އިނގިރޭސިވިލާތުގެ އާންމު އިންތިހާބުގައި ކޮންޒަވޭޓިވް ޕާޓީ ކުރިމަތިލާން ޖެހުނު ބޮޑު ބައްޔާއެކު، އެ ގައުމުގެ ބޮޑުވަޒީރުކަމުން ރިޝީ ސުނާކް އިސްތިއުފާ ދެއްވައިފި އެވެ.
ގައުމާ މުހާތަބުކޮށް ސުނާކް ވިދާޅުވީ އިނގިރޭސިވިލާތަށް ބަދަލެއް ބޭނުންވާ ކަމަށް އެ ގައުމުގެ ރައްޔިތުން ބުނެފައިވާ ކަމަށާއި އެކަން ހިތުގެ އަޑިން ގަބޫލުކުރާ ކަމަށެވެ.
"އަހަރެންނަށް އަޑު އިވިއްޖެ ރައްޔިތުންގެ އަޑު. ކުރިމަތިލާން ޖެހުނު ބަލީގެ ފުރިހަމަ ޒިންމާ ނަގަން. މި ބައްޔާއެކު ޕާޓީގެ ލީޑަރުކަމުން އިސްތިއުފާ ދެން. މިއީ ވަރަށް އުނދަގޫ ދުވަހެއް،" ސުނާކް ވިދާޅުވި އެވެ.
އިއްޔެ ބޭއްވި އާންމު އިންތިހާބުގައި ލޭބާ ޕާޓީން 409 ގޮނޑި ކާމިޔާބުކުރިއިރު، އެ ޕާޓީއާ އެންމެ ގާތުން ވާދަކުރި މިހާރު ވެރިކަމުގައި އޮތް ކޮންޒަވޭޓިވްއަށް ކާމިޔާބު ކުރެވުނީ 120 ގޮނޑި އެވެ. އަދި ލިބެރަލް ޕާޓީން ވަނީ 71 ގޮނޑި ކާމިޔާބުކޮށްފަ އެވެ.
އިންތިހާބުގައި 650 ގޮނޑިއަށް މެންބަރުން އިންތިހާބުކުރި އެވެ. އޭގެ ތެރެއިން އެސްއެންޕީ، ސިން ފެއިން، ޑީޔޫޕީ، ގްރީން ޕާޓީން ވެސް ވަނީ ގޮނޑިތަކެއް ކާމިޔާބުކޮށްފަ އެވެ.
އިންތިހާބުގައި ވާދަކުރެއްވި އިނގިރޭސިވިލާތުގެ މިހާރުގެ ބޮޑުވަޒީރު ރިޝީ ސުނާކްގެ ގޮނޑި އެމަނިކުފާނު ދިފާއު ކުރެއްވި ނަމަވެސް، ކެބިނެޓުގައި މިހާރު ހިމެނޭ ގިނަ މެންބަރުންނަށް ގޮނޑި ދިފާއު ނުކުރެވެ އެވެ.
