލަ ތިން ފަހަރު ޓްރަމްޕަށް އަމާޒުކޮށް ބަޑި ޖެހި އެވެ. އޭގެ ތެރެއިން އެއް ވަޒަން ކަންފަތަށް އަމާޒުވިއިރު، އަނެއް ވަޒަން ދިޔައީ އޭނާގެ ބޯ ކައިރިން އިންޗިއެއްހާ ދުރުންނެވެ.
"އަހަރެން ގަޔަށް ޖެހި ވަޒަން ކަނާއަތު ކަންފަތުގެ މަތީ ބައި ފޫއަޅުވާލި،" ޓްރުތު ސޯޝަލްގައި ޓްރަމްޕު ކުރެއްވި ޕޯސްޓެއްގައި ވިދާޅުވި އެވެ.
ޓްރަމްޕު އަވަހާރަކޮށްލަން އުޅުނު މީހާ ހުރީ ގާތްގަނޑަކަށް 450 ފޫޓު ދުރުގައި ހުރި ފުރާޅެއްގަ އެވެ. ޓްރަމްޕުގެ ސެކިއުރިޓީ ބަލަހައްޓަން ތިބި ސްނައިޕަރުން ވަނީ ހަމަ އެ ވަގުތު އޭނާއަށް ހަމަލާދީ މަރާލައިފަ އެވެ.
ޓްރަމްޕަށް ހަމަލާދިން މީހާ ހުރި ތަނާއި ޓްރަމްޕު ސްޓޭޖް ހުރި ތަން
ގާތްގަނޑަކަށް ތިން ފަހަރު ޓްރަމްޕު ގަޔަށް ބަޑި ޖެހި އަޑު ވީޑިއޯއަކުން އިވެ އެވެ. ބަޑި ޖެހި އިރު ޓްރަމްޕު ކަންފަތުގައި އަތް އަޅުއްވާ މަންޒަރު ވެސް ފެނެ އެވެ. ޕޯޑިއަމުން ކައިރިއަށް ތިރިވުމަށްފަހު ތެދުވެވަޑައިގެން އަތުގެ އިޝާރާތުން ގަދަކޮށް ހުންނެވިކަން ޓްރަމްޕު ދެއްކެވި އެވެ.
މީގެ ކުރިން 2017 ވަނަ އަހަރުން ފެށިގެން ހަތަރު އަހަރު އެމެރިކާގެ ރައީސްގެ މަގާމުގައި ހުންނެވި ޓްރަމްޕުގެ ހާލުކޮޅު ރަނގަޅު ކަމަށް އޭނާގެ ތަރުޖަމާނު ވަނީ ވިދާޅުވެފަ އެވެ. އަދި އެ ހަމަލާ ވަރަށް ބޮޑަށް ކުށްވެރި ކުރާ ކަމަށް ވެސް ތަރުޖަމާނު ވަނީ ވިދާޅުވެފަ އެވެ.
ޓްރަމްޕަށް ހަމަލާދިނުމުން އެމެރިކާގެ ރައީސް ޖޯ ބައިޑެން ވަނީ ޓްރަމްޕަށް ގުޅައި ވާހަކަ ދައްކަވައިފަ އެވެ. އަދި އެ ހަމަލާ ހަރުކަށި އިބާރާތުން ކުށްވެރި ކުރައްވާ ކަމަށް ބައިޑެން ވަނީ ވިދާޅުވެފަ އެވެ.
ޓްރަމްޕަށް ހަމަލާދީފައި ވަނީ ބަޓްލާ، ޕެންސިލްވޭނިއާގައި ކުރިއަށް ގެންދިޔަ ރެލީއެއްގެ ތެރެއިންނެވެ. ޓްރަމްޕު ގަޔަށް ބަޑި ޖެހި މީހާ މަރާލީ އެމެރިކާ ސީކްރެޓް ސާވިސްގެ ސްނައިޕަރުން ކަމަށް ބެލެވެ އެވެ. ޕޯޑިއަމްއާ ދިމާލުން މަތީގައި ހުރި ފުރާޅެއްގައި ހުރެ ސްނައިޕަރަކު ރައްދުގައި ހަމަލާ ދޭ މަންޒަރު ވީޑިއޯއަކުން ފެނެ އެވެ.
އެ ހާދިސާ ހިނގި އިރު ރައީސް ޖޯ ބައިޑެން ހުންނެވީ ޗުއްޓީގަ އެވެ. ނަމަވެސް މިހާރު ޗުއްޓީ ކުރުކޮށްލެއްވުމަށްފަހު އެނބުރި ވައިޓް ހައުސްއަށް ވަޑައިގަންނަވަން އުޅުއްވާ ކަމަށް ބައެއް ރިޕޯޓުތަކުން ބުނެ އެވެ. އަދި މިހާރު އެ ހާދިސާގެ ދެ ބްރީފިންއެއް ވެސް ސީކްރެޓް ސާވިސް އިން ބައިޑެންއަށް އަރުވާފައިވާ ކަމަށް ސަރުކާރުން ބުނެ އެވެ.
