މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ގެ ޑެޕިއުޓީ މެނޭޖިން ޑިރެކްޓަރު މުހައްމަދު ބައްސާމު އާދަމް އާއި އެ ކުންފުނީގައި އެންމެ ގިނަ ދުވަސްވީ މުވައްޒަފު އިބްރާހިމް އާސިމް ވަކިކޮށްފި އެވެ.
"އިއްޔެ އަޅުގަނޑަށް އަދި ބައްސާމަށް ވެސް ވަނީ ވަޒީފާއިން ވަކިކުރާނެކަން އަންގާފައި. ރަސްމީކޮށް ލިޔުން ހަވާލު ކުރާނީ މިއަދު" އެމްއެމްޕީއާރުސީ ބޯޑުގައި ތަމްސީލު ކުރައްވާ ހުންނެވި އާސިމް "އަދަދު ނޫހަށް ވިދާޅުވި އެވެ.
އެމްއެމްޕީއާރުސީގައި 20 އަހަރު ހިދުމަތް ކުރެއްވި އާސިމް އަކީ އެ ކުންފުނީގެ އިދާރީ މަސައްކަތްތަކާއި، ޕްރޮކިއުމެންޓު ބައި އިސްކޮށް ބަލަހައްޓާ މުވައްޒަފެވެ.
ސަރުކާރުގެ ހިދުމަތުގައި އޭނާ ހޭދަކުރެއްވި 31 އަހަރުގެ ތެރެއިން 22 އަހަރު އުޅުއްވީ ޓޫރިޒަމްގެ ދާއިރާގަ އެވެ. ޓޫރިޒަމް މިނިސްޓްރީގައި ހިދުމަތް ކުރެއްވުމަށް ފަހު، 2004 ވަނަ އަހަރުން ފެށިގެން އެމްއެމްޕީއާރުސީ އުފައްދަން ދެން އުޅުއްވީ ޓޫރިޒަމް ޕްރޮމޯޝަން ބޯޑުގަ އެވެ. އެމްއެމްޕީއާރުސީ އެފެއްދުމަށް ފަހު މިހާތަނަށް އެ ކުންފުނީގެ އެކި މަގާމުތައް އޭނާ އަދާކުރައްވާފައިވެ އެވެ.
ޓޫރިޒަމް ދާއިރާގައި ދެވޭ ގިނަ އެވޯޑުތަކެއްގެ ފަނޑިޔާރުންގެ ޕެނަލްގައި އާސިމް ހިމެނި އެވެ. އޭގެތެރޭގައި، ރާއްޖޭގެ ޓޫރިޒަމަށް 50 އަހަރު ފުރުމާ ގުޅިގެން މަޓީން ދިން އެވޯޑުގެ ފަނޑިޔާރުންގެ ޕެނަލްގައި ވެސް އޭނާ އިންނެވި އެވެ.
ބައްސާމް އާއި އާސިމް ވަކިކުރި ސަބަބެއް އެމްއެމްޕީއާރުސީން ހާމައެއް ނުކުރެ އެވެ.
ބައްސާމް އާއި އާސިމް ވަކިކުރީ ރައީސް އޮފީހުގެ އެންގުމަށް، ހަރަދު ކުޑަކުރުމުގެ ފިޔަވަޅެއްގެ ގޮތުން ކަމަށް އަދަދު ނޫހަށް މައުލޫމާތު ދެއްވި އިތުބާރު ކުރެވޭ މަސްދަރުން ވިދާޅުވި އެވެ.
"އެމްއެމްޕީއާރުސީގެ ބޯޑުގައި އާސިމް ތަމްސީލްކުރާ މަގާމު ވެސް އުވާލީ. އެހާ ދުވަސްވި މުވައްޒަފަކު ވަކިކުރަނީ އެ މަގާމު ބޭނުމެއް ނުވާ ކަމަށް ބުނެ. އޭނާ އެދުނު އެހެން މަގާމަކަށް ވެސް ބަދަލުކޮށްދޭން. އެ ފުރުސަތެއް ވެސް ނުދިން،" އަދަދު ނޫހާ ވާހަކަ ދެއްވި ބޭފުޅާ ވިދާޅުވި އެވެ.
ހަރަދު ކުޑަކުރުމަށް ކަމަށް ބުނެ، ދާއިރާގެ ތަޖުރިބާހުރި މުވައްޒަފަކު ވަކިކުރުމަކީ ކަންބޮޑުވުމެއް ކަމެއް ކަމަށް ޓޫރިޒަމް ދާއިރާގެ ބައެއް ބޭފުޅުން އަދަދު ނޫހަށް ވިދާޅުވި އެވެ.
